މެކްރޮން ގޮވާލެއްވީ ހޮރްމޫޒް އަލުން ހުޅުވާލުމަށް، އެމެރިކާ އާއި އީރާން ގުޅިގެން މަސައްކަތް ކުރުމަށް

ހޮރްމޫޒް ކަނޑު އޮޅި އަލުން ހުޅުވާލުމަށްޓަކައި އެމެރިކާ އާއި އީރާން އިން ގުޅިގެން މަސައްކަތް ކުރުމަށް ފްރާންސްގެ ރައީސް އިމަނުއެލް މެކްރޮން ގޮވާލައްވައިފި އެވެ. 

ހޯމަ ދުވަހު މެކްރޮން މިހެން ގޮވާލައްވާފައި މި ވަނީ، ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރު ތަކަށް މަގު ދެއްކުމާއި، ސަލާމަތްތެރިކަން ފޯރުކޮށްދިނުމަށް އެމެރިކާގެ އަސްކަރިއްޔާ އަށް، އެ ޤައުމުގެ ރައީސް ޑޮަނަލްޑް ޓްރަމްޕް އަމުރު ކުރައްވާފައިވާ ދަނޑިވަޅެއްގަ އެވެ. 

އާމޭނިއާގައި ބޭއްވި ވިލާތުގެ ޤައުމު ތަކުގެ ލީޑަރުންގެ ބައްދަލުވުމެއްގައި ވާހަކަ ދައްކަވަމުން މެކްރޮން ވިދާޅުވީ، އެންމެ ބޮޑަށް ބޭނުން ވަނީ އެމެރިކާ އާއި އީރާން ގުޅިގެން ހޮރްމޫޒް ކަނޑު އޮޅި ހުޅުވާލުމުގެ މަސައްކަތް ކުރުން ކަމަށެވެ. އަދި މިއީ އެ ކަނޑު އޮޅި އަލުން ހުޅުވާލުމަށް އޮތް ހަމައެކަނި ހައްލު ކަމަށް ވެސް މެކްރޮން ވަނީ ފާހަގަ ކުރައްވައިފަ އެވެ. 

މީގެ އިތުރުން މެކްރޮން ވިދާޅުވީ، ސާފު ނުވާ އުސޫލު ތަކެއްގެ ތެރެއިން ހިންގާ އެއްވެސް އަސްކަރީ އޮޕަރޭޝަނެއްގައި ފްރާންސް އިން ބައިވެރި ނުވާނެ ކަމަށެވެ. ފްރާންސް އަކީ އިނގިރޭސިވިލާތާ ގުޅިގެން، އެ ސަރަހައްދުގައި ސުލްޙަ ޤާއިމުވުމުން ކަނޑު އޮޅި ހުޅުވާލުމަށްޓަކައި ކޯލިޝަނެއް އެކުލަވާލުމުގެ މަސައްކަތުގައި އިސްކޮށް އުޅޭ ޤައުމެކެވެ. 

ހޮރްމޫޒް ކަނޑު އޮޅީގެ މަސްރަހު ގޯސްވެފައި ވަނީ، އެ ސަރަހައްދުން ދަތުރު ކުރާ ތެޔޮ ޓޭންކަރު ތަަކަށް ދެވޭ ހަމަލާތައް ގުޅިގެންނެވެ. މި މައްސަލައިގައި އެމެރިކާ އާއި އީރާންއާ ދެމެދު ބޮޑެތި ނުތަނަވަސްކަން އުފެދިފައިވާއިރު، މެކްރޮން ބާރު އަޅުއްވަނީ އަސްކަރީ ކުރިމަތިލުމެއްގެ ބަދަލުގައި ދެ ޤައުމުން ވިލަރެސް ކޮށްގެން މައްސަލަ އަށް ހައްލު ހޯދުމަށެވެ. 

ހޮރްމޫޒް ކަނޑު އޮޅިން ދަތުރު ކުރާ އުޅަނދު ތަކަށް އެމެރިކާ އިން އެހީތެރިކަން ދިނުމަށް ޓްރަމްޕް ނިންމެވުމާ އެކު، އީރާން އިން ވަނީ އެކަމަށް އިންޒާރު ދީފަ އެވެ.