ޔަމަނުގެ ހަތިޔާރު އެޅި ބަޔަކު ތެޔޮ ޓޭންކަރެއް ހައިޖެކްކޮށްފި
ޔަމަނުގެ ކޯސްޓްގާޑުން މިހާރު ދަނީ ހައިޖެކްކުރި ޓޭންކަރު އޮތް ސަރަހައްދު ދެނެގަނެ، އެ އުޅަނދުގެ ހަރަކާތްތައް ވަރަށް ގާތުން މޮނިޓަރ ކުރަމުން. މީގެ އިތުރުން، އުޅަނދު އަނބުރާ ހޯދުމަށާއި އޭގައި ތިބި ފަޅުވެރިންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ފިޔަވަޅުތައް އެޅުމުގެ މަސައްކަތް ކަމާބެހޭ އިދާރާތަކުން ދަނީ ކުރަމުން.
ޔަމަނުގެ ކޯސްޓްގާޑުން ހާމަކޮށްފައިވާ ގޮތުގައި، އެ ގައުމުގެ ޝަބްވާ ޕްރޮވިންސްގެ އައްސޭރިފަށުން "އެމް/ޓީ ޔުރީކާ" ނަމަކަށް ކިޔާ ތެޔޮ އުފުލާ ޓޭންކަރެއް ވަނީ ހައިޖެކް ކޮށްފައި. | އެކްސް
ޔަމަނުގެ ޝަބްވާ ޕްރޮވިންސްގެ އައްސޭރިފަށުން "އެމް/ޓީ ޔުރީކާ" ނަމަކަށް ކިޔާ ތެޔޮ އުފުލާ ޓޭންކަރެއް، ހަތިޔާރު އެޅި ބަޔަކު އަރައި ހައިޖެކް ކުރިކަން އެ ގައުމުގެ ކޯސްޓްގާޑުން ހޮނިހިރު ދުވަހު ހާމަކޮށްފިއެވެ.
ކޯސްޓްގާޑުން މައުލޫމާތު ދޭ ގޮތުގައި، ކޮން ބައެއްކަން ނޭނގޭ މި ހަތިޔާރު އެޅި ގްރޫޕުން ވަނީ އުޅަނދަށް އަރައި އޭގެ ކޮންޓްރޯލް އަތުލައިގަތުމަށްފަހު، ސޯމާލިއާގެ ކަނޑުގެ ސަރަހައްދަށް މިސްރާބު ހުންނަ ގޮތަށް ގަލްފް އޮފް އަދަންއާ ދިމާލަށް އުޅަނދު ދުއްވާފައެވެ.
ޔަމަނުގެ ކޯސްޓްގާޑުން އިތުރަށް ބުނީ، ހައިޖެކް ކުރި މި ޓޭންކަރު މިހާރު އޮތް ސަރަހައްދު ދެނެގަނެވިފައިވާ ކަމަށާއި، އުޅަނދުގެ ހަރަކާތްތައް މޮނިޓަރ ކުރުމުގެ މަސައްކަތް ކުރަމުންދާ ކަމަށެވެ. އަދި އުޅަނދު އަނބުރާ ހޯދުމަށާއި، އޭގައި ތިބި ފަޅުވެރިންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ކަންކަން މިހާރު ކުރަމުންދާ ކަމަށްވެސް ކޯސްޓްގާޑުން ބުނެފައިވެއެވެ.
