ރާއްޖޭގައި ބޭއްވުމަށް ހަމަޖެހިފައިވާ ބައިނަލްއަޤުވާމީ ބިލިއާޑް މުބާރާތް ކަމަށްވާ "މޯލްޑިވްސް އޯޕަން 2023"ގެ ލޯގޯ ރަސްމީކޮށް ލޯންޗުކޮށްފި އެވެ.

އަންގާރަ ދުވަހުގެ ރޭ މޯލްޑިބްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގައި އޮތް ޚާއްސަ ރަސްމިއްޔާތެއްގައި ލޯގޯ ލޯންޗުކޮށްދެއްވީ ޔޫތު މިނިސްޓަރު އަޙުމަދު މަޚްލޫފް އެވެ. މި މަހުގެ 22 ވަނަ ދުވަހުން ފެށިގެން 26 ވަނަ ދުވަހާ ހަމައަށް ރާއްޖޭގައި ކުރިއަށްދާ މި މުބާރާތަކީ މިހާތަނަށް ރާއްޖޭގައި ބާއްވާ ބިލިއާޑުގެ ބައިނަލްއަޤުވާމީ ފުރަތަަމަ މުބާރާތެވެ.

އެ ރަސްމިއްޔާތުގައި ވާހަކަ ދައްކަވަމުން މިނިސްޓަރު މަޚްލޫފް ވިދާޅުވީ، ބިލިއާޑް އެސޯސިއޭޝަނުން ރާވާ މުބާރާތަށް އެހީތެރިކަން ފޯރުކޮށްދިނުމަކީ ޔޫތު މިނިސްޓްރީ އަށް ލިބޭ ވަރަށް ބޮޑު އުފަލެއް ކަމަށެވެ. މިނިސްޓަރު ވިދާޅުވީ ދުނިޔޭގެ ފެންވަރުގައި ފާހަގަކޮށްލެވޭ މޮޅެތި ކުޅުންތެރިންނާއެކު މިއީ ރާއްޖޭގައި ބޭއްވޭ ބިލިއާޑުގެ ފުރަތަމަ މުބާރާތް ކަމަށެވެ. މީގެ އިތުރުން މިނިސްޓަރު ވިދާޅުވީ މި މުބާރާތަކީ މިހާރު އޭޝިއާ އަދި ދުނިޔޭގެ ރޭންކިން އަށް ވެސް ޕޮއިންޓު ލިބިގެންދާ މުބާރާތަކަށްވުމުން އުންމީދު ކުރަނީ ވީހާ ވެސް ގިނަ ކުޅުންތެރިން ބައިވެރިވާނެ ކަމަށެވެ. އެމްޕީބީއޭގެ ރައީސް އަޙްމަދު ނާސިފް ވިދާޅުވީ، ރާއްޖޭގައި ބައިނަލްއަޤުވާމީ ބިލިއާޑް މުބާރާތެއް ބޭއްވުމުގެ މަސައްކަތް ފާއިތުވި އަހަރުތަކުން ފެށިގެން ކުރަމުން އައި ކަމަށާއި، މިއަހަރު މުބާރާތް ބޭއްވެނީ ޔޫތު މިނިސްޓްރީގެ ވަރަށް ބޮޑު އެހީއަކާ އެކު ކަމަށެވެ.

ރާއްޖޭގައި ބާއްވާ މުބާރާތުން އެއް ވަނަ ހޯދާ ކުޅުންތެރިޔަކަށް ފައިސާގެ އިނާމުގެ ގޮތުގައި 30،000 އެމެރިކާ ޑޮލަރު ދިނުމަށް ވަނީ ހަމަޖެހިފަ އެވެ. މީގެ އިތުރުން މުބާރާތުގެ ގަދަ 32 ގައި ހިމެނޭ ކުޅުންތެރިންނަށް ވެސް ފައިސާގެ އިނާމު ދިނުމަށް ވަނީ ހަމަޖެހިފަ އެވެ. މި މުބާރާތުގައި 64 ކުޅުންތެރިން ވާދަ ކުރާނެ އެވެ. އޭގެ ތެރެއިން 16 ކުޅުންތެރިންނަކީ ރާއްޖޭގެ ކުޅުންތެރިންނެވެ. މީގެ އިތުރުން ދުނިޔޭގެ ރޭންކިންގެ އެންމެ ކުރީގައި ކުޅޭ 16 ކުޅުންތެރިޔަކު ވެސް ބައިވެރިވާނެ އެވެ. ބާކީ 32 ޖާގަ އެއީ އެކި އެކި ޤައުމުގެތަކުގެ މަތީ ފަންތީގެ ކުޅުންތެރިންނެވެ. މި މުބާރާތަކީ ދުނިޔޭގެ ރޭންކިންގެ އިތުރުން އޭޝިއާގެ ރޭންކިން އަށް ޕޮއިންޓު ލިބޭ މުބާރާތެވެ.