ފިރިހެން ސިންގަލްސް ފައިނަލްގައި ޝާޒް އާއި ސާހިލް

ޤައުމީ ބިލިއާޑް މުބާރާތުގެ ފިރިހެން ސިންގަލްސްގެ ފުރަތަމަ ޑިވިޝަންގެ ފައިނަލަށް ޙަސަން ޝާޒް މުޙައްމަދު އާއި މުޙައްމަދު ސާހިލް ހަމީދު ދަތުރުކޮށްފިއެވެ.

މުބާރާތުގެ ފައިނަލުން ޝާޒް ޖާގަ ހޯދީ ސެމީ ފައިނަލްގައި މުޙައްމަދު އަކްސަމް ވަހީދު ބަލިކޮށްގެންނެވެ. އަކްސަމްގެ މައްޗަށް ޝާޒް ކުރި ހޯދީ 9-5 އިންނެވެ. ފައިނަލުން ސާހިލް ޖާގަ ހޯދީ ލުސަސް ބްރެކްޓްގައި އަކްސަމް ބަލިކޮށްގެންނެވެ. އެއީ 9-3 އިންނެވެ.

މުބާރާތުގެ ދެ ވަނަ ޑިވިޝަންގެ ފައިނަލްގައި ވާދަކުރާނީ އިސްލާއީލް ޝިޔާމް އާއި ހަސަން ރަޖޭޝް މުސާއެވެ. ޝިޔާމް ފައިނަލުން ފުރުސަތު ހޯދީ އިސްމާއިލް އައްފާން ޔޫސުފް 7-4 އިން ބަލިކޮށްގެންނެވެ. އަދި ފައިނަލުން ރަޖޭޝް ޖާގަ ހޯދީ 7-6 އިން ހާމިދު ފައިސަލް ބަލިކޮށްގެންނެވެ.

އަންހެން ޑިވިޝަންގެ ފައިނަލްގައި ވާދަކުރާނެ ކުޅުންތެރިން ވެސް ވަނީ ޔަގީންވެފައެވެ. މި ޑިވިޝަންގެ ފައިނަލްގައި ވާދަކުރާނީ އައިޝަތު އަލީ އާއި އާމިނަތު ހަލީމްއެވެ. ފައިނަލުން އައިޝަތު އަލީ ޖާގަ ހޯދީ 5-3 އިން އާމިނަތު އަޒްރާ ބަލިކޮށްގެންނެވެ. އަދި އާމިނަތު ހަލީމް ފައިނަލުން ޖާގަ ހޯދީ 3-5 އިން ދީމާ ހަމީދުގެ މައްޗަށް ކުރި ހޯދައިގެންނެވެ.

މި ތިން ޑިވިޝަންގެ ފައިނަލް މެޗުތައް ކުރިއަށްދާނީ އާދިއްތަ ދުވަހުގެ ރޭއެވެ. މިއަހަރުގެ މުބާރާތުގެ ވެސް ޓައިޓަލް ސްޕޮންސަރަކީ ލިޓަސްއެވެ. މިއީ ލިޓަސް އިން މުބާރާތުގެ ޓައިޓަލް ސްޕޮންސްރުކަން ނަގާ ދެ ވަނަ ފަހަރެވެ.