500 ސިޔާސީ މުވައްޒަފުން ވަކިކުރަން އުޅޭ ވާހަކަ، ޗީފް ސްޕޯކްސްޕާސަން މުންދު ދޮގު ކުރައްވައިފި
ސަރުކާރުގެ އޮނިގަނޑު އިސްލާހުކުރުމުގެ މަސައްކަތުގެ ދަށުން ސިޔާސީ މުވައްޒަފުންގެ ފެންވަރު ބެލުމަށް ފަހު ބަދަލުތައް ގެންނަމުންދާނީ ވަކި އަދަދެއް ކަނޑައަޅާފައި ނުވާ ކަމަށް ރައީސް އޮފީހުން ހާމަކޮށްފި. މިނިސްޓްރީތަކުން ފޮނުވާ ޕާފޯމެންސް ރިޕޯޓްތަކަށް ބަލައި މުވައްޒަފުން ވަކިކުރުމާއި އެހެން މަގާމުތަކަށް ބަދަލުކުރުން ކުރިއަށްދާނީ ސަރުކާރުގެ ސިޔާސަތުތައް ތަންފީޒުކުރުމުގައި ނަތީޖާ ނެރެވޭނެ ގާބިލު މީހުން ކަށަވަރުކުރުމަށް.
ރައީސުލްޖުމްހޫރިއްޔާގެ އޮފީހުގެ ޗީފް ގަވަރންމަންޓް ސްޕޯކްސްޕާސަންކަމުގެ މަޤާމަށް މިނިސްޓަރުންގެ ފެންވަރުގައި މުޙައްމަދު ޙުސައިން ޝަރީފް (މުންދު) ޢައްޔަންކުރެއްވި ހރަސްމިއްޔާތުގެ ތެރެއިން | ރައީސް އޮފީސް
ސަރުކާރުގެ ސިޔާސީ މުވައްޒަފުންގެ ތެރެއިން 500 މުވައްޒަފުން ވަކިކުރަން އަންގާފައިވާ ކަމަށް ބުނެ މީޑިއާގައި ފެތުރެމުންދާ ވާހަކަތަކަކީ އެއްވެސް ހަގީގަތެއް ނެތް މައުލޫމާތެއް ކަމަށް ރައީސް އޮފީހުގެ ޗީފް ސްޕޯކްސްޕާސަން މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
މިކަމާ ގުޅޭގޮތުން ރާއްޖޭގެ މީޑިއާއަކަށް މައުލޫމާތު ދެއްވަމުން މުންދު ވިދާޅުވީ، ސަރުކާރުން މަސައްކަތް ކުރަމުން ދަނީ ވަކި އަދަދެއް ކަނޑައަޅައިގެން އެ އަދަދަށް މީހުން ވަކިކުރުމަށް ނޫން ކަމަށެވެ. އަދި ރައީސްގެ ސިޔާސަތުތަކަށް އިޚްލާސްތެރިކަމާއެކު އެންމެ ފުރިހަމަ އެއްބާރުލުން ދެއްވޭނެ ބޭފުޅުން އެބޭފުޅެއްގެ ފަންނުވެރިކަމާ ގުޅުންހުރި ދާއިރާއެއްގައި ހުންނަވާނެ ކަމަށް މުންދު ވިދާޅުވި އެވެ.
ސަރުކާރުގެ އޮނިގަނޑަށް ގެނައި ބަދަލާއެކު، މަޤާމުތަކުން ވަކިކުރާނެ މުވައްޒަފުންގެ އަދަދު އެނގޭނީ މިހާރު ކުރިއަށްދާ ޕާފޯމެންސް ރިޕޯޓްތައް ބަލައި އިވެލުއޭޓް ކުރުމަށްފަހުގައި ކަމަށް އޭނާ ފާހަގަކުރެއްވި އެވެ. އަދި އެކަމުގައި ސަރުކާރުގެ ވަކި އަދަދެއް ނެތްކަމަށް ތަކުރާރުކޮށް މުންދު ވަނީ ވިދާޅުވެފަ އެވެ.
މުންދު ވިދާޅުވީ، ގާތްގަނޑަކަށް ހުރިހާ މިނިސްޓްރީތަކެއްގެ މެންޑޭޓަށް އައި ބަދަލުތަކާއެކު އޮނިގަނޑު ރީސްޓްރަކްޗާ ކުރުމުގެ މަސައްކަތް މިހާރު ކުރިއަށްދާ ކަމަށެވެ. ރައީސް އޮފީހުގެ އެންގުމަށް ހުރިހާ ސިޔާސީ މުވައްޒަފުންގެ ޕާފޯމެންސް ރިޕޯޓްތައް ތައްޔާރުކޮށް ފޮނުވުމުގެ މަސައްކަތް މިނިސްޓްރީތަކުން ކުރަމުންދާއިރު، މިއީ ކޮންމެ އަހަރަކު ވެސް ކުރަމުން އަންނަ އާންމު ކަމެއްކަން އޭނާ ފާހަގަކުރެއްވި އެވެ.
އެހެންނަމަވެސް ހުރިހާ ރިޕޯޓެއް ލިބި އިވެލުއޭޝަންތައް އެއްކޮށް ނިމެންދެން ސަރުކާރުން މަޑު ނުކުރާނެ ކަމަށާއި، ރިޕޯޓްތައް ލިބި އިވެލުއޭޝަންތައް ނިމެމުންދާ ވަރަކަށް މުވައްޒަފުން ވަކިކުރުމާއި، އެކި ތަންތަނަށް އަލުން އެސައިން ކުރުމުގެ މަސައްކަތް ކުރަމުންދާކަން މުންދު ފާހަގަކުރެއްވި އެވެ.
އިވެލުއޭޝަންތަކުގެ މައިގަނޑު ބޭނުމަކީ މުވައްޒަފުންގެ މަސައްކަތުގެ ފެންވަރު ބެލުން ކަމަށާއި، ސަރުކާރުގެ އަމާޒަކީ ސިޔާސީ މަގާމުތަކުގައި ތިއްބަވާ ބޭފުޅުންނަކީ ނަތީޖާ ނެރެދޭ، ގާބިލު ބޭފުޅުންނަށް ހެދުން ކަމަށް މުންދު ވަނީ ވިދާޅުވެފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި ސިޔާސީ މަގާމުގެ އަދަދު ރައީސް ވައުދުވެ ވަޑައިގެންނެވި ވަރަށް ވުރެ އިތުރު ކަން ސަރުކާރުގެ ރަސްމީ ތަފާސް ހިސާބުތަކުން ވެސް ދައްކަ އެވެ. ރައީސް އޮފީހުން ނެރުނު ބަޔާނެއް ގައި ބުނެފައި ވަނީ ސިޔާސީ މަގާމުތަކުގައި 922 މުވައްޒަފުން ތިބި ކަމަށެވެ. ނަމަވެސް ރައީސް މުއިއްޒު ގެ ސަރުކާރުގައި ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ވަނީ ވައުދުވެފަ އެވެ.
އިދިކޮޅު ފާރާތްތަކުން ތުހުމަތު ކުރާ ގޮތުގަ މިސަރުކާރުގެ ސިޔާސީ މަގާމުތަކުގެ އަދަދު 3000 އަށް ވުރެ ގިނަ އެވެ.
