14 ވަޒީރަށް ރުހުން ދިނުމަށް ކޮމިޓީން ފާސްކޮށްފި
ރައީސުލްޖުމްހޫރިއްޔާ ވަޒީރުންގެ މަޖިލީހަށް ގެންނެވި ބަދަލުތަކާއެކު ވުޒާރާތަކުގެ އަދަދު 20 އިން 15 އަށް ވަނީ މަދުކުރައްވާފަ. މި އިސްލާހީ ބަދަލުތަކާ ގުޅިގެން އަލުން ހުވާކުރެއްވި 14 ވަޒީރަކަށް ރުހުން ދިނުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިހާރު ވަނީ އިއްތިފާގުން ފާސްކޮށްފަ. ކޮމިޓީގެ މި ނިންމުމާއެކު، ދެން އޮންނާނީ މަޖިލީހުގެ ތަޅުމުގައި މި ވަޒީރުންނަށް ރުހުން ދިނުމާ މެދު ފަހުގެ ގޮތެއް ނިންމުން.
ވަޒީރުންގެ މަޖިލީހުގެ މެންބަރުންގެ ޢަދަދު 15އަށް މަދުކުރައްވައި، ޢައްޔަނުކުރެއްވި 12 ވަޒީރުން ރައީސުލްޖުމްހޫރިއްޔާގެ ކުރިފުޅުމަތީ މަޤާމުގެ ހުވައި ކުރައްވުމުގެ ރަސްމިއްޔާތުގެ ތެރެއިން | ރައީސް އޮފީސް
އެޕްރީލް 4 ވަނަ ދުވަހު ބޭއްވި އިންތިހާބު ތަކުން ސަރުކާރާށް ލިބުނު ބޮޑު ނާކާމިޔާބީ އާއެކު، ރައީސް މުޢިއްޒު ވަޒީރުންގެ މަޖިލީހަށް ގެންނެވި ބަދަލުތަކާ ގުޅިގެން، އަލަށް ހުވާކުރެއްވި ވަޒީރުންނަށް ރުހުން ދިނުމަށް ފެންނަ ކަމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ހޯމަ ދުވަހު ފާސްކޮށްފި އެވެ.
އަލަށް ހުވާ ކުރެއްވި 14 ވަޒީރުންނަށް ރުހުން ދިނުމަށް ނިންމާފައިވަނީ މި މައްސަލަ ދިރާސާކުރުމަށް ބޭއްވި ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ.
ވަޒީރުންނަށް ރުހުން ހޯއްދެވުމަށް މަޖިލީހަށް ފޮނުއްވި މައްސަލަ ދިރާސާކުރުމުގައި ކޮމިޓީ އިން ނިންމީ، ދެ މައްސަލައެއްގެ ގޮތުގައި މަޖިލީހަށް ހުށަހެޅިފައިވާ، 14 ވަޒީރުންގެ މައްސަލަ އެއް މައްސަލައެއްގެ ގޮތުގައި ކުރިއަށް ގެންދިއުމަށެވެ. އަދި ހުރިހާ ވަޒީރުންނަށް ރުހުން ދިނުމާ މެދު އެކުގައި ވޯޓަށް އެހުމަށް ވެސް ކޮމިޓީން ވަނީ ނިންމާފަ އެވެ.
ވަޒީރުންގެ މަޖިލީހަށް މި މަހުގެ 14 އަދި 15 ވަނަ ދުވަހު ރައީސް މުއިއްޒު ގެންނެވި ބަދަލުތަކާއެކު ވަޒީރުންގެ މަޖިލީހުގެ އަދަދު ވަނީ 20 އިން 15 އަށް މަދުކުރައްވާފަ އެވެ. މި ބަދަލުތަކުގެ ތެރެއިން 10 ވަޒީރަކު މަގާމުން އިސްތިއުފާ ދެއްވިއިރު، ރައީސުލްޖުމްހޫރިއްޔާ ވަނީ އައު ފަސް ވަޒީރަކު އައްޔަންކުރައްވާފަ އެވެ. މީގެ އިތުރުން ކުރިން ވެސް ކެބިނެޓުގައި ހިމެނިވަޑައިގެންނެވި ނުވަ ވަޒީރަކު ވަނީ ވުޒާރާތަކަށް ގެންނެވި ބަދަލުތަކާ ގުޅިގެން އަލުން މަގާމުގެ ހުވާކުރައްވާފަ އެވެ.
ޤާނޫނުއަސާސީގައިވާ ގޮތުގެ މަތިން، ރައީސުލްޖުމްހޫރިއްޔާ ވަޒީރުންގެ މަޖިލީހަށް ގެންނަވާ ބަދަލުތަކާ އެކު މަގާމުގެ ހުވާކުރައްވާ ވަޒީރުންނަށް ފުރިހަމަ ޤާނޫނީ ބާރުވެރިކަން ލިބޭނީ ރައްޔިތުންގެ މަޖިލީހުގެ ރުހުން ލިބިވަޑައިގަތުމުންނެވެ.
ރައީސުލްޖުމްހޫރިއްޔާ މި މައްސަލަ ރައްޔިތުންގެ މަޖިލީހުގެ ރުހުން ހޯއްދެވުމަށް ފޮނުއްވާފައި ވަނީ މި މަހުގެ 20 ވަނަ ދުވަހު ބޭއްވި މަޖިލީހުގެ ޖަލްސާގަ އެވެ. ކޮމިޓީ އިން މިހާރު މި މައްސަލަ ނިންމާފައިވާތީ، ކުރިއަށް އޮތް ރަސްމީ ޖަލްސާއެއްގައި މި ވަޒީރުންނަށް ރުހުން ދިނުމާ މެދު މުޅި މަޖިލީހުން ގޮތެއް ނިންމާނެއެވެ.
