ބޭސް ނުލިބުމުގެ މައްސަލައަށް މިނިސްޓަރު ގީލާ ދެއްކެވި މެޖިކް ހައްލު!

ދިވެހިރާއްޖޭގެ ސިއްހީ ނިޒާމަކީ ރައްޔިތުންގެ އެންމެ އަސާސީ ހައްގުތަކާ ގުޅިފައިވާ ނިޒާމެވެ. ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރާއެކު، ރައްޔިތުންނަށް އަދި ސިއްހީ ދާއިރާއަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ބޭސް ލިބުމުގެ ދަތިކަމެވެ. މި ސަރުކާރުން އާސަންދަ ނިޒާމު ރީފޯމް ކުރުމާއެކު، އާއްމު ގޮތެއްގައި ބޭނުންކުރާ ގިނަ ބޭސްތައް ނުލިބޭ މައްސަލަ ބޮޑުވެ، އާންމު ރައްޔިތުންގެ ޝަކުވާތައް ވަނީ އިންތިހާއަށް އިތުރުވެފަ އެވެ.

ނަމަވެސް ރައްޔިތުންގެ މިކަންބޮޑުވުންތަކަށް މާ ބޮޑު އަހައްމިއްޔަތު ކަމެއް ނުދީ ސަރުކާރުން ދިޔައީ ބޭސް ލިބޭނެ ކަމުގެ ޔަގީންކަން ދެމުންނެވެ. މިފަހުން އިސްތިއުފާ ދެއްވި ހެލްތް މިނިސްޓަރު އަބްދުﷲ ނާޒިމް އިބްރާހިމް ވެސް ތަކުރާރުކޮށް ވިދާޅުވަމުން ގެންދެވީ ވަރަށް ބޮޑަށް މިމައްސަލަ ހައްލު ކުރެވިފައިވާ ކަމަށެވެ. އަދި ބޭހުގެ މައްސަލައަށް 100 އިންސައްތަ އަށް ހައްލު ނުވާތީ ރައްޔިތުން ޝަކުވާ ކުރަނީ ކަމަށް ވެސް ވިދާޅުވެފައިވެ އެވެ. 

ބޭހުގެ މައްސަލަ ހައްލު ކުރުމަށްޓަކައި އައު ކުންފުންޏެއް އުފައްދައި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން އިން ބޭސް ވެސް ވަނީ ގެންނަން ފަށާފަ އެވެ. ނަމަވެސް، މިހާތަނަށް މި ކުންފުނީގެ ސަބަބުން ބޭސް ލިބުމުގެ ދަތިކަމަށް އެދެވޭ ބަދަލެއް އައިސްފައެއް ނުވެ އެވެ. ރާއްޖޭގެ އެކި ކަންކޮޅުތަކުގައި 445 ފާމަސީ ހުރި ނަމަވެސް، ގިނަ ރަށްރަށުގެ ފާމަސީތަކުން އަސާސީ ބޭސްތައް ނުލިބުމުގެ ޝަކުވާ އަށް ނިމުމެއް ނެތެވެ. 

ރާއްޖެއަށް ބޭނުންވާ ބޭހުގެ ތެރެއިން އެސްޓީއޯ އިން އެންމެ 30 އިންސައްތައިގެ ބޭސް އެތެރެކުރާއިރު، ބާކީ 70 އިންސައްތަ ބޭސް އެތެރެކުރަނީ އަމިއްލަ ކުންފުނިތަކުންނެވެ. އެހެންކަމުން ހަގީގީ މައްސަލަ ހޯދައި، މިމައްސަލައަށް ސަރުކާރުން ހައްލެއް ގެނެސްދޭން ޖެހެ އެވެ. 

ސަރުކާރަށް މި ވީހާ ދުވަހު މި މައްސަލާގައި ވެސް ހަގީގަތް އޮޅުވާލުމަށް މަސައްކަތް ކުރުމަށް ފަހު، މިމަހުގެ 26 ވީ އާދިއްތަ ދުވަހު ދައުލަތުގެ މީޑިއާގައި ވާހަކަ ދައްކަވަމުން މިހާރުގެ ހެލްތު މިނިސްޓަރު ގީލާ އަލީ ވަނީ ރާއްޖެއަށް ބޭސް ލިބުމުގައި އަދިވެސް ބޮޑެތި ދަތިތަކެއް ހުރިކަމަށް އެއްބަސްވެވަޑައިގެންފަ އެވެ.

ރާއްޖޭގެ އާބާދީ ކުޑަވުމުގެ ސަބަބުން ބޭސް ގެންނަން ޖެހޭ އަދަދު މަދުވުމަކީ ބޭސް އެތެރެކުރާ ކުންފުނިތަކަށް އޮތް ބޮޑު ގޮންޖެހުމެއްގެ ގޮތުގައި މިނިސްޓަރު ގީލާ ފާހަގަކުރެއްވި އެވެ. މީގެ އިތުރުން، އެއް ބޭހެއް އެކި ކުންފުނިތަކުން ގެނައުމުގެ ބަދަލުގައި، އެއް ބަޔަކު ބޭސް ގެނެސްގެން ނޫނީ މި މައްސަލައަށް ދާއިމީ ހައްލެއް ނުލިބޭނެ ކަމަށް ވެސް މިނިސްޓަރު ގީލާ ވިދާޅުވެފައިވެ އެވެ. 

މިނިސްޓަރު ގީލާ މިމޭރުން ވާހަކަ ދެއްކެވި ނަމަވެސް މީގެ ކުރިން ބޭހުގެ ދަތިކަން ރައްޔިތުންނަށް ކުރިމައްޗެއް ނުވެ އެވެ. އަސާސީ ބޭސް ފަސޭހަ ކަމާއެކު މުޅި ރާއްޖެއިން ދިޔައީ ލިބެމުންނެވެ. އެހެންކަމުން މިއީ މި ސަރުކާރުގެ މައްސަލަ އެއް ކަމަށް ގިނަ ބަޔަކު ދަނީ ބުނަމުންނެވެ.

މީގެ އިތުރުން ޑޮކްޓަރުން ބޭސް ލިޔާއިރު ބޭހުގެ ސްޓޮކް ލިސްޓަށް ބަލައި، ލިބެން ހުންނަ ބޭހެއް ދިނުމަށް މިނިސްޓަރު ގީލާ ދެއްވި އިރުޝާދަށް ވެސް ގިނަ ބައެއްގެ ފާޑު ކިޔުން ވަނީ އަމާޒުވެފަ އެވެ.

މިއީ ބަލިމީހާގެ ފުރާނަ އާއި ސިއްހަތަށްވުރެ ބޮޑަށް، ހުރި އެއްޗަކުން ފުއްދާލުމުގެ ސިޔާސަތެއް ކަމަށް ގިނަ ބަޔަކު ދެކެ އެވެ. ޑޮކްޓަރުން ބަލިމީހާއަށް އެންމެ އެކަށީގެންވާ، އެންމެ ފެންވަރު ރަނގަޅު ބޭސް ލިޔުމުގެ ބަދަލުގައި، އިންވެންޓްރީގައި ހުރި ބޭހަކަށް ބަލައިގެން ފަރުވާ ދޭން ޖެހުމަކީ ބަލިމީހުންގެ ސަލާމަތާއި ރައްކާތެރިކަމާ މެދު ސުވާލު އުފެދޭނުންތޯ އެވެ. މިކަމުން  އެކަނި ވެސް ރާއްޖޭގެ ސިއްހީ ނިޒާމު އޮތް ނިކަމެތި ހާލަތު ވަޒަން ކުރެވެ އެވެ.

ސަރުކާރުން ބޭސް އެތެރެކުރުމުގެ ނިޒާމު މިހާރުން މިހާރަށް ހަރުދަނާކޮށް، ފެންވަރު ރަނގަޅު ބޭސް މެދުކެނޑުމެއް ނެތި ލިބޭނެ އިންތިޒާމެއް ހަމަނުޖައްސާ ފަސް ކުރަމުންދާ ކޮންމެ ދުވަހަކީ އެތައް ބަޔަކު ނުރައްކަލަކަށް ހުށަހެޅިގެންދާނެ ކަމެއްނުންތޯ އެވެ.