ޤައުމީ ބިލިއާޑް މުބާރާތް އަންނަ މަހުގެ ތިނެއްގައި
މުބާރާތް ކުރިއަށް ގެންދިޔުމަށް ތާވަލްކުރެވިފައިވަނީ ނޮވެމްބަރު މަހުގެ ތިން ވަނަ ދުވަހުން 18 ވަނަ ދުވަހުގެ ނިޔަލަށް
ބިލިއާޑް އެސޯސިއޭޝަންގައި ބޭއްވި އިވެންޓުގެ ތެރެއިން
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން ބާއްވާ ޤައުމީ ބިލިއާޑް މުބާރާތް އަންނަ ނޮވެމްބަރު މަހުގެ ތިން ވަނަ ދުވަހު ފަށާ ގޮތަށް ހަމަޖެހިއްޖެއެވެ.
މިއަހަރުގެ މުބާރާތް ކުރިއަށް ގެންދިޔުމަށް ތާވަލްކުރެވިފައިވަނީ ނޮވެމްބަރު މަހުގެ ތިން ވަނަ ދުވަހުން 18 ވަނަ ދުވަހުގެ ނިޔަލަށެވެ. މުބާރާތުގައި ބައިވެރިވުމުގެ ފުރުސަތު މިހާރު ބިލިއާޑް އެސޯސިއޭޝަނުން ވަނީ ހުޅުވާލާފައެވެ. މުބާރާތުގައި ބައިވެރިވުމުގެ ސުން ގަޑި އަކީ މި މަހުގެ 20 ވަނަ ދުވަހުގެ ނިޔަލަށެވެ.
ޤައުމީ ބިލިއާޑް މުބާރާތުގެ މިއަހަރުގެ ޓައިޓަލް ސްޕޮންސަރަކީ ލިޓަސްއެވެ. މިއީ ލިޓަސް އިން މުބާރާތުގެ ޓައިޓަލް ސްޕޮންސްރުކަން ނަގާ ދެ ވަނަ ފަހަރެވެ. ހޯމަ ދުވަހު ބިލިއާޑް އެސޯސިއޭޝަންގައި ބޭއްވި ބައްދަލްވުމެއްގައި ވަނީ ޓައިޓަލްސް ސްޕޮންސަރާއެކު އެއްބަސްވުމުގައި ސޮއިކޮށްފައެވެ. ބިލިއާޑް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ރައީސް އަޙުމަދު ނާސިޙްއެވެ.
މުބާރާތް މިއަހަރު ކުރިއަށް ގެންދާނީ ހަ އިވެންޓަކަށް ބަހާލައިގެންނެވެ. އެއީ ޓީމު އިވެންޓާއި، ފިރިހެން އެއް ވަނަ ޑިވިޝަނާއި ދެ ވަނަ ޑިވިޝަން، އަންހެން ސިންގަލްސް، ޑަބަލްސް އަދި މިކްސް ޑަބަލްސްއެވެ.
