ހީނާއާ ގުޅޭ ތުހުމަތުތަކަކީ ދޮގެއް ކަމަށް ކަމާގުޅޭ އިދާރާތަކުން ނިންމާފައިވާ ކަމަށް ވިދާޅުވެ، ރައީސް ބޮޑު ދޮގެއް ހައްދަވައިފި!
22 އެޕްރީލު 2026 | ބުދަ 10:17އެންސްޕާގެ ފައިސާއިން އެމްއެމްޓީވީ އުފެއްދިކަމަށް ކުރެވޭ ތުހުމަތުތަކުގައި ހީނާ ވަލީދުގެ ކޮރަޕްޝަނެއް ނެތްކަމަށް އޭސީސީން ނިންމާފައިވާކަމަށް ރައީސް ޑރ. މުއިއްޒު ވިދާޅުވެއްޖެ. ނަމަވެސް، އޭސީސީން ބުނެފައިވަނީ އެ މައްސަލައިގެ ތަހުގީގު އަދިވެސް ކުރިއަށްދާ ކަމަށް. މި މައްސަލައަކީ ދައުލަތުގެ ފައިސާ ނަހަމަ ގޮތުގައި ބޭނުންކޮށްގެން މީޑިއާ ހައުސްއެއް އުފެއްދިކަމަށް ބުނެ ހުށަހަޅާފައިވާ ސީރިއަސް މައްސަލައެއް.
ރައީސް ޑރ މުޙައްމަދު މުއިއްޒު. | ރައީސް އޮފީސް
އެންސްޕާގެ ފައިސާއިން އެމްއެމްޓީވީ އުފެއްދިކަމުގެ ތުހުމަތުކުރެވޭ މައްސަލައިގައި އޭރުގެ އެންސްޕާގެ ސީއީއޯ ހީނާ ވަލީދުގެ ކޮރަޕްޝަނެއް ނުހިމެނޭ ކަމަށް ކަމާބެހޭ އިދާރާތަކުން ނިންމާފައިވާ ކަމަށް ވިދާޅުވެ ރައީސް ޑރ މުޙައްމަދު މުއިއްޒު ބޮޑު ދޮގެއް ހައްދަވައިފި އެވެ.
ރައީސް އެހެން ވިދާޅުވީ ހޯމަ ދުވަހު އޮތް ނޫސްވެރިންގެ ބައްދަލުވުމެއްގަ އެވެ. އެގޮތުން ނޫސްވެރިއަކު ވަނީ ހީނާގެ މައްޗަށް ކޮރަޕްޝަންގެ ތުހުމަތު ކުރެވޭއިރު ސަރުކާރުގެ ވުޒާރާއެއްގެ ވަޒީރުކަން ދެއްވާފައިވާތީ ހީނާގެ ނަޒާހަތްތެރިކަމާ ގުޅޭގޮތުން ސުވާލުކޮށްފަ އެވެ.
ނޫސްވެރިޔާ ކުރި ސުވާލުގައި ވަނީ ހީނާ އެންސްޕާގައި ހުންނެވިއިރުވެސް ތުހުމަތުތަކެއް އަމާޒުވިކަން ފާހަގަކޮށް، އޮފީސް ހިންގުމަށް ބޮޑުއަގުގައި އެމްއެމްޓީވީއަށް ކުއްޔަށް ދިން ތުހުމަތު އޭގެ ތެރޭގައި ހިމެނޭކަން ބަޔާންކޮށްފަ އެވެ. އަދި ކުޑަކުއްޖަކު ނިޔާވި މައްސަލައިގައި ވެސް ހީނާގެ މައްޗަށް އިހުމާލުގެ ތުހުމަތުތަކެއް އަމާޒުވިކަން ނޫސްވެރިޔާ ފާހަގަކުރި އެވެ.
އެ ސުވާލުގެ ޖަވާބުގައި ރައީސް ވިދާޅުވީ އެ މައްސަލަ ބެލުމަށްފަހު، ހީނާގެ މައްސަލައެއް ނެތްކަމަށް ކަމާ ގުޅުންހުރި އިދާރާއިން ބުނެފައިވާ ކަމަށެވެ.
ހަމަ ހުސް ދޮގު ހަދައިގެންވެސް ތުހުމަތެއް ކުރެވޭނެ، ދެންމެ ހީނާއާ ބެހޭގޮތުން ތި ވިދާޅުވި ވާހަކަތައް، އެކަމާ ގުޅޭ ފަރާތްތަކުން ބައްލަވާފައި ވިދާޅުވެއްޖެ ހަމަ ކަނޑައެޅިގެން ދޮގު ވާހަކަތަކެއްކަން އެއީ.ރައީސް ޑރ މުޙައްމަދު މުއިއްޒު
ރައީސް އެ ވިދާޅުވި ބަސްފުޅާ ގުޅޭގޮތުން އިތުރަށް މައުލޫމާތު ސާފު ކުރުމަށް ރާއްޖެއެމްވީން ސަރުކާރުގެ ތަރުޖަމާނާވެސް ސުވާލުކޮށްފައިވާނެ އެވެ. އެގޮތުން ހީނާއާ އެމްއެމްޓީވީއާ ގުޅުވައި ކުރެވޭ ތުހުމަތުގައި ރައީސް އެ ވިދާޅުވީ ކޮން އިދާރާއަކުން މައްސަލަ ނިންމި ވާހަކަތޯ ސުވާލު ކުރުމުން ތަރުޖަމާނު ވިދާޅުވީ، އެއީ އޭސީސީގެ ވާހަކަ ކަމަށެވެ.
އެހެންނަމަވެސް އޭސީސީން އެ މައްސަލައިގެ ތަހުގީގު ނިންމިކަމެއް މިހާތަނަށް ހާމަކޮށްފައި ނުވާއިރު، އެ މައްސަލައިގެ އަދާހަމަ ހޯދުމަށް ރާއްޖެއެމްވީން ސުވާލުކުރުމުން އޭސީސީގެ މީޑިއާ އޮފިޝަލު ވިދާޅުވީ، އެ މައްސަލައިގެ ތަހުގީގު އަދިވެސް ކުރިއަށްދާކަމަށެވެ.
އޭސީސީއަށް ހުށަހެޅިފައިވާ މި މައްސަލައިގައި ބުނެފައިވަނީ، 2024 ވަނަ އަހަރުގެ ތެރޭގައި ނޭޝަނަލް ޕުރޮޓެކްޝަން އެޖެންސީ (އެންސްޕާ) ގެ ފައިސާ އިން މޯލްޑިވްސް މީޑިޔާ ހައުސް ޕުރައިވެޓު ލިމިޓެޑް ގެ ދަށުން އެމްއެމްޓީވީ ނަމަކަށް ކިޔާ ޓީވީ ސުޓޭޝަނެއް އުފެއްދިކަމުގެ ތުހުމަތު ކުރެވިފައިވާ ކަމަށެވެ.
ހީނާއާ ގުޅުވައި ރައީސްއާ ސުވާލު އަމާޒުވީ އެމްއެމްޓީވީގެ މައްސަލައާ ކުޑަ ކުއްޖަކު ނިޔާވި މައްސަލައާ ގުޅުވައެވެ، ވީއިރު އެއިން އެއްވެސް މައްސަލައެއްގެ ތަހުގީގު މިހާތަނަށް ނިމިފައިނުވާއިރު، އެއީ ކަނޑައެޅިގެން ދޮގުތަކެއްކަމަށް ކަމާބެހޭ އިދާރާތަކުން ނިންމާފައިވާކަމަށް ވިދާޅުވެ ރައީސް ހެއްދެވީ އިތުރުފުޅެއްކަން މިވަނީ ހާމަވެފަ އެވެ.
