ޔަމަންގެ ސަރުކާރު މުވައްޒަފުންނަށް މުސާރަ ދިނުމަށް ސައުދީ އިން އެއް ބިލިއަން ރިޔާާލްގެ އެހީ ދޭން ނިންމައިފި

ޔަމަންގެ ސަރުކާރުގެ މުވައްޒަފުންގެ މުސާރަ ދެއްކުމަށާއި، ބަޖެޓުގެ ދަރަނި ފުއްދުމަށް ސައުދީ އަރަބިއްޔާ އިން 1.3 ބިލިއަން ރިޔާލް، ނުވަތަ 347 މިލިއަން އެމެރިކާ ޑޮލަރުގެ އެހީއެއް ދިނުމަށް ނިންމައިފި އެވެ. 

ބުދަ ދުވަހު މިކަން ހާމަ ކޮށްފައި ވަނީ ސައުދީ ސަރުކާރުގެ އިސް އޮފިޝަލެކެވެ. ޔަމަންގެ ސަރުކާރަށް އިޤްތިޞާދީ މި އެހީތެރިކަން ފޯރުކޮށްދިނުމަކީ، އެ ޤައުމުގެ މުވައްޒަފުންގެ މުސާރަ އަދާ ކުރުމަށް ދިމާވެފައިވާ ދަތިތައް ޙައްލު ކުރުމަށް ކުރާ މުހިންމު މަސައްކަތެކެވެ. މީގެ އިތުރުން، ޔަމަންގެ ސަރުކާރުގެ ބަޖެޓު ދަރަނި ފުއްދުމަށް ވެސް މި ފައިސާ އިން ބޭނުން ކުރެވޭނެ އެވެ. 

މިކަން އިއުލާން ކޮށްފައި މި ވަނީ، ސައުދީ އަރަބިއްޔާ އިން ޔަމަންގެ ދެކުނުގައި 500 މިލިއަން އެމެރިކާ ޑޮލަރުގެ ތަރައްޤީގެ މަޝްރޫއުތައް ހިންގާނެ ކަމަށް އިއުލާން ކުރިތާ ކުޑަ ދުވަސް ކޮޅެއްގެ ތެރޭގަ އެވެ. މިއީ ޔަމަންގެ ދެކުނަށް ތަރައްޤީ ގެނައުމަށް ސައުދީ އަރަބިއްޔާ އިން ކުރަމުން ގެންދާ ދެމެހެއްޓެނިވި މަސައްކަތް ތަކުގެ ބަޔެކެވެ. 

ޔަމަންގެ ތަރައްޤީ އަށް ޚާއްސަކޮށްގެން ސައުދީ އަރަބިއްޔާ އިން ޤާއިމު ކޮށްފައިވާ، ސައުދީ ޑިވެލޮޕްމަންޓް އެންޑް ރިކޮންސްޓްރަކްޝަން ޕްރޮގްރާމް ފޯ ޔަމަން އިން، ފާއިތުވި މަހު އިއުލާން ކުރި މަޝްރޫއު ތަކުގެ ތެރޭގައި އަދަން އެއާޕޯޓް ރަންވޭ އަލުން އެޅުމާއި، އިތުރަށް ތަރައްޤީ ކުރުމުގެ މަސައްކަތްތައް ހިމެނެ އެވެ. މީގެ އިތުރުން އެއާޕޯޓުގައި ޖަދީދު ނެވިގޭޝަން، އަދި ކޮމިއުނިކޭޝަން ސިސްޓަމްތައް ހަރު ކުރުމުގެ މަސައްކަތްތައް ވެސް ހިމެނެ އެވެ. 

ޞިއްޙީ ދާއިރާާގައި ހިންގާ މަޝްރޫއު ތަކުގެ ތެރޭގައި ހަދްރަމައުތު ޔުނިވާސިޓީ ހޮސްޕިޓަލް ފަދަ ބޮޑެތި ހޮސްޕިޓަލްތައް އަލުން ހިންގުމުގެ މަސައްކަތްތައް ހިމެނެ އެވެ. މި ހޮސްޕިޓަލްތައް އަލުން ހިންގުމަކީ ޔަމަންގެ ރައްޔިތުންނަށް ފަރުވާގެ ޚިދުމަތް ފޯރުކޮށްދިނުމުގައި މުހިންމު ބަދަލެއް ގެނެސްދޭނެ ކަމެކެވެ.

ދިގު މުއްދަތަކަށް ޔަމަންގައި ދެމި އޮތް ހަނގުރާމައިގެ ސަބަބުން އެ ޤައުމުގެ އިޤްތިޞާދު ވަރަށް ބޮޑަށް ހަލާކުވެފައިވެ އެވެ. ސަރުކާރު މުވައްޒަފުންނަށް މުސާރަ ދިނުމާއި، އާންމު ޚިދުމަތްތައް ދެމެހެއްޓުމުގައި ވަރަަށް ބޮޑެތި ގޮންޖެހުން ތަކެއް އެ ޤައުމަށް ވަނީ ކުރިމަތިވެފަ އެވެ. ސައުދީ އަރަބިއްޔާ އިން ފޯރުކޮށްދޭ މި އެހީތެރިކަމަކީ މި ދަތިތައް ކުޑަ ކުރުމަށް ކުރާ މުހިންމު މަސައްކަތެކެވެ. 

ސައުދީ އަރަބިއްޔާ އިން ޔަމަންގެ ތަރައްޤީ އަށް ކުރަމުންދާ މަސައްކަތް ތަކުގެ ސަބަބުން އެ ޤައުމުގެ ރައްޔިތުންގެ ދިރިއުޅުމުގެ ފެންވަރު ރަނގަޅު ކުރުމަށް މުހިންމު ބަދަލު ތަކެއް އަންނާނެ ކަމަށް ވެސް ލަފާ ކުރެވޭ ކަމަށް މާހިރުން ބުނެފައިވެ އެވެ.