އެންމެ ފަހުގެ ޗެމްޕިއަން އީގަލްސް ބަލިކޮށް ސިފައިން ތަށި އުފުލާލައިފި

އެންމެ ފަހުގެ ޗެމްޕިއަން ކުލަބް އީގަލްސް ބަލިކޮށް ޤައުމީ ބިލިއާޑް މުބާރާތުގެ ޓީމު އިވެންޓުގެ ޗެމްޕިއަންކަން ދިވެހި ސިފައިންގެ ކުލަބުން ހޯދައިފިއެވެ.

ފައިނަލްގައި ސިފައިން އީގަލްސް ބަލިކުރީ 3-2 އިންނެވެ. ފައިނަލް މެޗުގެ ފުރަތަމަ ސިންގަލްސް ސިފައިންގެ ވަލަރިއާނޯ ޕަޖުއައި ވަނީ 9-2 އިން އީގަލްސްގެ މުޙައްމަދު ސާހިލް ހަމީދު ބަލިކޮށްފައެވެ. ނަމަވެސް ދެ ވަނަ ސިންގަލްސްގައި އީގަލްސްގައި މިގުއެލް ސެލްވިއާ ވަނީ 2-9 އިން ސިފައިންގެ އަޙުމަދު ޝާހިދު ބަލިކޮށްފައެވެ. ތިން ވަނަ އަށް ކުޅުނު ޑަބަލްސް ޓޭބަލްގައި ސިފައިންގެ ޙުސެއިން ފަޔާޒް އަދި ޙަސަން ޝަފްރާޒްގެ ޕެއާ ވަނީ 9-7 އިން އީގަލްސްގެ އިސްމާއިލް ސުވައިދު އަދި އަޙުމަދު އަފްރާހު އިސްމާއީލްގެ ޕެއާ ބަލިކޮށްފައެވެ. ހަތަރު ވަނަ ޓެބަލްގައި ކުޅުނު ޑަބަލްސް ގައި އީގަލްސްގެ އަޙުސަން ހާޝިމް އަދި އައްބާސް ސައީދު ވަނީ 4-9 އިން ސިފައިންގެ ޢަބްދުﷲ ޢަފީފް އަދި ދުންޔާޒް މުޙައްމަދު ބަލިކޮށްފައެވެ. ނަތީޖާ ނެރުމަށް ކުޅުނު ފަސް ވަނަ ޓޭބަލްގައި ސިފައިން ވަނީ އީގަލްސް ބަލިކޮށް ޗެމްޕިއަންކަން ހޯދާފައެވެ. އެ ޓޭބަލްގައި ސިފައިންގެ މުޙައްމަދު ޝަރީފް އަދި އަލީ ޝާވިން ވަނީ 9-5 އިން އީގަލްސްގެ ޙަސަން ޝާޒް މުޙައްމަދު އަދި އިބްރާހީމް އާފީގެ މައްޗަށް ކުރި ހޯދާފައެވެ.

ފައިނަލް މެޗަށްފަހު ވަނީ ވަނަވަނަ އަށް ހޮވުނު ކުޅުންތެރިންނަށް ޓްރޮފީ ހަވާލުކޮށްފައެވެ. މިއަހަރުގެ މުބާރާތުގެ ޓައިޓަލް ސްޕޮންސަރަކީ ލިޓަސްއެވެ. މިއީ ލިޓަސް އިން މުބާރާތުގެ ޓައިޓަލް ސްޕޮންސަރުކަން ނެގި ދެ ވަނަ ފަހަރެވެ.