މީޑިއާ ތަކަށް އަރައި ބޭސް ގެނަސްފީމޭ، ކުންފުނި އުފައްދައިފީމޭ ސަރުކާރުން ބުންޏަސް، ރައްޔިތުންނަށް ބޭސް ނުލިބޭނަމަ އެކަން ގަބޫލު ނުކުރާނެ: ފުވައްމުލަކު މޭޔަރު
ރާއްޖޭގެ ހުރިހާ ރަށަކަށް ބޭސް ނުލިބުމުގެ މައްސަލަ ކުރިމަތިވެ، އާސަންދައިން ލިބޭ ބޭސްތައް މަދުވުމުގެ ޝަކުވާ ބޮޑުވެފައިވާ ކަމަށް ފުވައްމުލަކު ސިޓީގެ މޭޔަރު އިސްމާއިލް ރަފީގް ވިދާޅުވެއްޖެ. ސަރުކާރުން ބޭސް ގެންނަ ކަމަށް ބުނި ނަމަވެސް އާންމުންނަށް އޭގެ ފައިދާ ނުކުރާކަން ފާހަގަކުރައްވައި، ސިޔާސީ މުވައްޒަފުންގެ މުސާރައަށްވުރެ ރައްޔިތުންގެ އަސާސީ ޚިދުމަތްތަކަށް އިސްކަންދޭން ޖެހޭ ކަމަށް އޭނާ ވިދާޅުވި. މި މައްސަލައިގައި އާންމުން ބޮޑު ތަކުލީފެއް އުފުލަމުންދާއިރު، މިއީ ޚަރަދު ކުޑަކުރުމުގެ ނަމުގައި ރައްޔިތުން މަހުރޫމްކުރާ ޚިދުމަތެއްތޯ ވެސް މޭޔަރު ވަނީ ސުވާލު އުފައްދަވާފަ.
ފުވައްމުލައް ސިޓީގެ މޭޔަރ އިސްމާއިލް ރަފީގް ރާއްޖެޓީވީ ގެ ފަލަސުރުހީ ޕްރޮގްރާމްގައި ވާހަކަދައްކަވަނީ | ރާއްޖެ އެމްވީ
ރައްޔިތުންނަށް ބޭސް ނުލިބޭ މައްސަލައިގައި މި ސަރުކާރުގެ ބޭފުޅުން މީޑިއާ ތަކަށް އަރައި، ބޭސް ގެނަސްފީމޭ ނުވަތަ ބޭސް ގެންނަން ކުންފުނި އުފައްދާފައިވާ ކަމަށް ބުނި ނަމަވެސް ރައްޔިތުންނަށް ބޭސް ނުލިބޭނަމަ އެކަން ގަބޫލު ނުކުރާނެ ކަމަށް ފުވައްމުލަކު ސިޓީގެ މޭޔަރު އިސްމާއިލް ރަފީގް ވިދާޅުވެއްޖެ އެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ރަފީގް ވިދާޅުވީ މިއަދު އެންމެ ގިނަ އަދަދެއްގެ ރައްޔިތުން ކުރާ ޝަކުވާ އަކީ އަދި މިއަދު މުޅި ރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ ބޭސް ނުލިބުމުގެ މައްސަލަ ކަމަށެވެ. ހަމައެކަނި ފުވައްމުލަކު ސިޓީ އެކަނި ނޫން ކަމަށާ މިއީ ކޮންމެ ރަށެއްގެ ވެސް ހާލަތު ކަމަށް ރަފީގް ވިދާޅުވި އެވެ.
މި ސަރުކާރުން މީޑިއާތަކުގައި ބޭސް ލިބިއްޖެ ކަމަށް ނުވަތަ ބޭސް ލިބޭނެ ކަމުގެ ޔަގީންކަން ދިން ނަމަވެސް ރައްޔިތުންނަށް އެ ބޭސްތައް ނުލިބޭ ކަމަށާ ރައްޔިތުންނަށް އެކަން ގަބޫލު ނުކުރެވެނީ އެހެން ވެސް ކަމަށް ވެސް މޭޔަރު ވިދާޅުވި އެވެ.
އެންމެ ގިނައިން ރައްޔިތުން ކުރާ ޝަކުވާ އަކީ އަދި ދިމާވާ މައްސަލައަކީ ބޭހުގެ މައްސަލަ. ހަމަ ޔަގީނުން ވެސް ރަށެއްގަ، ފުވައްމުލަކުގަ އެކަންޏެއް ނޫން، ހުރިހާ ރަށެއްގަ ވެސް، ފުވައްމުލަކުގަ ވެސް ބޭސް ނުލިބިގެން ކުރާ ޝަކުވާ އިނގޭތޯ. އަލުގަނޑު މެންނަށް އަޑު އިވެނީ. އެހެންވީމާ ސަރުކާރުން އަދި ނޫސްތަކުގައި ބޭސް ގެނަސްފީމޭ ބުންޏަސް އެއަކުން ރައްޔިތުންނަށް ކުރި ފައިދާ އެއް ފަސޭހަ އެއް ނެތޭ ފެންނާކަށް. އެހެންވީމަ އެކަންތައްތައް ގަބޫލު ނުކޮށް އަދިވެސް ހަމަ މީޑިއާގަ ތިމަންނަމެން ބެސް ގެނަސްފީމޭ، ކުންފުނި އުފައްދައިފީމޭ، ހަވާލު ކޮށްފީމޭ މިހެން ބުންޏަސް ރައްޔިތުންގެ އަތަށް އެ ބޭސް ނުލިބެންޏާ ކޮބާތޯ އޭގެ ބޭނުމަކީ.ފުވައްމުލަކު ސިޓީގެ މޭޔަރު އިސްމާއިލް ރަފީގް
ރަފީގް ވަނީ ރައްޔިތުންނަށް ބޭސް ލިބުމުގައި އުނދަގޫތަކެއް ހުރި ކަމަށް ތަކުރާރު ކޮށް ވިދާޅުވެފަ އެވެ. އޭގެ އިތުރުން އާސަންދައިން ލިބޭ ބޭސްތައް ވެސް މިހާރު ނުލިބޭ ކަމަށާ ގަންނަން ޖެހޭ ބޭހުގެ އަދަދު ވެސް އިތުރު ވެފައިވާ ކަމަށް ރަފީގް ވިދާޅުވި އެވެ. މި ކަންކަމާއެކު ރައްޔިތުން އުޅެނީ ވަރަށް އުނދަގުލުގައި ކަމަށް ވެސް މޭޔަރު ވިދާޅުވި އެވެ.
މޭޔަރު ވިދާޅުވީ މިކަމުގައި ސަރުކާރުގެ ވިސްނުމަކީ ކޮބައިކަން ނޭނގޭ ކަމަށެވެ. އެގޮތުން ބޭސް ނުލިބެނީ ބަޖެޓް ކުޑަކުރާތީ ތޯ ސުވާލު އުފެދޭ އިރު މިއީ ޚަރަދު ކުޑަ ކުރަން އަޅާ ފިޔަވަޅެއްގެ ސަބަބުން ދިމާވާ ކަމެއް ނުވަތަ ސިޔާސީ މުވައްޒަފުންނަށް ބޮޑު މުސާރަ ދޭން ޖެހޭތީ ދިމާވާ ކަމެއް ތޯ ވެސް ސުވާލު އުފައްދަން ޖެހިފައިވާ ކަމަށް ރަފީގް ވިދާޅުވި އެވެ.
ސިޔާސީ ފަރާތްތަކަށް މުސާރަ ދޭން ހަދައިގެން ބަޖެޓުގައި އެކަމަށް އިސްކަން ދީގެން މަހަކު އެތައް ސަތޭކަ މިލިއަނެއް އެކަމަށް ޚަރަދު ކުރަނީ ތޯ ސާފު ނުވާއިރު އެ ފަރާތްތަކަށް ދޭ މުސާރަ ކުޑަކޮށްގެން ވިޔަސް ރައްޔިތުންނަށް ދޭން ޖެހޭ އަސާސީ ޚިދުމަތްތައް ދޭން ޖެހޭނެ ކަމަށް ރަފީގް ވިދާޅުވި އެވެ.
މި ފަހަކަށް އައިސް އެކަށީގެންވާ ސިއްހީ ފަރުވާ ނުލިބޭއިރު، މީގެ ކުރިން ލިބުނު އެންމެ އާދައިގެ ބޭސް ވެސް ނުލިބޭ ކަމުގެ ޝަކުވާ ވަނީ ބޮޑުވެފަ އެވެ. މިކަމާ ގުޅިގެން އިދިކޮޅު އެމްޑީޕީ އިން ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހެޅި އެވެ. ނަމަވެސް އެ މައްސަލަ ވަނީ މަޖިލީހުން ބޭރު ކޮށްލާފަ އެވެ.
