ރައީސް އޮފީހުގެ ޗީފް ގަވަރންމަންޓް ސްޕޯކްސްޕާސަންކަމުގެ މަޤާމަށް މުންދު
ރައީސް އޮފީހުގެ ސްޕޯކްސްޕާސަންގެ މަގާމުގައި ހުންނެވި ހީނާ ވަލީދު މިނިސްޓަރުކަމަށް ބަދަލުކުރެއްވުމާ ގުޅިގެން، އެ މަގާމަށް މިނިސްޓަރުންގެ ފެންވަރުގައި މުޙައްމަދު ޙުސައިން ޝަރީފް (މުންދު) މިއަދު އައްޔަންކުރައްވައިފި. މުންދު މި މަގާމަށް އައްޔަންކުރެއްވިއިރު، އޭނާ އެންމެ ފަހުން ހުންނެވީ ޔޫއޭއީގައި ހުންނަވާ ދިވެހި ސަފީރުގެ މަގާމުގައި. މީގެ ކުރިންވެސް ސަރުކާރުގެ މަތީ މަގާމުތަކާއި ތަރުޖަމާނުކަން ކުރައްވާފައިވާ މުންދު ސަފީރުކަމުން ވަކިކުރީ އޭނާގެ އާއިލީ ބޭފުޅެއްގެ އޯޑިއޯއެއް ލީކުވި މައްސަލައެއްގައި.
ރައީސުލްޖުމްހޫރިއްޔާގެ އޮފީހުގެ ޗީފް ގަވަރންމަންޓް ސްޕޯކްސްޕާސަންކަމުގެ މަޤާމަށް މިނިސްޓަރުންގެ ފެންވަރުގައި އައްޔަން ކުރެއްވި މުޙައްމަދު ޙުސައިން ޝަރީފް (މުންދު) | ރައީސް އޮފީސް
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ރައީސުލްޖުމްހޫރިއްޔާގެ އޮފީހުގެ ޗީފް ގަވަރންމަންޓް ސްޕޯކްސްޕާސަންކަމުގެ މަޤާމަށް މިނިސްޓަރުންގެ ފެންވަރުގައި، މ. ކޮތަންމާގެ، މުޙައްމަދު ޙުސައިން ޝަރީފް (މުންދު) ޢައްޔަންކުރައްވައިފި އެވެ.
މުންދު އެ މަގާމަށް އައްޔަން ކުރެއްވީ، ރައީސް އޮފީހުގެ ސްޕޯކްސްޕާސަންގެ މަގާމުގައި ހުންނެވި ހީނާ ވަލީދު މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖްގެ މަގާމަށް އަންގާރަ ދުވަހު އައްޔަން ކުރެއްވުމާއި ގުޅިގެން އެ މަގާމް ހުސްވެފައިވާތީ އެވެ. މުންދު ސްޕޯކްސްޕާސަންގެ މަގާމަށް އައްޔަން ކުރެއްވުމުގެ ކުރިން ހުންނެވީ ޔޫއޭއީގައި ރާއްޖެ ތަމްސީލްކުރައްވާ ދިވެހި ސަފީރުގެ މަގާމުގަ އެވެ.
މުންދު އެ މަގާމުން ވަކިކުރީ 6 އެޕްރީލްގައި، މުންދުގެ މަންމަ އަދި ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ސަރުކާރާ ދެކޮޅަށް ދެއްވި ވާހަކަތަކެއް ހިމެނޭ އޯޑިއޯއެއް ލީކުވުމާއި ގުޅިގެންނެވެ. އަދި އޭނާއެކު ޖެނީވާ އަށް ރާއްޖެއިން ކަނޑައަޅުއްވާފައިވާ ދާއިމީ މަންދޫބު ޑރ. ސަލްމާ ރަޝީދު ވެސް މަގާމުން ވަކިކުރި އެވެ. ސަލްމާ އަކީ މެންބަރު އަސްމާގެ ކޮށްކޮ އެކެވެ. ފަހުން ސަލްމާގެ މަގާމު ވަނީ އިއާދަކޮށްފަ އެވެ.
މީގެ ކުރިން މުޙައްމަދު ޙުސައިން ޝަރީފް ވަނީ، ވަޒީރުންގެ މަޖިލީހުގެ މެންބަރުކަމާއި ބޭރުގެ އެކިއެކި ޤައުމުތަކަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމުގެ މަޤާމުތައް އެކި ދުވަސްވަރު ފުރުއްވާފަ އެވެ. މީގެ އިތުރުން މުޙައްމަދު ޙުސައިން ޝަރީފް ވަނީ، ރައީސުލްޖުމްހޫރިއްޔާގެ އޮފީހުގެ ޗީފް ގަވަރންމަންޓް ސްޕޯކްސްމަންކަން 2005 ން 2007 ށް އަދި ޕްރެޒިޑެންޝަލް ސްޕޯކްސްޕަރސަންކަމުގެ މަޤާމު 2007 ން 2008 ށް ފުރުއްވުމުގެ އިތުރުން ރައީސުލްޖުމްހޫރިއްޔާގެ އޮފީހުގެ ސްޓްރެޓީޖިކް ކޮމިއުނިކޭޝަންސް ޔުނިޓް އުފެދިގެން އައި ދުވަސްވަރު އެ މަސައްކަތުގައިވެސް މުހިންމު ދައުރެއް އަދާކުރައްވާފަ އެވެ. އެމަނިކުފާނު އެންމެ ފަހުން އަދާކުރައްވާފައިވަނީ އެކުވެރި ޢަރަބި ޢިމާރާތަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމުގެ މަޤާމެވެ.
