އިސްލާމިކް މިނިސްޓްރީ އިން އެދިގެން ދެފަހަރަށް ފަސްކުރި އައިކޮމް ގެ އަޑުއެހުމަށް ހާޒިރު ނުވުމުން މިނިސްޓްރީ ޖޫރިމަނާ ކޮށްފި

ދެފަހަރަށް އިސްލާމިކް މިނިސްޓްރީ އިން އެދިގެން ފަސްކުރި އިންފޮރމޭޝަން ކޮމިޝަނަރުގެ އޮފީސް (އައިކޮމް) ގެ އަޑުއެހުމަށް ހާޒިރު ނުވުމުން މިނިސްޓްރީ ޖޫރިމަނާ ކޮށްފި އެވެ. 

މިކަމާއި ގުޅިގެން އައިކޮމް އިން ނެރުނު ބަޔާނެއްގައި ބުނެފައިވަނީ ދެ ފަހަރަށް މިނިސްޓްރީ އިން އެދިގެން ފަސްކުރި އަޑުއެހުން ތާވަލުކޮށް އަޑު އެހުން ފެށި އިރު ވެސް މިނިސްޓްރީ އިން ހާޒިރުވެފައި ނުވާތީ އިސްލާމިކް މިނިސްޓްރީ ޖޫރިމަނާ ކޮށްފައިވާ ކަމަށެވެ. މިނިސްޓްރީ ޖޫރިމަނާ ކުރީ 700 ރުފިޔާ އިންނެވެ. 

އައިކޮމް އިން ނެރުނު ބަޔާނެއްގައި ބުނެފައިވަނީ އިސްލާމިކް މިނިސްޓްރީ ޖަވާބުދާރީވާންޖެހޭ މައްސަލައަކާއި ގުޅޭ އަޑުއެހުމެއް މި މަހުގެ 3 ވަނަ ދުވަހަށް ތާވަލު ކުރި ކަމަށެވެ. ނަމަވެސް މިނިސްޓްރީގެ އެދުމުގެ މަތިން އެ އަޑުއެހުން ފަސް ކުރުމަށްފަހު އާދީއްތަ ދުވަހު އެ އަޑުއެހުން އަނެއްކާ ވެސް ތާވަލު ކުރި ކަމަށެވެ. ނަމަވެސް ދެވަނަ ފަހަރަށް މިނިސްޓްރީ އިން އެދިގެން ހޯމަ ދުވަހަށް އަޑުއެހުން ފަސްކުރި ކަމަށާއި، ނަމަވެސް އަޑުއެހުން ފެށުނު އިރު ވެސް އިސްލާމިކް މިނިސްޓްރީ އިން ހާޒިރު ނުވާ ކަމަށެވެ. 

އައިކޮމް އިން ބުނީ 2 ފަހަރެއްގެ މަތިން އަޑު އެހުން ފަސްކުރުމަށް މިނިސްޓްރީ އިން އެދިގެން ހޯމަ ދުވަހަށް ތާވަލު ކުރި އަޑު އެހުމަށް އިސްލާމިކް މިނިސްޓްރީ އިން ހާޒިރު ނުވި ސަބަބެއް ހާމަކޮށްފައި ނުވާ ކަމަށެވެ. 

އައިކޮމް އިން ބުނީ އިސްލާމިކް މިނިސްޓްރީގެ މި އަމަލަކީ އެ އޮފީހުގެ ވާޖިބުތައް އަދާކުރުމަށް ހުރަސްއެޅުން ކަމުގައި ގަބޫލުކުރާ ކަމަށެވެ. މީގެ އިތުރުން އައިކޮމް އިން ވަނީ އެ އޮފީހުން އަޑުއެހުން ތާވަލުކޮށް އޮންނަ ގަޑިއަށް ހާޒިރު ނުވެވޭ ފަރާތްތަކުން މަދުވެގެން އަޑު އެހުން ފެށުމުގެ 1 ގަޑި އިރު ކުރިން އަންގަން ޖެހޭނެ ކަމަށް މައުލޫމާތު ހޯދުމާއި ލިބިގަތުމުގެ ގަވާއިދުގައި ވެސް ބަޔާން ކުރާ ކަމަށެވެ.