ޖަވާބެއް ނެތް ނޫސްވެރިންގެ ބައްދަލުވުންތައް: މޫނުތަކާއި މަގާމުގެ ނަންތައް ބަދަލުވި ނަމަވެސް، ކަން ހިނގާ ގޮތަކަށް ބަދަލެއް ނާދޭ

މައުލޫމާތު ހޯދައި ލިބިގަތުމުގެ ހައްގަކީ ޑިމޮކްރެޓިކް ނިޒާމެއްގެ އަސާސީ ހައްގެކެވެ. ޖަވާބުދާރީވުމަކީ ރައްޔިތުންނަށްޓަކައި އަދާކުރަންޖެހޭ މުހިއްމު ޒިންމާއެކެވެ. އެ ޒިންމާއިން ސަރުކާރު ރެކެމުންދާ މަންޒަރަކީ މި ސަރުކާރު ފެށުނު ފަހުން ކޮންމެ ދުވަހަކުވެސް ފެންނަމުންދާ މަންޒަރެކެވެ. އެކަން މިއަދު އޮތް ނޫސްވެރިންގެ ބައްދަލުވުމުގައިވެސް ފެނިގެން ދިޔަ އެވެ. 

މިސާލަކަށް، މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފާ ވަނީ ވަރަށް މުހިންމު ސުވާލެއް ކުރިމަތިވެފަ އެވެ. އެއީ، ދުނިޔޭގެ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ފަހަތަށް ސޮއްސައިގެން ދިއުމުގައި، މީޑިއާއާ މެދު ސަރުކާރުން ގެންގުޅޭ އުސޫލުތަކުގެ ދައުރެއް އޮތްތޯ ކުރި ސުވާލެވެ.

ހަގީގަތުގައި އެއީ ވަރަށް ސީދާ ސުވާލެކެވެ. އެ ސުވާލަށް ބޭނުންވީވެސް ހަމަ އެހާމެ ސީދާ ޖަވާބެކެވެ.

ނަމަވެސް، އެ ސުވާލަށް ސީދާ ޖަވާބެއް ދެއްވުމުގެ ބަދަލުގައި ފެނިގެންދިޔައީ އެހެން ދިމާލަކަށް މިސްރާބު އަނބުރާލުމާއި، ޒިންމާއިން ރެކުމަށް ކުރި މަސައްކަތެވެ. ރާއްޖޭގެ ރޭންކިން ދަށަށް ދިޔައީ ހަމައެކަނި ސަރުކާރުގެ ނާގާބިލުކަމުން ނޫން ކަމަށް ތަރުޖަމާނު ވަނީ ވިދާޅުވެފަ އެވެ. 

ޕްރެސް ފްރީޑަމް އިންޑެކްސްގައި ސަރުކާރުގެ އަމަލުތަކުގެ ދައުރެއް ނެތް ކަމަށް ހެދުމަކީ، ފާއިތުވި އަހަރުތަކުގައި ނޫސްވެރިންނާއި މީޑިއާގައި މަސައްކަތްކުރާ ފަރާތްތަކުގެ އިތުރުން އާންމު ރައްޔިތުންނަށް ފެންނަމުންދާ ހަގީގަތްތަކަށް ފާޅުގައި ފުރަގަސްދިނުން ނޫން ކޮން ކަމެއްތޯއެވެ؟ 

ނޫސްވެރިންނާއި އާންމު ރައްޔިތުންނަށް މައުލޫމާތު ހޯދުމަށް އޮތް އެންމެ މުހިންމު ވަސީލަތް ކަމުގައިވާ މައުލޫމާތު ހޯދައި ލިބިގަތުމުގެ ހައްގު (އާރް.ޓީ.އައި) ގެ ދަށުން ހުށަހަޅާ ހުށަހެޅުންތަކަށް ޖަވާބު ނުލިބުމާއި، އާދަޔާ ޚިލާފަށް ލަސްވުން ވަނީ އާންމުވެފަ އެވެ. ރަސްމީ ދާއިރާތަކުން ކުރާ ސުވާލުތަކަށް ގިނަ ފަހަރަށް ޖަވާބެއް ނުލިބެ އެވެ.

ކެބިނެޓުގެ ނޫސްވެރިންގެ ބައްދަލުވުންތައް ބާއްވައި، ކެމެރާތަކުގެ ކުރިމަތީގައި ބަޔާންތައް އިއްވި ނަމަވެސް، ނޫސްވެރިންގެ ހަގީގީ ސުވާލުތަކަށް ޖަވާބެއް ނުލިބެ އެވެ. އެހެންކަމުން ދެފުށް ފެންނަ ސިޔާސަތެއްގެ ބަދަލުގައި ފެންނަމުންދަނީދެއްކުންތެރިކަމެވެ. 

ސިޔާސީ މަގާމުތަކުގައި ތިބި މީހުންގެ އަދަދު ހާމަކުރުމަށް މިއަދު އިންކާރު ކުރުމަކީ މީގެ އަނެއް މިސާލެވެ. މިއީ ގައުމީ ސަލާމަތާ ގުޅުންހުރި ސިއްރު މައުލޫމާތެއް ނޫނެވެ. މިއީ ރައްޔިތުންގެ ފައިސާއިން މުސާރަދޭ ސިޔާސީ މަގާމުތަކުގެ ވާހަކަ އެވެ. ސިޔާސީ މުސާރަދޭ ލިސްޓު އޮތީ ކިހާ ބޮޑަކަށްތޯއާއި، ދައުލަތުގެ ވަސީލަތްތައް ހޭދަކުރަނީ ކޮން ކަމަކަށްތޯއާއި، އަދި މަގާމުތައް ދެނީ ބޭނުންތެރިކަމަށް ބަލައިގެންތޯ ނުވަތަ ސިޔާސީ ވަފާތެރިކަމަށް ބަލައިގެންތޯ އެނގުމުގެ ފުރިހަމަ ހައްގު ދިވެހި ރައްޔިތުންނަށް ލިބިގެންވެ އެވެ.

މިފަދަ އަސާސީ ސުވާލަކަށް ޖަވާބު ދޭން އިންކާރު ކުރުމަކީ މި ޝައްކުތައް އިތުރަށް ބޮޑުވެގެންދާނެ ކަމެކެވެ.

ދިވެހިރާއްޖެއަކީ ކުޑަ ގައުމެކެވެ. ކަންކަން ހިނގާގޮތް ރައްޔިތުންނަށް ފާހަގަވެއެވެ. ނޫސްވެރިންނަށް އެނގެއެވެ. އަދި ބައިނަލްއަގުވާމީ މުޖުތަމައުންވެސް އެ މަންޒަރު ބަލަމުންދެއެވެ. ނުވިތާކަށް ސަރުކާރުގެ ތަރުޖަމާނުން ބަދަލުވަނީވެސް މޫސުން ބަދަލުވާ ބީދައިންނެވެ. ނަމަވެސް މޫނުތަކާއި މަގާމުގެ ނަންތައް ބަދަލުވި ނަމަވެސް، ކަން ހިނގާ ގޮތަކަށް ބަދަލެއް ނާދެ އެވެ. ސާފު މައުލޫމާތެއް ނުލިބެއެވެ. ޖަވާބުދާރީވުމެއް ނެތެވެ.