އާ ޖީލަކަށް އެމް.ޑީ.ޕީގެ ރިޔާސަތު ފޯރުވަން ޖެހޭ: ނިޔާޒު
6 މެއި 2026 | ބުދަ 13:42އެމް.ޑީ.ޕީގެ ރިޔާސަތު އާ ޖީލަކަށް ފޯރުކޮށްދޭންޖެހޭ ކަމަށް ވިދާޅުވެ، ކުރީގެ މެންބަރު އަލީ ނިޔާޒު ވަނީ އެ ޕާޓީގެ އެތެރޭގެ އިންތިޚާބުގައި މީކާއިލް ނަސީމަށް ތާއީދުކުރައްވާކަން ހާމަކުރައްވާފައި. މީކާއިލަކީ ސިޔާސީ ގޮތުން ތަޖުރިބާކާރު އަދި ރައްޔިތުންގެ އިތުބާރު ހޯއްދަވާފައިވާ ބޭފުޅެއްކަން ފާހަގަކުރައްވަމުން، ޕާޓީގެ މުސްތަޤުބަލަށްޓަކައި ޒުވާން ލީޑަރަކު ގެނައުމުގެ މުހިންމުކަން ނިޔާޒު ފާހަގަކުރެއްވި. އަދި ޕާޓީގެ ކާމިޔާބީތަކުގައި ބައިވެރިނުވާ ފަރާތްތަކުން ޕާޓީއަށް ގެންނަން އުޅޭ ބަދަލުތަކަށްވުރެ، ގިނަ ބަޔަކު ގޮވައިގެން މަސައްކަތްކުރެވޭނެ ޤާބިލުކަން މީކާއިލްގެ ކިބައިގައި ހުރިކަމަށް އޭނާ ވިދާޅުވި.
ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު. | ރާއްޖެ އެމްވީ
އާ ޖީލަކަށް އެމް.ޑީ.ޕީގެ ރިޔާސަތު ފޯރުވަންޖެހޭ ކަމަށް ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.
އެމް.ޑީ.ޕީގެ ޗެއަރޕާސަންގެ އިންތިޚާބާ ގުޅިގެން މީކާއިލް ނަސީމްގެ ކެމްޕޭން ޓީމުން ބޭއްވި ކަންމަތީ ޖަލްސާގައި ވާހަކަދައްކަވަމުން ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވީ، ޕާޓީގެ ކުރިމަގަށްޓަކައި އާ ޖީލަކަށް ޕާޓީގެ ރިޔާސަތު ފޯރުކޮށްދޭންޖެހޭ ވަގުތު ޖެހިފައިވާ ކަމަށެވެ. އަދި މި ބަދަލަކީ މީގެ ވިހި އަހަރު ކުރިން ޗެއަރޕާސަންގެ މަޤާމުގައި ތިއްބެވި ބޭފުޅުން އަލުން އެ މަޤާމަށް ގެނައުން ނޫން ކަމަށާއި، ހަގީގީ ބަދަލަކީ މީކާއިލް ނަސީމް ފަދަ ޒުވާން ބޭފުޅުން ކަމަށް އޭނާ ފާހަގަކުރެއްވި އެވެ.
މީކާއިލް ނަސީމަށް ތާއީދުކުރައްވާ ސަބަބުތައް ހާމަކުރައްވަމުން ނިޔާޒު ވިދާޅުވީ، މީކާއިލަކީ އުމުރުގެ ގޮތުން ހަގު ބޭފުޅެއް ނަމަވެސް ސިޔާސީ ގޮތުން ވަރަށް ތަޖުރިބާކާރު ދޮށީ ބޭފުޅެއް ކަމަށެވެ. އެމް.ޑީ.ޕީއަށް 20 އަހަރު ފުރެންދާއިރު، އޭގެ ތެރެއިން 16 އަހަރު މީކާއިލް ހޭދަކުރެއްވީ ސިޔާސީ މަސައްކަތުގައި ކަމަށް ނިޔާޒު ވިދާޅުވި އެވެ. އަދި ރައްޔިތުންގެ މަޖިލީހުގެ ތަޖުރިބާއަށް ބަލާއިރު ވެސް، މީކާއިލަކީ އޭނާއަށް ވުރެ ވެސް ތަޖުރިބާކާރު ބޭފުޅެއްގެ ގޮތުގައި ނިޔާޒު ސިފަކުރެއްވި އެވެ.
އަޅުގަނޑު ދެކޭގޮތުގައި މި ޕާޓީއަށް މި ވަގުތަށް އަދި ރާއްޖޭގެ މުސްތަޤުބަލަށް ވެސް އެންމެ ރަނގަޅު ގޮތަކީ، ގިނަ ބަޔަކު، ގޮވައިގެން ގިނަ ބަޔަކާއެކު މަސައްކަތްކުރާނެ ފަދަ މީހަކު އެމް.ޑީ.ޕީގެ ޗެއަރޕަސަންޓް ކަމަށް ގެނައުން. އަޅުގަނޑުމެންނަށް އަދި ދެހާސް އަށާވީސް ގެ ވާހަކައެއް ނުދައްކަމޭ. އަޅުގަނޑުމެން މި އުޅެނީ އަދި ޕާޓީ ތެރޭގައި ހަމައެކަނި އަޅަމުން. އަދި ބައެއް ބޭފުޅުން އެބަ ވިދާޅުވޭ، ޕާޓީ މި އޮތީ ވަރަށް ނާޒުކު ހާލަތެއްގައޭ. ކޮބައިތޯ އެ ވިދާޅުވާ ނާޒުކު ހާލަތެއްގައޭ. ޚާއްޞަ ހާލަތެއް ތެދެއް. ޚާއްޞަ ހާލަތެއް ޕާޓީގައި މި އޮތީ. އެ ޚާއްޞަ ހާލަތަކީ ވަރަށް ބޮޑު އިންތިޚާބެއް ކާމިޔާބުކޮށްގެން އަޅުގަނޑުމެން އައިސް މި ތިބީ. އިންތިޚާބުތަކުން ބަލިވަމުންބަލިވަމުންގޮސް އެއްވެސް ބަޔަކު ހީނުކުރާ ގޮތަށް، ރާއްޖޭގެ ހުރިހާ ސިޓީތަކުގެ މެޖޯރިޓީއާއި، ރާއްޖޭގެ ހުރިހާ ގިނަ ރަށްތަކުގެ މެޖޯރިޓީ ނަގައިގެން ތިބެ، އަޅުގަނޑުމެން މި ތިބީ ވަރަށް ޚާއްޞަ ހާލަތެއްގައި.ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު
މަޖިލިސް މެންބަރެއްގެ ގޮތުގައި ދެވަނަ ދައުރެއް ކާމިޔާބުކުރުމަކީ ރައްޔިތުންގެ ބޮޑު އިތުބާރެއް އޮވެގެން ނޫނީ ކުރެވޭނެ ކަމެއް ނޫންކަން ފާހަގަކުރައްވައި، ނިޔާޒު ވިދާޅުވީ މީކާއިލަކީ އެ އިތުބާރު ހޯއްދަވާފައިވާ ބޭފުޅެއް ކަމަށެވެ. އެހެންކަމުން ޕާޓީގެ ރިޔާސީ އިންތިޚާބަށް ކުރިމަތިލާން ތިބި ހުރިހާ ބޭފުޅުންނާއެކު މަސައްކަތްކޮށް، ރައްޔިތުންނަށް މެނިފެސްޓޯއެއް ހުށަހަޅައިގެން ކުރިއަށްދާނެ ބަދަލަކީ މީކާއިލް ކަމަށް އޭނާ ވިދާޅުވި އެވެ.
ނިޔާޒު އިތުރަށް ވިދާޅުވީ، މިއީ ޕާޓީގެ ތެރޭގައި ބައިބައިވުން އުފައްދަންވީ ވަގުތެއް ނޫން ކަމަށެވެ. އަދި ޕާޓީން ހޯދި ބޮޑެތި ކާމިޔާބީތަކުގައި އެއްވެސް މިންވަރަކަށް ބައިވެރިނުވާ ބަޔަކު އައިސް ޕާޓީއަށް ގެންނަން އުޅޭ ބަދަލުތަކަށް ތާއީދު ނުކުރައްވާނެ ކަމަށް ވެސް އޭނާ ވިދާޅުވި އެވެ. ޕާޓީގެ މުސްތަޤުބަލަށް އެންމެ ރަނގަޅު ގޮތަކީ ގިނަ ބަޔަކު ގޮވައިގެން މަސައްކަތް ކުރެވޭނެ ފަދަ ބޭފުޅަކު ޗެއަރޕާސަންގެ މަޤާމަށް ގެނައުން ކަމަށް ވިދާޅުވެ، ނިޔާޒު ވަނީ މީކާއިލް ނަސީމަށް އިންތިޚާބު ކާމިޔާބުކޮށްދޭނެ ކަމުގެ ޔަގީންކަން ދެއްވާފަ އެވެ.
