ޚަރަދުކުޑަކުރުމާއި ސިޔާސީ މުވައްޒަފުން މަދުކުރުމަށް ސަރުކާރުން ކުރާ މަސައްކަތުގެ ތަފްސީލް ވަޒީރުންނަށް ހިއްސާކޮށެއް ނުދެވުނު
އެމްބަސީތައް ހިމެނޭހެން ގިނަ އަދަދަކަށް ސަރުކާރުގައި ސިޔާސީ މުވައްޒަފުން ތިބުމަކީ އާއްމުންގެ ބޮޑު ކަންބޮޑުވުމެއް. ޚަރަދު ކުޑަ ކުރަން ކުރާ މަސައްކަތްތަކުގެ ތަފްސީލް ވަޒީރުންނަށް ރަނގަޅަށް ހިއްސާ ނުކުރެވޭ.
އީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގެ ތެރެއިން | ސްކްރީން އިމޭޖް
ޚަރަދުކުޑަކުރުމާއި ސިޔާސީ މުވައްޒަފުން މަދުކުރުމަށް ސަރުކާރުން ކުރާ މަސައްކަތުގެ ތަފްސީލާއި ގުޅޭ ގޮތުން ސުވާލުކުރުމުން، އެ މަސައްކަތް ކުރިއަށް ދިޔަ ނަމަވެސް އެކަމުގެ ތަފްސީލް ނޭނގޭ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެ އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރާއްޖެޓީވީގެ ނޫސްވެރިޔާ ވަނީ ސަރުކާރުން ޚަރަދު ކުޑަކުރަން ފިޔަވަޅުތަކެއް އަޅަން ނިންމާފައިވާކަން ހާމަކުރައްވާފައިވާ އިރު ޚަރަދު ކުޑަ ކުރުމުގެ ސިޔާސަތު ކިހާ ހިސާބަކަށް ގޮސްފައިވޭތޯ ސުވާލުކޮށްފަ އެވެ.
އެ ސުވާލުގެ ޖަވާބުގައި ވަޒީރު ޒަމީރު ވިދާޅުވީ ރައީސް ޑރ. މުހައްމަދު މުއިއްޒު އަންގަވާފައިވާ ގޮތަށް އެ މަސައްކަތް ކުރިއަށް ދާ ކަމަށާއި އެކަމާއި ގުޅޭ ސީދާ ތަފްސީލެއް އަދި ލިބިވަޑައިގަންނަވާފައި ނެތް ކަމަށެވެ. އަދި ޕީސީބީ އިން ވެސް އެކަމަށް މަސައްކަތްތަކެއް ކުރަމުންދާ ކަމަށް ވަޒީރު ވަނީ ވިދާޅުވެފަ އެވެ. ޒަމީރު ވަނީ މީހުން ވަކިކުރުމުގެ މަރުހަލާ އަކީ އެއް ދުވަހުން ކުއްލިއަކަށް މުވައްޒަފުން ކަނޑާލެވޭ ވަރަށް ވުރެ އިތުރަށް ބޮޑަށް ބަލައިގެން ކުރިއަށް ގެންދަން ޖެހޭ މަރުހަލާ އަކަށް ވުމުން އެ ކަމަށް ވަގުތު ހޭދަވާ ކަމަށް ފާހަގަކުރައްވާފަ އެވެ.
"އަޅުގަނޑު ކުރިން ވެސް ހަނދާންވޭ މިފަދަ ބައެއް ޑޭޓާ ދެންނެވިން. ޕޮލިޓިކަލް އެޕޮއިންޓީސްގެ ކަންކަން ކުރިއަށް ގެންދަނީ ރައީސް އޮފީހުން. ސަރުކާރުގެ ޖުމްލަ ޚަރަދުގެ 1% އަށް ވުރެ ވެސް މަދު އަދަދެއް އަޅުގަނޑުމެން ސިޔާސީ މުވައްޒަފުންނަށް މި ހޭދަ ކުރަނީ." ވަޒީރު ވިދާޅުވި އެވެ.
ނޫސްވެރިންގެ އެ ބައްދަލުވުމުގައި ރާއްޖެޓީވީ އިން ވަނީ މެލޭޝިއާގައި ހުންނަ އެމްބަސީގައި ގިނަ އަދަދެއްގެ ސިޔާސީ މުވައްޒަފުން ތިބުމުން އެކަމާ ގުޅޭގޮތުން ވެސް ސުވާލުކޮށްފަ އެވެ. އެ ގޮތުން އެތަނުގައި މެލޭޝިއާ ސަރުކާރުން ހުއްދަދީފައިވާ މިންވަރަށް ވުރެ އިތުރަށް މުވައްޒފުން ތިބި ކަމަށާއި ތިން މަހުން ތިން މަހުން މުވައްޒަފުން ބަދަލުކުރާ ގޮތަށް މުވައްޒަފުން ތިބިކަމުގެ މައުލޫމާތު ލިބިފައިވާތީ އެކަމާ މެދު ވަނީ ސުވާލުކޮށްފަ އެވެ.
ފޮރިން މިނިސްޓަރު އިރުތިޝާމް އާދަމްގެ ޖަވާބުގައި މެލޭޝިޔާގެ އެމްބަސީގައި ތިބި މުވައްޒަފުންގެ އަދަދު ހާމަ އެއް ނުކުރައްވަ އެވެ. ވަޒީރު ވިދާޅުވީ އެމްބަސީތައް ހިންގަނީ ގާބިލް މުވައްޒަފުން ނަގައިގެން ޚިދުމަތަށް ދަތި ނުވާގޮތަށް ކަމަށެވެ. އަދި މަސައްކަތް ކުރަނީ ފޮރިން ސަރވިސް ޤާނޫނުގެ ދަށުން ބުނާ މިންވަރަށް މުވައްޒަފުން ބޭތިއްބުމަށް ކަމަށް އިރުތިޝާމް ވިދާޅުވި ނަމަވެސް މެލޭޝިއާގެ ސަރުކާރުން ހުއްދަދީފައިވާ މިންވަރަށް ވުރެ އިތުރަށް މުވައްޒފުން ތިބި ކަމަށް ބުނާ ވާހަކަ ވަޒީރު ދޮގުކުރައްވާފަ އެއް ނުވެ އެވެ.
އެމްބަސީތައް ހިމެނޭހެން ގިނަ އަދަދަކަށް ސަރުކާރުގައި ސިޔާސީ މުވައްޒަފުން ތިބުމަކީ އާއްމުންގެ ބޮޑު ކަންބޮޑުވުމެކެވެ.
