އެމްޑީޕީގެ މުޒާހަރާތައް ހުއްޓާލަން އީސީ އިން އެންގުމުން މުޒާހަރާގެ ބައިވެރިންގެ ފާޑުކިޔުން އީސީ އަށް
އެމްޑީޕީން ކުރިއަށްގެންދާ މުޒާހަރާތައް ހުއްޓާލުމަށް އިލެކްޝަންސް ކޮމިޝަނުން އެންގި އެންގުމަށް އެ ޕާޓީން ވަނީ ވަރަށް ބޮޑަށް ފާޑުކިޔައި، އެ ކޮމިޝަނުގެ ރައީސަށް ކޮރަޕްޝަނުގެ ތުހުމަތުތަކެއް ކޮށްފަ. ސަރުކާރަށް 12 ޑިމާންޑެއް ހުށަހަޅައިގެން ކުރިއަށްގެންދާ މި މުޒާހަރާތަކުގައި ފުލުހުން އަމަލުކުރަމުންދަނީ ގާނޫނާ ހިލާފަށް ކަމަށްވެސް އެމްޑީޕީން ތުހުމަތުކުރޭ.
އެމްޑީޕީގެ ސިލްސިލާ މުޒާހަރާގެ ތެރެއިން 29.04.2026 | ސްކްރީން އިމޭޖް
ސިލްސިލާކޮށް އިދިކޮޅު އެމްޑީޕީ އިން ހިންގަމުންދާ މުޒާހަރާތައް ހުއްޓާލަން އީސީ އިން އެންގުމުން މުޒާހަރާގެ ބައިވެރިންގެ ފާޑުކިޔުން އީސީ އަށް އަމާޒުކޮށްފި އެވެ.
އެމްޑީޕީ އިން ބުދަ ދުވަހުގެ ރޭ ބޭއްވި މުޒާހަރާގައި އެމްޑީޕީގެ ތިމަރަފުށީ ދާއިރާގެ ރައީސް އަންވަރު އިބްރާހީމް ވިދާޅުވީ އެމްޑީޕީގެ މުޒާހަރާތައް ކުރިއަށް ނުގެންދިއުމަށް އިލެކްޝަންސް ކޮމިޝަނުން އެމްޑީޕީ އަށް އަންގާފައިވާ ކަމަށެވެ. އަދި ސިޔާސީ ޕާޓީތަކުގެ ވެރިންނަށް ޒާތީ ގޮތުން ދިމާ ނުކުރުމަށް އީސީ އިން އަންގާފައިވާ ކަމަށް ވެސް އޭނާ ވިދާޅުވި އެވެ. އެފަދަ ކަމެއް އެމްޑީޕީގެ މުޒާހަރާތަކުގައި ނުހިނގާ ކަމަށް އޭނާ ވިދާޅުވި އެވެ. އިލެކްޝަންސް ކޮމިޝަންގެ ރައީސް މުހައްމަދު ޒާހިދު އަކީ ކޮރަޕްޓް ބޭފުޅެއް ކަމަށް ތުހުމަތު ކުރައްވާ އަންވަރު ވަނީ އޭނާ މަޤާމުން ދުރުކުރަން ޖެހޭ ކަމަށް ވިދާޅުވެފަ އެވެ.
"އޭނާ އެ ވަނީ 32،000 އަށް ވުރެ ގިނަ މީހުން ޕާޓީ އަކަށް ވަގަށް ވައްދާފައި. މިހާރު އެ ދަނީ އެމްޑީޕީ ޖޫރިމަނާކުރަން ތައްޔާރު ވަމުން. ޕާޓީ އަށް ފައިސާ ނުދީ އެ ފައިސާ އަކީ ޖޫރިމަނާ ފައިސާ އަށް ހަދަން އެ ވިސްނަނީ." އޭނާ ވިދާޅުވި އެވެ.
މީގެ އިތުރުން އެ މުޒާހަރާގައި ފުލުހުން، މުޒާހަރާތައް ހުއްޓުވުމަށް މަސައްކަތް ކުރާ ގޮތަށް މުޒާހަރާގެ ބައިވެރިން ވަނީ ފާޑު ކިޔާފަ އެވެ. އެ މުޒާހަރާގައި ޤާނޫނީ ވަކީލް މުހައްމަދު ނިޝާން ވަނީ ފުލުހުން އަމަލުކުރަމުން ދަނީ ޤާނޫނާއި ޤަވާއިދާއި ޚިލާފަށް ކަމަށް ވިދާޅުވެފަ އެވެ.
އެމްޑީޕީގެ ސިލްސިލާ މުޒާހަރާތައް ކުރިއަށް ގެންދަނީ ކޮންމެ ރެއެއްގެ 09:00 އިން 12:00 އަށެވެ. މި މުޒާހަރާތަކުގައި އެމްޑީޕީ އިން ދަނީ 12 ޑިމާންޑެއް ސަރުކާރަށް ކުރަމުންނެވެ.
