ޔަމަނުގެ ދެކުނުގައިވާ އަލް-ދާލިއާ ސަރަހައްދަށް އަމާޒުކޮށް ވަރުގަދަ ވައިގެ ހަމަލާތަކެއް ދީފި

ޔަމަނުގެ ދެކުނުގައިވާ އަލް-ދާލިއާ ސަރަހައްދަށް އަމާޒުކޮށް ވަރުގަދަ ވައިގެ ހަމަލާތަކެއް ދީފި އެވެ.

އަލް އަރަބިއްޔާ ނޫހުން ބުދަ ދުވަހު ބުނި ގޮތުގައި، މި ހަމަލާތައް އަމާޒުކޮށްފައި ވަނީ ސަދަން ޓްރާންސިޝަނަލް ކައުންސިލް (އެސް.ޓީ.ސީ) ގެ ވެރިޔާ އައިދުރޫސް އަލް-ޒުބައިދީ ހަތިޔާރު ރައްކާކުރުމަށް ބޭނުންކުރާ ގުދަނަކަށެވެ.

އަލް އަރަބިއްޔާ އަށް މައުލޫމާތު ދިން މަސްދަރުތަކުން ބުނި ގޮތުގައި، އެތަނަކީ ޒުބައިދީ ބޭނުންކުރާ މައި ހަތިޔާރު ގުދަނެކެވެ. ކޯލިޝަނުން ނެރުނު ބަޔާނެއްގައިވާ ގޮތުން، ޒުބައިދީ މިހާރު ވަނީ ފިލައިގެން ނޭނގޭ ތަނަކަށް ގޮސްފައެވެ.

ކޯލިޝަނުން އިތުރަށް ބުނި ގޮތުގައި، އަލް-ދާލިއާ އަށް ދިން މި ހަމަލާތަކަކީ ޔަމަނުގެ ހޯމްލޭންޑް ޝީލްޑް ފޯސަސްއާ ގުޅިގެން، އެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ދުރާލައި ރޭވިގެން ދިން ހަމަލާތަކެކެވެ.

ޔަމަނުގެ ރިއާސީ ލީޑަޝިޕް ކައުންސިލުން ބުދަ ދުވަހު ވަނީ ޒުބައިދީ އެ ކައުންސިލުން ވަކިކުރުމަށް ނިންމާފަ އެވެ. އެއީ އޭނާ ފިލައިގެން ދިއުމާއި، ޔަމަނުގެ މަސްރަހު ފިނިކުރުމަށް ސައުދީ އަރަބިއްޔާގައި ބޭއްވުމަށް ހަމަޖެހިފައިވާ މަޝްވަރާތަކަށް ދިއުމަށް އިންކާރުކުރުމާ ގުޅިގެން "ގައުމަށް ޚިޔާނާތް" ތެރިވުމުގެ ތުހުމަތުގަ އެވެ.

ބުދަ ދުވަހުގެ ކުރީކޮޅު ކޯލިޝަނުން ބުނި ގޮތުގައި، ޒުބައިދީ ވަނީ ނޭނގޭ ތަނަކަށް ފިލައިގެން ގޮސްފައެވެ. އަދި ރިޔާޟު ގައި ބޭއްވުމަށް ހަމަޖެހިފައިވާ މަޝްވަރާތަކަށް އެސް.ޓީ.ސީގެ އެހެން މެންބަރުން ދަތުރުކުރި ފްލައިޓަށް އޭނާ އަރާފައެއް ނުވެއެވެ.

ބަޔާނުގައިވާ ގޮތުން، ޖެނުއަރީ 5 ވަނަ ދުވަހު އެސް.ޓީ.ސީގެ ރިއާސަތުން ވަނީ ސައުދީގެ އިސްނެގުމާ އެކު ބާއްވާ ކޮންފަރެންސަށް ތާއީދުކުރާކަން އާކޮށް، އެ ބައްދަލުވުމުގައި ބައިވެރިވާނެކަމުގެ ޔަގީންކަން ދީފައެވެ. ޒުބައިދީ ވެސް ޖެނުއަރީ 6 ގައި އެ ބައްދަލުވުމަށް ދާނެކަން ސައުދީ އޮތޯރިޓީތަކަށް އެންގުމަށްފަހު، ވަފުދެއް އެއާޕޯޓަށް ދިޔަ އެވެ. ނަމަވެސް، އެ ވަފުދު ދަތުރުކުރަން އޮތް ޔަމަނިއާ އެއާވޭސްގެ ފްލައިޓް ތިން ގަޑިއިރަށްވުރެ ގިނަ އިރަށް މަޑު ކުރި އިރު ވެސް އޭނާ އައިސްފަ އެއް ނުވެ އެވެ.

އެ ވަގުތުގެ ތެރޭގައި ލިބުނު މައުލޫމާތުތަކުން އެނގުނު ގޮތުގައި، ޒުބައިދީ ވަނީ މެންދަމުގެ ވަގުތެއްގައި ހަދީދު އަދި އަލް-ސުލްބާން ކޭމްޕުތަކުން ގިނަ އަދަދެއްގެ ބަރު ހަތިޔާރާއި، ހަނގުރާމަމަތީ އުޅަނދުތަކާއި، ވަޒަންތައް އަލް-ދާލިއާ އަށް ބަދަލުކުރުމަށް އަމުރުކޮށްފަ އެވެ.

އޭގެ ފަހުން އެސް.ޓީ.ސީގެ އިސް ފަރާތްތަކާ އެކު ފްލައިޓް ފުރި ނަމަވެސް، އޭގައި ޒުބައިދީ ދަތުރުކޮށްފަ އެއް ނުވެ އެވެ. އަދި އޭނާ ވީތަނެއް އެ ޖަމާއަތުގެ އެހެން ލީޑަރުންނަށް ވެސް އެނގިފަ އެއް ނުވެ އެވެ.

ބަޔާނުގައި އިތުރަށް ބުނެފައި ވަނީ، ކުރިއަށް އޮތް ވަގުތުތަކުގައި އަދަން ސިޓީގައި ހަމަނުޖެހުން އުފެއްދުމުގެ މަގްސަދުގައި، މުއުމިން އަލް-ސައްގާފް އަދި މުޚްތާރު އަލް-ނޫބީގެ ބެލުމުގެ ދަށުން އެ ސިޓީގައި ތިބި ގިނަ އަދަދެއްގެ ހަނގުރާމަވެރިންނަށް ޒުބައިދީ ހަތިޔާރާއި ވަޒަން ފޯރުކޮށްދީފައިވާ ކަމަށެވެ.