ޔަމަނުން ވަކިވެގަންނަން މަސައްކަތް ކުރާ ޖަމައާތުގެ ލީޑަރު ފިލުމަށް ޔޫއޭއީ އިން އެހީވި ކަމަށް ސައުދީ ހިމެނޭ ކޯލިޝަނުން ބުނެފި

ޔަމަނުގެ ރިޔާސީ ކައުންސިލުން ވަކިކޮށް، ގައުމަށް ޚިޔާނާތްތެރިވި ކަމުގެ ތުހުމަތު އަޅުވާފައިވާ ވަކިވެގަތުމަށް މަސައްކަތްކުރާ ލީޑަރަކު ސިއްރިއްޔާތުގައި ޔަމަނުން ބޭރުކުރުމަށް ޔުނައިޓެޑް އެރަބް އެމިރޭޓްސް (ޔޫއޭއީ) އިން އެހީތެރިވެދީފައިވާ ކަމަށް، ސައުދީ އަރަބިއްޔާ އިސްވެ އޮންނަ ކޯލިޝަނުން ތުހުމަތުކޮށްފި އެވެ.

ކޯލިޝަނުގެ ތަރުޖަމާނު ވިދާޅުވި ގޮތުގައި، ޔޫއޭއީގެ ތާއީދާއެކު ހަރަކާތްތެރިވާ 'ސަދަން ޓްރާންސިޝަނަލް ކައުންސިލް' (އެސް.ޓީ.ސީ) ގެ ވެރިޔާ އައިދަރޫސް އަލް-ޒުބައިދީ، އަންގާރަ ދުވަހުގެ ރޭ އަދަން އިން ފުރައިގެން ކަނޑުމަގުން ސޯމާލީލޭންޑަށް ގޮސްފައިވެ އެވެ. އަދި އެތަނުން ކާގޯ ބޯޓެއްގައި، މޮގަދިޝޫ މަގުން އަބޫދާބީ އަށް އޭނާ ގެންގޮސްފައިވަނީ ޔޫއޭއީގެ އޮފިސަރުންގެ ސީދާ ބެލުމުގެ ދަށުން ކަމަށްވެސް އޭނާ ވިދާޅުވިއެވެ.

މިކަމާ ގުޅޭގޮތުން ޔޫއޭއީ ނުވަތަ އެސް.ޓީ.ސީ އިން އަދި ރަސްމީ ބަހެއް ބުނެފައެއް ނުވެއެވެ.

ޒުބައިދީ ފިލައިގެން ގޮސްފައިވާ ކަމަށް ކޯލިޝަނުން ބުނި ނަމަވެސް، އެސް.ޓީ.ސީ އިން ބުދަ ދުވަހު ބުނެފައި ވަނީ އޭނާ އަދިވެސް ހުންނެވީ އަދަން ގައި ކަމަށެވެ. މީގެ އިތުރުން، ޒުބައިދީ އޭނާގެ ފައުޖުތައް އަދަން ގެ ބޭސްތަކުން އޭނާގެ އުފަން ރަށް ކަމަށްވާ އަލް-ދާލި އަށް ބަދަލުކުރަމުންދާ ކަމަށް ބުނެ، ކޯލިޝަނުން ވަނީ އެ ފައުޖުތަކަށް ވައިގެ ހަމަލާތަކެއް ދީފަ އެވެ.

މި ހަމަލާތަކުގައި ހަތަރު މީހުން މަރުވެފައިވާއިރު، އެސް.ޓީ.ސީ އިން ބުނީ މިއީ އެއްވެސް އިންސާފެއް ނެތް ހަމަލާތަކެއް ކަމަށާއި، މިއީ ސައުދީގެ ތާއީދު އޮންނަ ޔަމަނުގެ ސަރުކާރާއެކު މަޝްވަރާ ކުރުމަށް ގޮވާލާ ގޮވާލުންތަކާ ޚިލާފު އަމަލެއް ކަމަށެވެ.

ބުރާސްފަތި ދުވަހު ކޯލިޝަނުގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ ވިދާޅުވީ، ޒުބައިދީ އާއި އޭނާގެ ބައިވެރިން ބުދަ ދުވަހުގެ ފަތިހުގެ ވަގުތެއްގައި އަދަން ގެ ބަނދަރުން ފުރާފައި ވަނީ ސެއިންޓް ކިޓްސް އެންޑް ނޭވިސްގެ ދިދަ ޖަހާފައިވާ އުޅަނދެއްގައި ކަމަށް "އިތުބާރު ހުރި ޖާސޫސީ މައުލޫމާތު" ލިބިފައިވާ ކަމަށެވެ. އެ އުޅަނދު ސޯމާލީލޭންޑުގެ ބަރުބަރާ ބަނދަރަށް ދިއުމުން، އެތަނުގައި ތައްޔާރުކޮށްފައި އޮތް 'އިލިއުޝިން އައި.އެލް-76' މަރުކާގެ ކާގޯ ބޯޓަކަށް އެމީހުން އަރާފައިވާ ކަމަށް އޭނާ ވިދާޅުވި އެވެ.

މާލިކީ އިތުރަށް ވިދާޅުވި ގޮތުގައި، ޔޫއޭއީގެ އޮފިސަރުންގެ ބެލުމުގެ ދަށުން އެ ބޯޓު ފުރަތަމަ ދިޔައީ ސޯމާލިއާގެ ވެރިރަށް މޮގަދިޝޫއަށެވެ. އެއަށްފަހު، އެއްވެސް މަންޒިލެއް ހާމަނުކޮށް އަރަބި ކަނޑާ ދިމާލަށް މިސްރާބު ޖެހި ކަމަށާއި، އަބޫދާބީގެ އަލް-ރީފް އަސްކަރީ ބޭހަށް ޖެއްސުމުގެ 10 މިނެޓް ކުރިއާ ހަމަ އަށް ބޯޓުގެ އައިޑެންޓިފިކޭޝަން ސިސްޓަމްތައް ނިއްވާލާފައިވާ ކަމަށް ވެސް އޭނާ ފާހަގަކުރެއްވި އެވެ.

ފާއިތުވި ހަފުތާތަކުގައި ޔަމަނުގެ ދެކުނުގެ މަސްރަހު ވަނީ ވަރަށް ބޮޑަށް ގޯސްވެ، އައު ހަމަނުޖެހުންތަކަކަށް މަގުފަހިވެފަ އެވެ. މީގެ ސަބަބުން އީރާނުގެ ތާއީދު އޮންނަ ހޫޘީންނާ ދެކޮޅަށް މަސައްކަތްކުރާ ފައުޖުތަކުގެ މެދުގައި ބައިބައިވުން އުފެދި، ސައުދީ އަރަބިއްޔާ އާއި ޔޫއޭއީއާ ދެމެދު އޮތް ގުޅުމަށް ވެސް ވަނީ ބޮޑެތި އަސަރުތަކެއް ކޮށްފަ އެވެ.

އެސް.ޓީ.ސީގެ ފައުޖުތަކުން ވަނީ ފާއިތުވި އަހަރުތަކުގައި ޔަމަނުގެ ދެކުނުގެ ބޮޑު ސަރަހައްދެއް އެމީހުންގެ ކޮންޓްރޯލްގެ ދަށަށް ގެންގޮސްފަ އެވެ. އެމީހުން ބޭނުންވަނީ ޔަމަނުގެ ދެކުނަކީ ވަކި މިނިވަން ދައުލަތަކަށް ހެދުމަށެވެ. ނަމަވެސް، ސައުދީ އަރަބިއްޔާ އިން މިދިޔަ ހަފުތާގައި އިންޒާރު ދީފައިވަނީ، އެގައުމުގެ ބޯޑަރު ކައިރީގައި ހިންގާ މިފަދަ ހަރަކާތްތަކަކީ ސައުދީގެ ގައުމީ ސަލާމަތަށާއި ޔަމަނުގެ ހަމަޖެހުމަށް އޮތް ނުރައްކަލެއް ކަމަށެވެ.

މީގެ އިތުރުން، ޔޫއޭއީއާ ގުޅުން އޮންނަ ފައުޖުތައް ޔަމަނުގެ އިރުމަތީ ސަރަހައްދުތަކަށް ފޮނުވުމަށް ޔޫއޭއީން ބާރުއަޅަމުންދާ ކަމަށް ސައުދީން ތުހުމަތުކޮށްފައިވެ އެވެ. އަދި ޔޫއޭއީގެ ހުރިހާ ސިފައިން ޔަމަނުން ބޭލުމަށް ޔަމަނުގެ ރިޔާސީ ކައުންސިލުން ކުރާ ޑިމާންޑަށް ސައުދީން ވަނީ ތާއީދުކޮށްފަ އެވެ.

ހަމަ އެއާއެކު، ޔޫއޭއީން އެސް.ޓީ.ސީ އަށް ފޮނުވި ކަމަށް ބުނާ ހަތިޔާރާއި އަސްކަރީ އުޅަނދުތަކެއް ވެސް ސައުދީ ކޯލިޝަނުން ވަނީ ހަމަލާދީ ހަލާކުކޮށްލާފަ އެވެ. ޔޫއޭއީން ވަނީ ސައުދީގެ މި ތުހުމަތުތަކަށް ހިތާމަކުރާ ކަމަށް ބުނެ، އެތަނުގައި އެއްވެސް ހަތިޔާރެއް ނުހުންނާނެ ކަމަށް ބުނެފަ އެވެ. ނަމަވެސް، ޔަމަނުގައި ތިބި އެގައުމުގެ ބާކީ ތިބި ސިފައިން ބޭލުމަށް ޔޫއޭއީން މިހާރު ވަނީ އެއްބަސްވެފަ އެވެ.

ރިޕޯޓުތައް ބުނާ ގޮތުގައި، މިހާރު އަދަން އާއި ހަޟްރަމައުތު އަދި އަލް-މަހްރާ ފަދަ ސަރަހައްދުތައް ސައުދީގެ ތާއީދު އޮންނަ ސަރުކާރުގެ ސިފައިންގެ ކޮންޓްރޯލްގެ ދަށަށް ވަނީ ގެނެސްފަ އެވެ.