ޕޫލް ބިލިއާޑް އެސޯސިއޭޝަންގެ ޗެއާޕާސަން ކަމުގެ ތިން ވަނަ ދައުރަކަށް ނާސިފް އިންތިޚާބު ވެއްޖެ

މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގެ ޗެއާޕާސަން ކަމުގެ ތިން ވަނަ ދައުރަކަށް، އަޙުމަދު ނާސިފް އިންތިޚާބު ކޮށްފި އެވެ.

މިފަހަރުގެ އިންތިޚާބުގައި ވާދަކޮށް، ނާސިފް ވަނީ ޕޫލް ބިލިއާޑް އެސޯސިއޭޝަންގެ ޗެއާޕާސަން ކަމުގެ ތިން ވަނަ ދައުރެއް ކަށަވަރު ކުރައްވައިފަ އެވެ. އެ މަޤާމު ނާސިފް ދިފާއު ކުރެއްވީ އިންތިޚާބުގައި އިސްމާއީލް ރަޒީންއާ ވާދަކޮށެވެ. 

ޕޫލް ބިލިއާޑް އެސޯސިއޭޝަންގެ ޗެއާޕާސަން ކަމުގެ ފުރަތަމަ ދައުރަކަށް ނާސިފް އިންތިޚާބު ވެފައި ވަނީ 2018 ވަަނަ އަހަރު އެވެ. އޭގެ ފަހުން 2022 ވަނަ އަހަރު އޭނާ ވަނީ ދެ ވަަނ ދައުރަކަށް ވެސް އިންތިޚާބުވެފަ އެވެ. 

ނާސިފް އާއެކު، ޕޫލް ބިލިއާޑް އެސޯސިއޭޝަންގެ ވައިސް ޗެއާޕާސަން އަކަށް އިންތިޚާބު ކޮށްފައި ވަނީ އަޙުމަދު މާހިދު އެވެ. މީގެ އިތުރުން ޚަޒާންދާރުގެ މަގާމަށް އިންތިޚާބު ވެފައި ވަނީ، ފާތިމަތު ރަައުފާ މުޙައްމަދު ހާފިޒް އެވެ. އާންމު މެމްބަރުންގެ ތެރެއިން އަންހެން މެމްބަރަކަށް އިންތިޚާބު ވެފައި ވަނީ، ފަގީހާ އިބްރާހީމް އެވެ. ފިރިހެނުންގެ ޖާގަ އަށް ދެ މެމްބަރުން އިންތިޚާބު ކުރާއިރު، އެ ދެ މެމްބަރުންނަކީ ޔޫސުފް ޒުބައިރު އާއި އަލީ ޝާވިން އެވެ.

ޕޫލް ބިލިއާޑް އެސޯސިއޭޝަންގެ ޗެއާޕާސަން ނާސިފް އަކީ، ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ ޗެއާމަން އެވެ. އޭގެ ކުރިން އޭނާ ވަނީ ރީޖަނަލް އެއާޕޯޓްސް ކޮމްޕެނީ ލިމިޓެޑުގެ އިތުރުން، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންކަން ވެސް ކޮށްފަ އެވެ.