އެމްޑީޕީގެ ސިލްސިލާ މުޒާހަރާ: "މުޒާހަރާ ހުއްޓާ ނުލީމަ، މުޒާހަރާގެ ބައިވެރިންނަށް ދަނީ އަނިޔާކުރަމުން."

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކުރަމުންދާ މުޒާހަރާ ހުއްޓާ ނުލީމަ، އެކި މީހުންނަށް އެއްޗެހި ދީގެން، އެ މީހުންލައްވާ މުޒާހަރާގެ ބައިވެރިންނަށް ދަނީ އަނިޔާކުރަމުން ކަމަށް އެމްޑީޕީ އިން ބުނެފި އެވެ.

އާދީއްތަ ދުވަހުގެ ރޭ ބޭއްވި އެމްޑީޕީގެ މުޒާހަރާގައި ވާހަކަދައްކަވަމުން އެމްޑީޕީގެ ގައުމީ މަޖިލީހުގެ މެމްބަރު އަހުމަދު ސަލީމް (މާސް ސަލީމް) ވިދާޅުވީ ދައުލަތުގެ ބަޖެޓުން ވައްކަން ކުރާ މީހަކު ވެރިކަމުގައި ބަހައްޓަން ދިވެހީން ބޭނުން ނުވާ ކަަމަށެވެ. އާއްމުން ބުނަމުން ދަނީ ރައީސް ޑރ. މުހައްމަދު މުއިއްޒު އަށް ވެރިކަން ނުކުރެވޭ ވާހަކަ ކަމަށާއި އާއްމުން އެދެނީ ރައީސް މުއިއްޒު އިސްތިއުފާ ދެއްވާފައި ގެއަށް ވަޑައިގަތުން ކަމަށް ވެސް އޭނާ ވިދާޅުވި އެވެ.

Advertisement

އެމްޑީޕީ އިން ނުކުމެ ތިބީ ކައުންސިލް އިންތިޚާބާއި ނިމިދިޔަ ފެންނަ ނުފެންނަ އިންތިޚާބުގައި ރައްޔިތުން އިއްވި ބަހާއި އެއްގޮތަށް އަޑު އުފުލުމަށް ކަމަށް އޭނާ ވިދާޅުވި އެވެ. ނަމަވެސް މުޒާހަރާ އަށް ނުކުންނަ މީހުން ފަހަތަށް ޖެއްސުމަށް އެކި އުކުޅުތައް ސަރުކާރުން ބޭނުން ކުރާ ކަމަށް އޭނާ ވިދާޅުވި އެވެ.  މުޒާހަރާގެ ބައިވެރިންނަށް ބިރުދައްކާ އަނިޔާ ކުރަނީ މުޒާހަރާ ހުއްޓުވާލުމަށް ކަަމަށް ސަލީމް ވަނީ ތުހުމަތު ކުރައްވާފަ އެވެ.

"އެތައް ސަތޭކަ ފުލުހުންނެއް އެބަ ފޮނުވާ. އެކި މީހުންނަށް އެކި އެއްޗެހި ދީގެން އެބަ ފޮނުވާ މުޒާހަރާގެ ބައިވެރިންނަށް އަނިޔާ ކުރުމަށް." އޭނާ ވިދާޅުވި އެވެ. 

ސަލީމް އިތުރަށް ވިދާޅުވީ އެމްޑީޕީ އިން ތިބީ ފަހަތަށް ޖެހި ޖެހިލުންވާ ގޮތަށް ނޫން ކަަމަށެވެ. މި މުޒާހަރާތައް ކޮންޓްރޯލް ކުރުމަށް ފުލުހުން އާދަޔާއި ޚިލާފަށް ބާރުގެ ބޭނުންކުރަމުން ކަމަށް ވެސް އޭނާ ވަނީ ވިދާޅުވެފަ އެވެ. 

އެމްޑީޕީ އިން މި މުޒާހަރާތައް ފަށާފައި ވަނީ އެޕްރިލް މަހުގެ 4 ވަނަ ދުވަހު އެވެ. މި މުޒާހަރާތަކުގައި އެމްޑީޕީ އިން ދަނީ ބާރަ ޑިމާންޑެއް ކުރަމުންނެވެ. އޭގެ ތެރޭގައި ކޮރަޕްޝަން ނައްތާލުމާއި، މިނިވަން މުއައްސަސާތަކާއި މަޖިލީސް މިނިވަން ކުރުމާއި ގުޅުން ހުރި ޑިމާންޑްތައް ހިމެނެ އެވެ.