އޮފީސްތަކުގެ ބިލިއާޑް މުބާރާތުގެ ޓީމްއިވެންޓްގެ ޗެމްޕިއަންކަން ދިވެހި ސިފައިންގެ ކްލަބާއި, ކަސްޓަމްސް ރެކްރިއޭޝަން ކްލަބުން ހޯދައިފިއެވެ.
އެމް.އައި.ބީ ވިސާ ޕްލެޓިނަމް ނުވަވަނަ އިންޓަރ އޮފީސް ބިލިއާޑް މުބާރާތުގެ ފިރިހެން ޑިވިޝަންގެ ޗެމްޕިއަންކަން ހޯދީ ދިވެހި ސިފައިންގެ ކްލަބެވެ. އެޓީމް ޗެމްޕިއަންކަން ހޯދީ ފައިނަލްގައި ސްޓެލްކޯއާއި ވާދަކޮށް ކުރި ހޯދައިގެންނެވެ. ފިރިހެން ޑިވިޝަންގެ ތިންވަނަ ޓީމަކީ އެމްޕީއެލްއެވެ.
ކަސްޓަމްސް ރެކްރިއޭޝަން ކްލަބް ޗެމްޕިއަންކަން ހޯދީ މުބާރާތުގެ ޓީމް އިވެންޓްގެ އަންހެން ޑިވިޝަންގެއެވެ. އެއީ ފައިނަލްގައި ސްޓެލްކޯ ބަލިކޮށްގެންނެވެ. މިބައިގެ ތިންވަނަ ހޯދީ ވެމްކޯއެވެ.
މުބާރާތުގެ އޯޕަންސް ފިރިހެން ސިންގަލްސް ޗެމްޕިއަންކަން ހޯދީ އެމްޕީއެލްގެ މުޙައްމަދު ދުންޔާޒްއެވެ. އޭނާ ފައިނަލްގައި ވާދަކުރީ އެމް.ޑަބްލިޔު.އެސް.ސީގެ އަލީ ނިމާލްއެވެ. މުބާރާތުގެ އަންހެން ސިންގަލްސް ޗެމްޕިއަންކަން ހޯދީ ކަސްޓަމްސް ރެކްރިއޭޝަން ކްލަބްގެ އައިމިނަތު ހަލީމް (ދިލް) އެވެ. ފައިނަލްގައި ދިލް ވާދަކުރީ ދިރާގުގެ އައިމިނަތު ލީނާއާއެވެ.
