ބައެއް ފަރާތްތަކުން ދިވެހިރާއްޖޭގެ ކޯޓުތަކުގައި ޑްރާމާކުޅުން ބޮޑު ޖޯކަކަށް ވެފައިވޭ. ދައުވާ ކުރުން އަވަސްކުރަން ޖެހޭ: ޖިނާހު
ރާއްޖޭގެ ޖިނާއީ އަދުލުގެ ނިޒާމުގައި ދައުވާކުރުމަށް ހޭދަވާ މުއްދަތު ދިގުވުމުގެ ސަބަބުން، ކުށްކުރާ މީހުންނަށް ތުހުމަތުތަކުން ސަލާމަތްވުމުގެ ފުރުސަތު ބޮޑުވާކަމަށް ކުރީގެ އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ޖިނާހު ވިދާޅުވި. އޭނާ ފާހަގަކުރެއްވި ގޮތުގައި، ޝަރީއަތްތައް ލަސްވުމުގެ ނަތީޖާއަކީ ކޯޓުތަކުގައި ދޮގު ހެކި އުފައްދައިގެންނާއި އެކި ގޮތްގޮތުން "ޑްރާމާ" ކުޅެގެން މައްސަލަތަކުން ރެކުމަށް މަގުފަހިވުން.
ކުރީގެ އެސިސްޓެންޓް ކޮމިޝަނަރ އޮފް ޕޮލިސް، މުހައްމަދު ޖިނާހު | ރާއްޖެ އެމްވީ
ބައެއް ފަރާތްތަކުން ދިވެހިރާއްޖޭގެ ކޯޓުތަކުގައި ޑްރާމާކުޅުމަކީ ބޮޑު ޖޯކަކަށް ވެފައިވާ ކަމެއް ކަމަށާއި، ދައުވާކުރުމުގެ މަރުހަލާ އަވަސް ކުރަން ޖެހޭ ކަމަށް ކުރީގެ އެސިސްޓެންޓް ކޮމިޝަނަރ އޮފް ޕޮލިސް، މުހައްމަދު ޖިނާހު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މިހާރު ދައުވާ ކުރުމުގައި ހޭދަވާ މުއްދަތަކީ އެކަށީގެންވާ މިންވަރަށް ވުރެ ދިގު މުއްދަތެއް ކަމަށް އޭނާ ވިދާޅުވި އެވެ. އަދި 30 ދުވަހުން 30 ދުވަހުން ބަންދުގެ މުއްދަތު އިތުރު ކުރަމުން ދިއުމަކީ އެއްވެސް ޤައުމެއްގައި އަމަލުކުރާ ގޮތެއް ނޫން ކަަމަށް އޭނާ ވިދާޅުވި އެވެ. މިހާރު ކަންކަން ހިނގާ ގޮތުގެ ސަބަބުން މައްސަލަތަކުގެ ޝަރީއަތް ނުހިނގާ ކަމަށާއި ކޭސްއެއް ވެސް ބިނާ ނުކުރެވޭ ކަމަށް އޭނާ ވިދާޅުވި އެވެ.
ދައުވާކުރުމުގައި ހޭދަވާ މުއްދަތު އިތުރުވުމުގެ ނަތީޖާ އަކީ ކުށްކުށުގެ ތުހުމަތު ކުރެވޭ މީހުން އެ ތުހުމަތުތަކުން ސަލާމާތް ވާން ވަރަށް ބޮޑަށް ފުރުސަތު ލިބުން ކަމަށް ވެސް އޭނާ ވިދާޅުވި އެވެ.
"ތުހުމަތު ކުރެވޭ މީހާ އިންނަނީ ބޮޑު ސްކްރިޕްޓެއް ތައްޔާރުކޮށްގެން ބޮޑު ޑްރާމާ އެއް ކުޅެން ތައްޔާރުވެގެން. ރާއްޖޭގެ ޖިނާއީ ކޯޓުގައި މިފަދަ ބޮޑެތި ޑްރާމާ އަޅުގަނޑުމެންނަށް ފެނިފައި މި ތިބީ. ހެކި އުފައްދައިގެންނާއި އެކި ކަހަލަ ފާޑު ފާޑުގެ މީހުން ހާޒިރުކޮށްގެން ޑްރާމާ ކުޅެނީ." އޭނާ ވިދާޅުވި އެވެ.
މީގެ އިތުރުން ވާނުވާ ބަންދުގެ މައްސަލަތަކުގައި ޒިންމާ ނަގާނެ ފަރާތެއް ވެސް ނެތްކަން އޭނާ ވަނީ ފާހަގަކުރައްވާފަ އެވެ. މީހެއްގެ މައްޗަށް ދައުވާ އެއް ނުކޮށް ބަންދުކޮށްފައި ހުރުމަކީ އެއްވެސް މިންވަރަކަށް ކޮށްގެން ވާނެ ކަމެއް ނޫން ކަމަށް ޖިނާހު ވިދާޅުވި އެވެ.
ވާނުވާ ބަންދު ނުވަތަ ޝަރީއަތް ނިމެންދެން މީހުން ބަންދުކުރުން ނިމުމަކަށް ގެނައުމަށް ފެނިގެން ދަނީ ފުލުހުންނާއި ކަމާއި ގުޅުން ހުރި އިދާރާތަކަށް ތަމްރީން ދެމުންދާ މަންޒަރު ކަމަށް ވެސް އޭނާ ވިދާޅުވި އެވެ. މިއީ ފަނޑިޔާރުން ނޫނީ ފުލުހުންނަށް އިޖުރާއަތު ނޭނގިގެންވާ ކަމެއް ނޫން ކަަމަށާއި މިއީ އިޖުރާތުގައި އޮތް ބާގަނޑެއްގެ ސަބަބުން ދިމާވާ ކަމެއް ކަމަށް ވެސް އޭނާ ވަނީ ވިދާޅުވެފަ އެވެ.
އާއްމު މަދަނީ ހައްގުތައް ހިމާޔަތްކުރުމަށް ކުރިއަރާފައިވާ ގައުމުތަކުން ކަންކަން ކުރާ ގޮތް ރާއްޖެ އިން ބަލަން ޖެހޭ ކަމަށާއި ބޮޑެތި ބަދަލުތަކެއް ގެންނަންޖެހޭ ކަމަށް އޭނާ ވިދާޅުވި އެވެ. ދައުވާ ކުރުމުގެ މަރުހަލާ އަވަސް ކުރެވޭ ގޮތަށް އިންތިޒާމްތައް ހަމަޖައްސަން ޖެހޭ ކަމަށާއި ކޭސްތައް ދިގު ދެމިގެން ދިއުމުގެ އާދަ ނައްތާލަން ޖެހޭ ކަމަށް އޭނާ ވިދާޅުވި އެވެ.
