ނަތަންޔާހޫއާ ދެކޮޅަށް ކުރާ ކޮރަޕްޝަންގެ ދައުވާގައި ހޯމަ ދުވަހު ބާއްވަން އޮތް އަޑު އެހުން ވެސް ކެންސަލް ކޮށްފި
4 މެއި 2026 | ހޯމަ 10:05ކޯޓު އިދާރާގެ ބަޔާނަކާ ހަވާލާދީ ދަ ޓައިމްސް އޮފް އިޒްރޭލްގައި ބުނެފައިވާ ގޮތުގައި، ޤާނޫނީ ވަކީލު އަމިތު ހަދާދުގެ ފަރާތުން ރޭގަނޑުގެ ވަގުތުގައި ލިބުނު "އަޕްޑޭޓް" އަކާ ގުޅިގެން ހޯމަ ދުވަހުގެ އަޑު އެހުން ނުބާއްވާނެ. އިޒްރޭލްގެ ކޯޓުން މީޑިއާ އަށް މައުލޫމާތު ދެމުން ބުނެފައި ވަނީ، އެ މައްސަލައިގައި އިތުރު ތަފްސީލެއް ހާމަ ކުރެވެން ނެތް ކަމަށް.
މިދިޔަ އަހަރުގެ އޭޕްރީލް މަހުގެ ތެރޭގައި ތެލް އަވީވް ކޯޓުގައި ކުރިއަށް ދިޔަ އަޑު އެހުމުގައި ނަތަންޔާހޫ. | ރޮއިޓާސް
އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ ދެކޮޅަށް ކުރާ ކޮރަޕްޝަންގެ ދައުވާގައި، ހޯމަ ދުވަހު ބާއްވަން އޮތް ޝަރީއަތުގެ އަޑު އެހުން ވެސް ކެންސަލް ކޮށްފައިވާ ކަމަށް އިޒްރޭލްގެ މީޑިއާ ތަކުގައި ރިޕޯޓު ކޮށްފި އެވެ.
އިޒްރޭލްގެ މީޑިއާ ތަކުގައި ބުނެފައިވާ ގޮތުން، ހޯމަ ދުވަހުގެ އަޑު އެހުން ކެންސަލް ކުރަން ކޯޓުން ނިންމާފައި ވަނީ އާދީއްތަ ދުވަހުގެ ރޭގެ ވަގުތެއްގައި ނަތަންޔާހޫގެ ޤާނޫނީ ވަކީލުންގެ ފަރާތުން ކޯޓަށް މެސެޖެއް ފޮނުވާފައި ވަނިކޮށެވެ.
ކޯޓު އިދާރާގެ ބަޔާނަކާ ހަވާލާދީ ދަ ޓައިމްސް އޮފް އިޒްރޭލްގައި ބުނެފައިވާ ގޮތުގައި، ޤާނޫނީ ވަކީލު އަމިތު ހަދާދުގެ ފަރާތުން ރޭގަނޑުގެ ވަގުތުގައި ލިބުނު "އަޕްޑޭޓް" އަކާ ގުޅިގެން ހޯމަ ދުވަހުގެ އަޑު އެހުން ނުބާއްވާނެ އެވެ. އިޒްރޭލްގެ ކޯޓުން މީޑިއާ އަށް މައުލޫމާތު ދެމުން ބުނެފައި ވަނީ، އެ މައްސަލައިގައި އިތުރު ތަފްސީލެއް ހާމަ ކުރެވެން ނެތް ކަމަށެވެ.
ހޯމަ ދުވަހުގެ ހެނދުނު ނަތަންޔާހޫ ކޯޓަށް ހާޒިރުވެ، އޭނާއާ ދެކޮޅަށް ކޮށްފައިވާ ކޮރަޕްޝަންގެ މައްސަލައިގައި ސުވާލު ތަކަށް ޖަވާބުދާރީވާން އޮތީ ހަމަޖެހިފަ އެވެ. އޭނާއާ ދެކޮޅަށް މިހާރު ކޮށްފައިވާ ދައުވާތައް ސާބިތުވެ، މި މައްސަލައިގައި އޭނާ ކުށްވެރި ވެއްޖެ ނަމަ، 10 އަހަރު ދުވަހުގެ ޖަލު ޙުކުމެއް ނަތަންޔާހޫގެ މައްޗަށް އަންނާނެ ކަމަށް ވަނީ ލަފާ ކޮށްފަ އެވެ.
ނަތަންޔާހޫއާ ދެކޮޅަށް ކޮރަޕްޝަންގެ މައްސަލަތައް ކުރިއަށް ގެންދާއިރު، މި މައްސަލައިގެ އަޑު އެހުންތައް ވަނީ އެކި ފަހަރު މަތިން ކެންސަލް ކޮށްފަ އެވެ. އެގޮތުން އިޒްރޭލް އިން ޣައްޒާގައި ހިންގަމުން އަންނަ ހަނގުރާމަ އާއި، ސަލާމަތީ ސަބަބު ތަކަށްޓަކައި އެތައް ފަހަރެއްގެ މަތިން އަޑު އެހުންތައް ކެންސަލް ކޮށްފައިވެ އެވެ. މިއީ އިޒްރޭލްގެ ސިޔާސީ މަސްރަހުގައި ބޮޑު ސަމާލު ކަމެއް ލިބިފައިވާ ސީރިއަސް މައްސަލަ އަކަށް ވަނީ ވެފަ އެވެ.
ކޮރަޕްޝަންގެ ތުހުމަތުތައް ނަތަންޔާހޫގެ މައްޗަށް ކުރެވިފައި ވަނީ، އޭނާގެ ބޮޑު ވަޒީރު ކަމުގެ މަގާމު ބޭނުން ކޮށްގެން ނުފޫޒު ހިންގައި، ހަދިޔާ ބަލައި ގަތުުމާއި، އިޒްރޭލްގެ ބޮޑެތި ވިޔަފާރި ވެރިންގެ އަތުން ނާޖާއިޒު ގޮތުގައި މަންފާ ހޯއްދަވާފައިވާ ކަަމަށް ބުނެ އެވެ.
މި މައްްސަލައިގެ އަޑު އެހުންތައް ކޯޓުން ކެންސަލް ކުރަމުން އަންނައިރު، އެންމެ ފަހުން ނަތަންޔާހޫ ކޯޓަށް ހާޒިރުވެފައި ވަނީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ. އެ ދުވަހުގެ އަޑު އެހުމުގައި ނަތަންޔާހޫ ވަނީ އޭނާއާ ދެކޮޅަށް ކުރާ ތުހުމަތު ތަކަކީ ދޮގު ތުހުމަތު ތަކެއް ކަމަށާއި، އެެއީ ވާދަވެރި ސިޔާސީ ފަރާތްތަކުން އޭނާގެ އަގު ވައްޓާލުމަށް ކުރާ މަސައްކަތެއް ކަމަށް ވިދާޅުވެފަ އެވެ.
ހޯމަ ދުވަހުގެ އަޑު އެހުން ކެންސަލް ކުރުމަށް ފަހު، ދެން އަޑު އެހުމެއް ބާއްވާނެ ތާރީޚެއް ކޯޓުން މިހާތަނަށް ހާމަ ކޮށްފައި ނުވެ އެވެ.
މަސްދަރު: އަލް ޖަޒީރާ
