ޔަމަންގެ ދެކުނު ފެކްޝަނަށް ސައުދީ އިން ގޮވާލީ ރިޔާޟް ކޮންފަރެންސްގައި ބައިވެރިވުމަށް

ސައުދީ އަރަބިއްޔާގެ ރިޔާދުގައި ބާއްވާ، ރިޔާޟް ކޮންފަރެންސްގައި ބައިވެރިވުމަށް، ޔަމަންގެ ދެކުނު ފެކްޝަނަށް ސައުދީ އިން ގޮވާލައިފި އެވެ. 

ސޯޝަލް މީޑިއާ މެދެވެރިކޮށް އާންމު ކޮށްފައިވާ ބަޔާނެއްގައި ސައުދީގެ ފޮރިން މިނިސްޓްރީ އިން ބުނެފައި ވަނީ، ދެކުނުގެ މައްސަލަ އަށް އިންސާފުވެރި ހައްލުތައް ހޯދުމަށް، ދެކުނުގެ ހުރިހާ ފަރާތްތައް ރިޔާޟް ގައި ބައްދަލުކޮށް، އެންމެން ޝާމިލުވާ ކޮންފަަރެންސްއެއް ބޭއްވުމަށް ގޮވާލާ ކަމަށެވެ. 

ހޮނިހިރު ދުވަހު އާންމު ކޮށްފައިވާ އެ ބަޔާނުގައި ބުނެފައި ވަނީ، ޔަމަންގެ ރިޔާސީ ލީޑާޝިޕް ކައުންސިލްގެ ރައީސް ރަޝާދު އަލް އަލީމުގެ އެދުމަށް ސައުދީ އިން އެ ކޮންފަރެންސް ބޭއްވުމަށް މަސައްކަތް ކުރަމުން ކަމަށެވެ. 

ސައުދީގެ ފޮރިން މިނިސްޓްރީ އިން ބުނެފައި ވަނީ ދެކުނުގެ މައްސަލަ އަކީ، ތާރީޚީ ަދި އިޖުތިމާއީ އެތައް ކަންތައް ތަކެއް ހިމެނޭ މައްސަލައެއް ކަމަށާއި، އެ މައްސަލަ އަށް ޙައްލު ހޯދޭނީ ޔަމަނުގައި ޝާމިލު ސިޔާސީ ޙައްލެއްގެ ތެރެއިން ވާހަކަ ދައްކައިގެން ކަމަށެވެ. އަދި އެ މައްސަލަ އަށް ބޭނުން ވަނީ އިންސާފުވެރި ޙައްލެއް ކަމަށް ވެސް ފާހަގަ ކޮށްފައިވެ އެވެ. 

އެހެން ކަމުން، ދެކުނުގެ ރައްޔިތުންގެ ޝަރުއީ އުންމީދުތައް ފުރިހަމަ ކުރާ ދެކުނުގެ މައްސަލަ އަށް އިންސާފުވެރި ޙައްލެއް ހޯދުމަށް، ޝާމިލުވެގެން ވިޝަނެއް ތަައްޔާރު ކުރުމަށް ކޮންފަރެންސްގައި ޙަރަކާތްތެރިކަމާ އެކު ބައިވެރިވުމަށް ސައުދީ އިން ވަނީ ހުރިހާ ފަރާތް ތަކަށް ގޮވާލައިފަ އެވެ. 

ޔަމަންގެ ދެކުނުގެ މައްސަލަ އަކީ އެ ޤައުމުގެ ދިގު މުއްދަތުގެ ސިޔާސީ ހަމަނުޖެހުމުގެ އެއް ބައި ކަމަށްވާއިރު، ދެކުނުގެ ރައްޔިތުން ބޭނުން ވަނީ އިތުރު މިނިވަން ކަމާއި، ސިޔާސީ ހައްގުތައް ހޯދުމަށެވެ. 

މި ކޮންފަރެންސް ބާއްވަން ސައުދީ އަރަބިއްޔާ އިން ނިންމީ، ޔަމަންގައި ދެމެހެއްޓެނިވި ސުލްޙައެއް ޤާއިމު ކުރުމަށް ކުރަމުން އަންނަ މަސައްކަތް ތަކުގެ ބައެއްގެ ގޮތުގައި ކަމަށް ފާހަގަ ކުރެވެ އެވެ. ސައުދީ އަރަބިއްޔާ އިން ޔަމަންގެ ކަންކަމުގައި މުހިންމު ދައުރެއް އަދާ ކުރަމުން އަންނައިރު، އެ ޤައުމުގައި ހަމަޖެހުމާއި ސުލްޙަ ޤާއިމު ކުރުމަށް މަސައްކަތް ކުރަމުން އަންނަކަން ވެސް ފާހަގަ ކުރެވެ އެވެ.

މި ކޮންފަރެންސް ކާމިޔާބު ވުމަކީ ޔަމަނުގެ ދެކުނުގެ މައްސަލަ އަށް ދާއިމީ ހައްލެއް ހޯދުމަށް މުހިންމު ފިޔަވަޅެއް ކަމަށް ބެލެވެ އެވެ.