މޭޔަރު އާޒިމަށް ހަމަލާދިން މީހާ ހަައްޔަރުކޮށް، 15 ދުވަހަށް ބަންދުކޮށްފި
މާލޭ ސިޓީގެ މޭޔަރު އާދަމް އާޒިމަށް ހަމަލާދިން ކަމުގެ ތުހުމަތުގައި ހައްޔަރުކުރި މީހާ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ 15 ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފަ. މޭޔަރަށް ހަމަލާދިން މައްސަލައިގައި ހައްޔަރުކުރީ ގ. އީރީ، އަބްދުއްލާ މުއާޒް. ފުލުހުންގެ ރެކޯޑްތަކުން ދައްކާގޮތުން އޭނާ ވަނީ 2012 ވަނަ އަހަރު ފްލެޓްތެރޭގައި ވަޅިޖެހި މައްސަލައެއްގައި ވެސް ހައްޔަރުކޮށްފަ.
އެމްޑީޕީ އިން ހުކުރު ދުވަހުގެ ރޭ ބޭއްވި މުޒާހަރާގެ ތެރެއިން | ރާއްޖެ އެމްވީ
މާލޭ ސިޓީ މޭޔަރު އާދަމް އާޒިމަށް ހަމަލާދިނުމުގެ ތުހުމަތުގައި މީހަކު ހައްޔަރުކޮށް އެމީހާ 15 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފި އެވެ.
އެމްޑީޕީ އިން ހުކުރު ދުވަހުގެ ރޭ ބޭއްވި މުޒާހަރާގެ ތެރެއިން މޭޔަރަށް ހަމަލާދިން މައްސަލައިގައި ހައްޔަރުކުރީ ގ. އީރީ، އަބްދުالله މުއާޒް، 35 އަހަރެވެ.
މީހެއްގެ ގައިގައި ޖެހުމުގެ ތުހުމަތުގައި މުއާޒް ވަނީ ހޯމަ ދުވަހު ކްރިމިނަލް ކޯޓަށް ހާޒިރުކޮށްފަ އެވެ. ކޯޓު އަމުރުގައި ބުނެފައިވާ ގޮތުގައި، އެމްޑީޕީ އިން ކުރިއަށްގެންދިޔަ މުޒާހަރާގެ ތެރެއިން މުއާޒް މަސައްކަތްކޮށްފައި ވަނީ އާޒިމްގެ ގައިގައި އަތްލައި މާރާމާރީ ހިންގަން ކަމަށް ފުލުހުން ބުނެފައި ވެ އެވެ.
ނަމަވެސް މުއާޒް ކޯޓުގައި ބުނެފައިވަނީ މޭޔަރު ކައިރިއަށް ދިޔައީ ވާހަކަދައްކަން ކަމަށާއި، އޭނާއާމެދު މާރާމާރީ ހިންގީ މުޒާހަރާގެ ބައިވެރިން ކަމަށެވެ. ކޯޓު އަމުރުގައި ވާގޮތުން މުއާޒަކީ ހައްޔަރާއި ބަންދު ރެކޯޑު އޮތް މީހެކެވެ. ފުލުހުންގެ ރެކޯޑްތަކުން ދައްކާގޮތުން އޭނާ ވަނީ 2012 ވަނަ އަހަރު ފްލެޓްތެރޭގައި ވަޅިޖެހި މައްސަލައެއްގައި ވެސް ހައްޔަރުކޮށްފަ އެވެ.
ކްރިމިނަލް ކޯޓުން ނިންމީ މުއާޒް ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށެވެ. އެހެންކަމުން އޭނާ 15 ދުވަހަށް ބަންދުކުރުމަށް ކޯޓުން އަމުރުކޮށްފައިވެ އެވެ.
ހުކުރު ދުވަހުގެ ރޭ މާލޭގެ ބޮޑެތި މަގުތަކުގައި އެމްޑީޕީން ކުރިއަށްގެންދިޔަ މުޒާހަރާގެ ތެރެއިން މާލެ ސިޓީގެ މޭޔަރު އާދަމް އާޒިމަށް ވަނީ މީހަކު ހަމަލާދީފަ އެވެ. މުޒާހަރާގެ ބައިވެރިން ހިނގާފައި ދަނިކޮށް މަގުގެ އަރިމަތީގައި ހުރި މީހަކު ވަނީ އާޒިމްގެ މޭމަތީގައި އަތްއަޅައި ކޮއްޕާލާފައެވެ. އެވަގުތު އާޒިމްގެ އަރިހުގައި ތިބި މުޒާހަރާގެ ބައިވެރިން ވަނީ އޭނާގެ ހިމާޔަތުގައި އެމީހާ ދުރަށް ޖައްސާފަ އެވެ.
މި ހާދިސާ ހިނގި ސަރަހައްދުގައި ފުލުހުން ހަރަކާތްތެރިވި ނަމަވެސް، އާޒިމަށް ހަމަލާދިން މީހާ އެވަގުތު ހައްޔަރުކޮށްފައި ނުވާކަން ފާހަގަކުރެވެ އެވެ.
މި ހަމަލާއަށް ފަހު މުޒާހަރާގެ ތެރެއިން ރާއްޖެ ޓީވީ އަށް ދެއްވި އިންޓަވިއުއެއްގައި މޭޔަރު އާޒިމް ތުހުމަތުކުރެއްވި ގޮތުގައި މިއީ ސަރުކާރުން ގަސްތުގައި ރާވައިގެން ހިންގި އަމަލެކެވެ. ނަމަވެސް މިފަދަ ބިރުދެއްކުމުގެ އަމަލުތަކުން އެމްޑީޕީ ފަހަތަށް ނުޖެހޭނެ ކަމަށާއި، ސަރުކާރު ހަމަމަގަށް އެޅުވުމަށް ކުރާ މަސައްކަތް ހުއްޓާނުލާނެ ކަމަށް އޭނާ ވިދާޅުވި އެވެ.
އެމްޑީޕީގެ ޗެއާޕާސަން އަބްދުލްގަފޫރު މޫސާ ވެސް ވަނީ މި ހަމަލާ ހަރުކަށި އިބާރާތުން ކުށްވެރިކުރައްވައި، ސަރުކާރު ޖަވާބުދާރީކުރުވުމުގައި ދެމިތިބޭނެ ކަމަށް ވިދާޅުވެފަ އެވެ. މި ހަމަލާއާއި ގުޅިގެން ސިޔާސީ ހަރަކާތްތެރިން ވަނީ ސަރުކާރަށް ފާޑުކިޔާ، މުޒާހަރާކުރާ މީހުންގެ ސަލާމަތާއި ރައްކާތެރިކަން ކަށަވަރުކުރުމަށް ގޮވާލާފަ އެވެ.
