ސައުދީން އިސްވެ އޮންނަ ކޯލިޝަނުން ޔަމަނަށް ހަމަލާދީފި
ޔަމަނުގެ ގާނޫނީ ސަރުކާރާއި އެސްޓީސީއާ ދެމެދު މަޝްވަރާކުރުމަށް ރިޔާޟަށް ދިއުމަށް ހަމަޖެހިފައި އޮތް ބޯޓަށް އެސްޓީސީގެ ލީޑަރު އައިދަރޫސް އަލްޒުބައިދީ ނާރާ ފިލުމާ ގުޅިގެން ސައުދީން އިސްވެ ހިންގާ ކޯލިޝަނުން ޔަމަނުގެ ދެކުނުގެ ސަރަހައްދަށް ހަމަލާދީފި ކަމަށް ވަނީ ރިޕޯޓު ކޮށްފައި.
ޔަމަނުގެ އަލް މަހްރާގެ ކޮންޓްރޯލް ހޯދާފައިވާ ކަމަށް ހޮނިހިރު ދުވަހު ހޯމްލޭންޑް ޝީލްޑް ފޯސްތަކުން ވަނީ އިއުލާންކޮށްފައި | ރޮއިޓަސް
ޔަމަނުގައި ހަރަކާތްތެރިވާ ސައުދީން އިސްވެ އޮންނަ ކޯލިޝަނުން އެ ގައުމުގެ ދެކުނުގެ ސަރަހައްދުތަކަށް ހަމަލާދީފިއެވެ.
ކޯލިޝަނާ ހަވާލާދީ އަލްޖަޒީރާ އިން ރިޕޯޓުކޮށްފައި ވަނީ، މި ހަމަލާތައް ދީފައިވަނީ ސަދަން ޓްރާންސިޝަނަލް ކައުންސިލް (އެސްޓީސީ) ގެ ލީޑަރު އައިދަރޫސް އަލްޒުބައިދީ، މަޝްވަރާތަކަށް ރިޔާޟަށް ދިއުމަށް ހަމަޖެހިފައި އޮތް ބޯޓަށް ނޭރި ފިލުމާ ގުޅިގެން، އެ ޖަމާއަތުގެ ހަނގުރާމަވެރިންނަށް އަމާޒުކޮށެވެ.
ބުދަ ދުވަހުގެ ފަތިހު ކޯލިޝަނުން ނެރުނު ބަޔާނެއްގައި ބުނެފައިވަނީ، ޔަމަނުގެ ގާނޫނީ ސަރުކާރާއި އެސްޓީސީއާ ދެމެދު އުފެދިފައިވާ ހަމަނުޖެހުންތަކަށް ހައްލެއް ހޯދުމުގެ މަޝްވަރާތަކަށް، އަންގާރަ ދުވަހުގެ ރޭ އަދަނުން ފުރަން އޮތް ބޯޓަށް އަލްޒުބައިދީ ނާރާ ކަމަށެވެ. އަދި އޭނާ މިހާރު ފިލައިގެން ގޮސްފައިވާ ތަނެއް ނޭނގޭ ކަމަށް އެ ބަޔާނުގައިވެ އެވެ.
މީގެ އިތުރުން، އަލްޒުބައިދީ އިސްވެ ހުރެ، ބޮޑު ލަޝްކަރެއް ތައްޔާރުކުރަމުންދާ ކަމުގެ މައުލޫމާތު ކޯލިޝަނަށާއި ޔަމަނުގެ ސަރުކާރަށް ލިބިފައިވާ ކަމަށް ވެސް ބަޔާނުގައި ބުނެފައިވެ އެވެ. މި ލަޝްކަރުގައި ހަތިޔާރު އެޅި އުޅަނދުތަކާއި، އެކި ބާވަތުގެ ހަތިޔާރުގެ އިތުރުން ގިނަ އަދަދެއްގެ ގޮވާތަކެތި ހިމެނޭ ކަމަށް މައުލޫމާތު ލިބެއެވެ.
މި ލަޝްކަރު ޖަމާވެފައި ވަނީ ދާލީ ޕްރޮވިންސަށެވެ. އެހެންކަމުން، ހަމަނުޖެހުންތައް އިތުރަށް ފުޅާކުރުމަށް އަލްޒުބައިދީ ކުރަމުންދިޔަ މަސައްކަތް ހުއްޓުވުމަށްޓަކައި، ކޯލިޝަނުން ވަނީ ބުދަ ދުވަހުގެ ފަތިހު 4:00 ހާއިރު އެ ސަރަހައްދަށް ވަރުގަދަ ހަމަލާތަކެއް ދީފައި ކަމަށް ވެސް ބަޔާނުގައިވެ އެވެ.
