ސޯމާލީލޭންޑަށް އިޒްރޭލުގެ ޚާރިޖީ ވަޒީރު ގިޑިއޯން ސާރް ޒިޔާރަތްކޮށްފި
ސޯމާލިއާގެ ބައެއްގެ ގޮތުގައި އޮތް ސޯމާލީލޭންޑް މިނިވަން ދައުލަތެއްގެ ގޮތުގައި ބަލައިގަތް ފުރަތަމަ ގައުމަކީ އިޒްރޭލް. މި ނިންމުމާ ގުޅިގެން ސޯމާލިއާ އާއި އަރަބި ލީގާއި އެހެން ގައުމުތަކުން ވަނީ ކުށްވެރިކޮށް ނުރުހުން ފާޅުކޮށްފައި.
އިޒްރޭލުގެ ޚާރިޖީ ވަޒީރު ގިޑިއޮން ސާރު ސޯމާލިޔާގެ ރައީސް އަބްދީރަހްމާން މުހައްމަދު އަބްދުالله އާއި ބައްދަލުކުރައްވަނީ، ޖެނުއަރީ 6، 2026 | އެކްސް
އިޒްރޭލުން ދާދިފަހުން މިނިވަން ދައުލަތެއްގެ ގޮތުގައި ބަލައިގަތް، ސޯމާލިއާ އިން ވަކިވެގަނެގެން އުޅޭ ސޯމާލީލޭންޑަށް އިޒްރޭލުގެ ޚާރިޖީ ވަޒީރު ގިޑިއޯން ސާރް އަންގާރަ ދުވަހު ޒިޔާރަތްކޮށްފި އެވެ.
"އިޒްރޭލުގެ ޚާރިޖީ ވަޒީރު ގިޑިއޯން ސާރް އިސްކޮށް ހުންނަވައިގެން ވަޑައިގެންނެވި ވަފުދެއް ހަރުގޭސާ ސިޓީއަށް ވަނީ ދަތުރުކޮށްފައި. އެއާޕޯޓުން އެ ބޭފުޅުންނަށް މަރުހަބާ ދެންނެވީ ސަރުކާރުގެ އިސް މަސްއޫލުވެރިން. އަދި ސޯމާލީލޭންޑުގެ އިސް ވެރިންނާ އެކު އޭނާ ވަނީ ބައްދަލުވުންތަކެއް ބާއްވަވާފައި،" ސޯމާލީލޭންޑުގެ ރިޔާސީ އިދާރާ އިން ނެރުނު ބަޔާނެއްގައި ބުނެފައިވެ އެވެ.
އެކްސް (ކުރީގެ ޓްވިޓާ) ގައި ދައުރުވަމުންދާ ފޮޓޯއަކުން ފެންނަ ގޮތުގައި، ސާރް ވަނީ ސޯމާލީލޭންޑުގެ ރައީސް އަބްދުއްރަހުމާން މުޙައްމަދު އަބްދުﷲ އާ ބައްދަލުކުރައްވާފައެވެ.
މި ދަތުރާ ގުޅިގެން ސޯމާލިއާގެ ޚާރިޖީ ވުޒާރާ އިން ވަނީ އެކަން ކުށްވެރިކޮށްފަ އެވެ. އެ ވުޒާރާއިން ބުނި ގޮތުގައި މިއީ ސޯމާލިއާގެ ސިޔާދަތާއި އިސްތިގުލާލަށް އަރައިގަތުމުގެ އަމަލެކެވެ.
ސޯމާލިއާގެ ރުހުމެއް ނެތި ހިންގާ އެފަދަ ކޮންމެ ރަސްމީ މުއާމަލާތަކީ ޣައިރު ގާނޫނީ އަދި ބާތިލު ކަމެއް ކަމަށް އެ ވުޒާރާއިން ބުނެފައިވެ އެވެ. އަދި ސޯމާލިއާގެ ސަރަހައްދީ އިސްތިގުލާލަށް އިހުތިރާމު ކުރުމަށް އދ. އާއި އެފްރިކަން ޔޫނިއަން ހިމެނޭހެން ބައިނަލްއަގުވާމީ ޖަމާއަތްތަކަށް ވަނީ ގޮވާލާފަ އެވެ.
މީގެ އިތުރުން، އަރަބި ލީގުން ވެސް ވަނީ ސާރް ސޯމާލީލޭންޑަށް ސާރް ކުރި ޒިޔާރަތް ކުށްވެރިކޮށްފަ އެވެ.
އަންގާރަ ދުވަހުގެ ވަގުތެއްގައި ސާރް ވިދާޅުވީ، އދ. ގެ މެންބަރު ގައުމުތަކުގެ ތެރެއިން ސޯމާލީލޭންޑް ޖުމްހޫރިއްޔާއަކީ މިނިވަން އަދި މުސްތަގިއްލު ދައުލަތެއްގެ ގޮތުގައި ބަލައިގަތް ފުރަތަމަ ގައުމަށް ވުމަކީ އިޒްރޭލަށް ލިބޭ ޝަރަފެއް ކަމަށެވެ.
މިއީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، ސޯމާލީލޭންޑް ބަލައިގަންނަން ނިންމިކަން މިދިޔަ މަހު އިއުލާނުކުރި ފަހުން، އެ ސަރަހައްދަށް އިޒްރޭލުގެ ވަޒީރަކު ކުރެއްވި ފުރަތަމަ ރަސްމީ ދަތުރެވެ.
ސޯމާލީލޭންޑުގެ ޑިޕްލޮމެޓިކް މަސްދަރަކުން ބުނި ގޮތުގައި، ސާރްގެ މި ދަތުރުފުޅުގެ މަގުސަދަކީ އިޒްރޭލާއި ސޯމާލީލޭންޑާ ދެމެދު ސިޔާސީ އަދި ސްޓްރެޓެޖިކް ގުޅުންތައް ކުރިއެރުވުމެވެ.
އަމިއްލައަށް މިނިވަންކަން އިއުލާނުކޮށްފައިވާ ސޯމާލީލޭންޑަކީ ވަކި ދައުލަތެއްގެ ގޮތުގައި ރަސްމީކޮށް ބަލައިގަތް ފުރަތަމަ ގައުމަކީ އިޒްރޭލެވެ. މި ނިންމުމާ ގުޅިގެން ސޯމާލިއާގެ އިތުރުން އެހެން ގައުމުތަކުން ވެސް ވަނީ ނުރުހުން ފާޅުކޮށްފައެވެ.
ނަތަންޔާހޫ އޭރު ވިދާޅުވީ، މި ނިންމުމަކީ ރައީސް ޓްރަމްޕްގެ އިސްނެންގެވުމުގެ މަތިން ސޮއިކުރެވުނު "އަބްރަހަމް އެކޯޑްސް" (އިބްރާހީމީ އެއްބަސްވުންތައް) ގެ ރޫހާ އެއްގޮތްވާ ގޮތުގެ މަތިން ނިންމި ނިންމުމެއް ކަމަށެވެ. އަދި ދަނޑުވެރިކަމާއި، ސިއްހަތާއި، ޓެކްނޮލޮޖީ އަދި އިގްތިސާދީ ދާއިރާ އިން ސޯމާލީލޭންޑާ އެކު ގުޅުން ބަދަހިކުރަން މަސައްކަތްކުރާނެ ކަމަށް ވެސް އޭނާ ވިދާޅުވިއެވެ.
1991 ވަނަ އަހަރު ސޯމާލިއާގައި ދާޚިލީ ހަނގުރާމަ ފެށުނު ފަހުން ސޯމާލީލޭންޑުން އަންނަނީ އަމިއްލަ ވެރިކަމެއް ހިންގަމުންނެވެ. އެހެންނަމަވެސް، މިހާތަނަށް އެއްވެސް ގައުމަކުން އެއީ ވަކި ދައުލަތެއްގެ ގޮތުގައި ބަލައިގެންފައެއް ނުވެއެވެ.
އަހަރުތަކެއް ވަންދެން ސޯމާލިއާ އިން ގެންދަނީ ސޯމާލީލޭންޑް ބަލައިނުގަތުމަށް ބައިނަލްއަގުވާމީ ފަރާތްތަކަށް ބާރުއަޅަމުންނެވެ.
އަލް އަރަބިއްޔާ އިނގިރޭސި ޗެނަލަށް ދެއްވި އިންޓަވިއުއެއްގައި ސޯމާލިއާގެ ރައީސް ހަސަން ޝައިޚް މަޙްމޫދު ވަނީ އިޒްރޭލުގެ މި ނިންމުމަށް އިންކާރުކުރައްވާފަ އެވެ. އޭނާ ވިދާޅުވީ ސޯމާލީލޭންޑަކީ ސޯމާލިއާގެ ވަކި ނުކުރެވޭނެ ބައެއް ކަމަށާއި، ވަކި ދައުލަތެއްގެ ގޮތުގައި އޮތުމުގެ އެއްވެސް ގާނޫނީ ހައިސިއްޔަތެއް އެ ސަރަހައްދަށް ނެތް ކަމަށެވެ.
