ޔަމަންގެ މައްސަލައިގައި ރޫބިއޯ އާއި ސައުދީގެ ފޮރިން މިނިސްޓަރު މަޝްވަރާ ކުރައްވައިފި

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި، ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރުޙާން މަޝްވަރާ ކުރައްވައިފި އެވެ. 

އަންގާރަ ދުވަހު އެމެރިކާގެ ސްޓޭޓް ޑިޕާޓްމަންޓް އިން ބުނެފައި ވަނީ، ރޫބިއޯ އާއި ޕްރިންސް ފައިސަލްގެ މަޝްވަރާ ތަކުގައި ވަނީ ޔަމަންގައި އޮތް "ޓެންޝަކް" ތަކާއި، ސަރަހައްދީ ސަލާމަތާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމަށެވެ. 

ރޫބިއޯ އާއި ޕްރިންސް ފައިސަލް މަޝްވަރާ ކުރައްވާފައި މި ވަނީ، ޔަމަންގައި އޮތް އަސްކަރީ ޙަރަކާތްތައް ނިމުމަކަށް ގެންނަން ޔުނައިޓެޑު އަރަބް އެމިރޭޓްސް (ޔޫއޭއީ) އިން ނިންމި ދުވަހު އެވެ. އެ ޤައުމުން ބުނެފައި ވަނީ، އެއީ އެ ޤައުމުން އަމިއްލަ އަށް ނިންމާފައިވާ ނިންމުމެއް ކަމަށެވެ. 

އޭގެ ގަޑިއިރު ތަކެއް ކުރިން އަރަބި ކޯލިޝަން އިން ވަނީ ޔަަމަންގެ މުކައްލާ ބަނދަރަށް އަމާޒުކޮށް ހަމަލާއެއް ދީފަ އެވެ. އެ ކޯލިޝަން އިން ބުނެފައިވާ ގޮތުގައި، އެ ހަމަލާ ދީފައި ވަނީ ބޭރުގެ ސިފައިންގެ އެހީތެރިކަން ލިބޭ ތަންތަނަށެވެ. މިއީ ހަދުރަމައުތު ސަރަހައްދުގައި، ސަދާން ޓްރާންޒިޝަނަލް ކައުންސިލް އިން ސިފައިންގެ ޙަރަކާތްތައް ހިންގުމާ ދެކޮޅަށް އެ ކޯލިޝަން އިން އިންޒާރު ދިން ފަހުން ދީފައިވާ ހަމަލާ އެކެވެ. 

އެ ކޯލިޝަންގެ ތަރުޖަމާނަކު ބުނީ، ޔޫއޭއީގެ ފުޖައިރާ ބަނދަރުން ދެ ބޯޓެއް ހޮނިހިރު ދުވަހާއި، އާދީއްތަ ދުވަހު މުކައްލާ ބަނދަރަށް ވަދެފައިވާ ކަމަށެވެ. އެ ބޯޓުތައް ވަނީ ކޯލިޝަންގެ އެއްވެސް ހުއްދައެއް ނެތި ކަމަށާއި، އެ ބޯޓު ތަކުން ޓްރެކިން ސިސްޓަމްތައް ވެސް ނިއްވާލި ކަމަށް ބުނެފައިވެ އެވެ. އަދި ސާދަން ޓްރާންޒިޝަނަލް ކައުންސިލަށް އެހީވުމަށް ގިނަ އަދަދެއްގެ ހަތިޔާރު އަދި ހަނގުރާމައިގެ އުޅަނދުތައް ބާލާފައިވާ ކަމަށް ވަނީ ފާހަގަ ކޮށްފަ އެވެ. 

ހަމަލާ ދިން ފަހުން، ޔަމަންގެ ރިޔާސީ ލީޑާޝިޕް ކައުންސިލްގެ ރައީސް ރަޝާދު އަލް އަލީމީ ވަނީ، ޔޫއޭއީގެ ސިފައިން 24 ގަޑިއިރުގެ ތެރޭގައި ޔަމަންގެ ސަރަހައްދުން ނިކުންނަން ޖެހޭނެ ކަމަށް ވިދާޅުވެފަ އެވެ. އަދި ޔޫއޭއީ އާއެކު އޮތް ދިފާއީ އެއްބަސްވުން ކެންސަލް ކުރާނެ ކަމަށް ވެސް ވިދާޅުވި އެވެ. އެގޮތުން ޔޫއޭއީ އިން މިހާރު މަސައްކަތް ކުރަމުން އަންނަނީ ޔަމަންގެ ރައްޔިތުންނާ ދެކޮޅަށް ކަމަށް އޭނާ ވިދާޅުވި އެވެ. 

މި ހަމަލާއާ ގުޅިގެން އެމެރިކާ އާއި ސައުދީ އަރަބިއްޔާ އިން ވަނީ ސަރަހައްދުގެ ސަލާމަތާއި ސުލްޙަ ބެލެހެއްޓުމަށް މަސައްކަތް ކުރަން އެއްބަސްވެފަ އެވެ. ޔަމަންގައި އޮތް ޙާލަތު މިހާާރު ވަރަށް ބޮޑަށް ގޮސްވެފައިވާއިރު، އެ ސަރަހައްދުގައި އައު ހަނގުރާމައެއް ފެށިދާނެ ކަމުގެ ބިރު ވަނީ އުފެދިފަ އެވެ.