އާސާރީ ތަރިކައިގެ މިސްކިތްތަކުގެ ލިސްޓަށް '' ބަންޑާރަ މިސްކިތް '' ހިމެނިފައިވޭތޯ ކުރި ސުވާލަށް މިނިސްޓަރު ހީނާއަށް ޖަވާބެއް ނުދެއްވުނު!
ހެރިޓޭޖް މިނިސްޓަރު ހީނާ ވިދާޅުވީ، ބަންޑާރަ މިސްކިތް ހުރި ބިމުގައި އައު މިސްކިތެއް ބިނާކުރުމަށް ސަރުކާރުން ނިންމުމާ ގުޅިގެން އާންމުންގެ ފާޑުކިޔުން އަމާޒުވެފައިވާތީ، އެކަމުގައި އިސްލާމިކް މިނިސްޓްރީއާއެކު މަޝްވަރާ ކުރާނެ ކަމަށް. ތާރީޚީ ގޮތުން މުހިންމު މި ބިނާ ތަޅާލުމާ ދެކޮޅަށް ގިނަ ބަޔަކު އަޑުއުފުލަމުންދާއިރު، އާސާރީ ތަންތަނަށް ގެއްލުންވާނެ އެއްވެސް ކަމެއް ސަރުކާރުން ނުކުރާނެ ކަމުގެ ޔަގީންކަން މިނިސްޓަރު ވަނީ ދެއްވާފައި. ނަމަވެސް ސީދާ ސުވާލަށް ޖަވާބު ދެއްވާފައިނުވޭ.
ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން. | ޔުމްނާ މައުމޫން
ރާއްޖޭގެ އާސާރީ ތަރިކައިގެ މިސްކިތްތަކުގެ ލިސްޓަށް '' ބަންޑާރަ މިސްކިތް '' ހިމެނިފައިވޭތޯ ކުރި ސުވާލަށް ސީދާ ޖަވާބު ނުދެއްވައި، މި މިސްކިތާ ގުޅިގެން އުފެދިފައިވާ ހިޔާލުތަފާތުވުންތަކާ ގުޅޭގޮތުން އިސްލާމިކް މިނިސްޓްރީއާއެކު މަޝްވަރާ ކުރާނެ ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ހީނާ ވަލީދު ވިދާޅުވެއްޖެ އެވެ.
އާދިއްތަ ދުވަހުގެ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ބަންޑާރަ މިސްކިތް ހުރި ބިމުގައި ޒަމާނީ ބޮޑު މިސްކިތެއް އަޅަން ނިންމުމާއި ގުޅިގެން އާއްމުންގެ ވަރަށް ބޮޑެތި ފާޑު ކިޔުންތައް އަމާޒުވިކަން ފާހަގަކޮށްފަ އެވެ. އަދި ބަންޑާރަ މިސްކިތް ހުރި ތަނުގައި އައު މިސްކިތެއް އަޅަން ނިންމީ ރާއްޖޭގެ އާސާރީ ތަރިކައިގެ މިސްކިތްތަކުގެ ލިސްޓުގައި އެ މިސްކިތް ހިމެނިފައިނުވާތީ ކަމަށް އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވެފައިވާތީ އެކަމަށް އިޝާރާތް ކޮށް ނޫސްވެރިޔާ ވަނީ ރާއްޖޭގެ އާސާރީ ތަރިކައިގެ މިސްކިތްތަކުގެ ލިސްޓުގައި ބަންޑާރަ މިސްކިތް ހިމެނިފައިނުވޭތޯ ސުވާލު ކޮށްފަ އެވެ. އަދި ނުވާ ކަމުގައިވާ ނަމަ އެ ލިސްޓުގައި އެމިސްކިތް ހިމެނުމުގެ އެއްވެސް ވިސްނުމެއް ނުގެންގުޅެންތޯ ސުވާލު ކޮށްފައިވެ އެވެ.
މި ސުވާލުތަކަށް މިނިސްޓަރު ހީނާ ސީދާ ޖަވާބެއް ދެއްވާފައިނުވެ އެވެ.
މިނިސްޓަރު ހީނާ ވިދާޅުވީ، މިމައްސަލައާ ގުޅިގެން އިސްލާމިކް މިނިސްޓްރީއާއެކު މަޝްވަރާ ކުރާނެ ކަމަށާއި، ތަރިކައާއި ސަގާފަތާއި ނުވަތަ މިފަދަ މުހިންމު ތަންތަނަށް ގެއްލުންވާ ގޮތަށް އެއްވެސް ކަމެއް ސަރުކާރުން ނުކުރާނެ ކަމަށެވެ.
ދިވެހިރާއްޖޭގެ ތަރަކައާއި ސަގާފަތާއި ނުވަތަ މިފަދަ މުހިންމު ތަންތަނަށް ގެއްލުންވާ ގޮތަށް އެއްވެސް ކަމެއް ސަރުކާރަކުން ކުރިއަށް ނުގެންދަވާނެ އެނގޭތޯ. އެހެންނަމަވެސް ތިމައްސަލާގައި އަޅުގަނޑުމެން އިތުރަށް އިސްލާމިކް މިނިސްޓްރީއާއެކު ވާހަކަ ދައްކާ އެއަށް ހޯދަން ޖެހޭ މުހިންމު ހައްލުތައް އިރާދަކުރެއްވިއްޔާ ހޯދާނަން އެނގޭތޯ.މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ހީނާ ވަލީދު
ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުންނަ ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް މިނިސްޓަރު ޝަހީމް ހާމަ ކުރެއްވީ 6 މާރޗް 2026 ގަ އެވެ.
އެކްސްގައި މިނިސްޓަރު ޝަހީމް ކުރެއްވި ޕޯސްޓުގައި ވިދާޅުވީ، އެ ތަނުގައި އާ މިސްކިތެއް އެޅުމުގެ މަސައްކަތް ކުރުމަށް ނިންމާފައި ވަނީ ރޯދަމަހުގެ ފަހުން ކަމަށާއި، އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށެވެ.
ނަމަވެސް މިކަމަށް ގިނަ ބަޔަކު ދެކޮޅު ހަދައި، މިސްކިތް ހިމާޔަތް ކުރުމަށް ގޮވާލާފައިވެ އެވެ. އަދި ތާރީހު ދިރާސާ ކުރައްވާ ބޭފުޅެއް ކަމަށްވާ ނާޖިހު ދީދީ ވިދާޅުވީ، މިއީ ކޮށްގެންވާނެ ކަމެއް ނޫން ކަމަށާއި، އެތަނަކީ ރާއްޖޭގެ ޚާއްސަ ތާރީޚީ ކަމަކާ ގުޅުން ހުރި އަދި މިހާރު 98 އަހަރުވެފައިވާ ތަނެއް ކަމަށެވެ.
މީގެ އިތުރުން މި މިސްކިތް ތާރީޚީ ތަނެއްގެ ގޮތުގައި ހިމާޔަތްކުރަން މަޖިލީހަށް އީޕެޓިޝަނެއް ވެސް ވަނީ ހުށަހަޅާފަ އެވެ.
