ތިލަމާލެ މަޝްރޫއާ ގުޅޭގޮތުން ރައީސް މުއިއްޒު ދެއްވި ހިތްދަތި ޖަވާބު!

ރިޔާސީ އިންތިޚާބުގެ ކެމްޕޭން ދުވަސްވަރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނުގެ ކެމްޕޭނު ބިނާކުރެއްވި އެއް އަސާސަކީ، ކުރީގެ ސަރުކާރުން ތިލަމާލެ ބްރިޖް މަޝްރޫޢު ކުރިއަށްގެންދިޔަ ގޮތަށް ފާޑުވިދާޅުވުމެވެ. އެމަނިކުފާނު އެ ދުވަހު ވިދާޅުވީ، ބެލްކަނީގައި ހުންނަވައިގެން، ބްރިޖުގެ މަސައްކަތް ކުރިއަށްދާ މަންޒަރު ބަލާއިރު، އެއްވެސް ކުރިއެރުމެއް އަންނަތަން ފެނިވަޑައިނުގަންނަވާ ކަމަށެވެ. މިދިޔަ ސަރުކާރުގައި އެ މަސައްކަތް އޮތީ އެއްކޮށް ހުއްޓިފައި ކަމަށް އެމަނިކުފާނު އޭރު ވިދާޅުވިއެވެ.

އެހެންނަމަވެސް، ރައީސް މުއިއްޒުގެ ވެރިކަމަށް ދެ އަހަރު ވެގެންދާއިރު، ބްރިޖްގެ މަސައްކަތް ފެންނަނީ ކުރިންވެސް އޮތް ގޮތަށެވެ. އެކަން ހޯމަ ދުވަހުގެ ނޫސްވެރިންގެ ބައްދަލުވުމުގައި ހުދު އެމަނިކުފާނުވެސް އެއްބަސްވެވަޑައިގެންނެވިއެވެ.

އެހެންނަމަވެސް އެ މަޝްރޫއު ނިންމެވުމާމެދު ކުރިން ފެނުނު ސާބިތުކަމުގެ ބަދަލުގައި މިހާރު ފެންނަނީ ދޫދިނުމެވެ. ކުރިން ވަރަށް ސާފު ބަހުރުވައިން މަސައްކަތް ލަސްވުން ކުށްވެރިކުރެއްވި ރައީސް، މިއަދު އެއްބަސްވެވަޑައިގަންނަވަނީ މަޝްރޫޢު ކުރިއަށްދަނީ ލަސްކޮށް ކަމަށެވެ.

މަސައްކަތް ލަސްވާކަން ގަބޫލުކުރެއްވުމުގެ އިތުރުން، އެމަނިކުފާނު މިއަދު ވާހަކަފުޅު ދައްކަވަނީ އެއީ އެމަނިކުފާނުގެ ބާރުގެ ދަށުގައި އޮތް ކަމެއް ނޫންކަމަށް ދޭހަވާ ފަދަ މޭރުމަކުންނެވެ. އެމަނިކުފާނު ވިދާޅުވާ ގޮތުގައި، ކޮންޓްރެކްޓަރު ދަނީ އެއް ތާރީޚަށްފަހު އަނެއް ތާރީޚު ދެމުންނެވެ. އަދި ސަރުކާރުން މި ފެންނަނީ އެ ތާރީޚުތަކަށް އިންތިޒާރުކުރަމުންދާ މަންޒަރެވެ. އެއްވެސް އާރެއް ބާރެއް ނެތް، ކުރެވޭނެ ހަމަ އެއްވެސް ކަމެއް ނެތް ހާލުގައެވެ.

ރައީސް ވިދާޅުވީ، އެ މަސައްކަތް ކުރިއަށްދާ ސްޕީޑާ މެދު އެމަނިކުފާނު ހިތްހަމަޖެހިވަޑައިނުގަންނަވާ ކަމަށާއި، ނަމަވެސް ކުރެވޭނެ ކަމެއް ނެތް ކަމަށެވެ. ރިޔާސީ ބަޔާނުގައިވެސް އެ ވާހަކަ ނުގެންނެވީ އެ މަސައްކަތް ކުރިއަށް ނުދާތީކަމަށް ރައީސް އިއުތިރާފުވެވަޑައިގެންނެވިއެވެ.

ހަމަ ޔަޤީނުންވެސް އަޅުގަނޑު ހިތްހަމައެއް ނުޖެހޭ ދާ ސްޕީޑާ ދޭތެރޭގައެ، ހިތެއް ނުބުނޭ އެއްގޮތަކަށްވެސް އެ ޕްރޮޖެކްޓު ދާ ސްޕީޑު ކަމުދާ އެއްވެސް ރައްޔިތަކު ހުންނާނެއެކޭވެސް، ދެން އެހެނަސް އެ ޕްރޮޖެކްޓް އެބަ ހިނގާ، ދެން ސަރުކާރުން ކޮށްދޭން ޖެހޭ ކަމެއް އެބަ ކޮށްދެން، ދެން އަޅުގަނޑު މިދިޔަ އަހަރު ރިޔާސީ ބަޔާނުގައި ޑޭޓެއް ދިނިން، ދެން އެޑޭޓު ދިމަލެއް ނުވޭ، އަޅުގަނޑުމެން ކުރާނެ ކަމެއް ނެތް އެޔަކު، ދެން މިފަހަރު ރިޔާސީ ބަޔާނުގައި ނުވެސް ގެންނަން އެބައި އެހެންވެ، ދެން ޕްރޮޖެކްޓް ނިމުނީމާ ވަރަށް އުފާކުރާނަން، ދެން ސަރުކާރުން ކޮށްދޭންޖެހޭ ކަމެއް ކޮށްދެމެން މިދަނީ، ދެން މިހާރު ޑޭޓް އެބަ ދޭ 2027 އަށް، ކުރިން އޮތީ 2026.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އެހެންކަމުން ރައީސް މި ދެއްކެވި ވާހަކަފުޅަށް ބަލާއިރު، ފެންނަން އޮތީ ފިނޑި، ފަސްޖެހޭ ސަރުކާރެއްގެ ސިފަތަކެވެ. ރައީސްގެ މި ވާހަކަފުޅުން ދޭހަވަނީ، އެމަނިކުފާނަކީ ކަންކަން ތަރުތީބުކޮށް ހިންގަވާ ބޭފުޅަކަށްވުރެ ބޮޑަށް، ކަންކަން ހިނގާގޮތް ބައްލަވަން ހުންނެވި ބާރެއް ނެތް ބޭފުޅެއްގެ ގޮތުގައެވެ. ވީއިރު އުފެދޭ ސުވާލަކީ ދައުލަތުގެ އެންމެ މަތީ ވެރިޔާ ވާހަކަފުޅު ދައްކަވަނީ ކޮންޓްރެކްޓަރެއްގެ މައްޗަށް ބާރު ނުފޯރުވޭ ފަދަ ގޮތަކަށް ކަމަށްވާނަމަ، ޒިންމާދާރުކުރުވުމުގެ އަސާސް އޮތީ ކޮންތާކު ހެއްޔެވެ؟ މަސައްކަތުގެ ދުވެލި ކަނޑައަޅަނީ ކޮންޓްރެކްޓަރު ކަމަށްވާނަމަ، ސަރުކާރުގެ ބާރުވެރިކަން އޮތީ ކޮންތާކު ހެއްޔެވެ؟

މިއީ ގައުމެއްގެ އެންމެ މަތީ ވެރިޔާގެ ފަރާތުން ފެންނަންޖެހޭނެ އުސޫލެއް ނޫނެވެ.

ރައީސަކީ ގައުމީ ތަރައްގީގެ މަސައްކަތްތައް ބަލަން ހުންނަ ބޭރު މީހެއް ނޫނެވެ. އެމަނިކުފާނަކީ މޫސުން ލަފާކުރާ މީހަކު ފަދައިން، މަސައްކަތް ލަސްވާ ވާހަކަ ރިޕޯޓުކުރަން ހުންނަވާ ބޭފުޅެއް ނޫނެވެ. އެމަނިކުފާނަކީ ގައުމީ މަޝްރޫޢުތައް ކުރިއަށްދާކަން ކަށަވަރުކުރުމާއި، އެއްބަސްވުންތަކަށް އަމަލުކުރެވޭކަން ކަށަވަރުކުރުމާއި، އަދި ރައްޔިތުންގެ އުންމީދުތައް ހަގީގަތަކަށް ހެއްދެވުމުގެ ޒިންމާއާ ޙަވާލުވެ ހުންނެވި ފަރާތެވެ.

ކުރީ ސަރުކާރުގެ ނުކުޅެދުންތެރިކަން ދެއްކުމަށް ބޭނުންކުރި ހަމަ އެ މަޝްރޫޢު، މިއަދު މިވަނީ މިހާރުގެ ސަރުކާރުގެ އުނިކަން ފެންނަ ލޯގަނޑަކަށް ބަދަލުވެފައެވެ. އަދި ހަރުދަނާ ފިޔަވަޅުތަކެއްގެ ބަދަލުގައި، އާންމު ރައްޔިތުންނަށް އިވެނީ އުންމީދު ކަނޑާލާފައިވާ ފަދަ ވާހަކަތަކެކެވެ.