މިނިސްޓަރ ވިދާޅުވީ އިންސުލިން ނުލިބޭނަމަ ގުޅޭނެ ނިޒާމެއް އެބައޮތް ކަމަށް، އަދި ގުޅައިގެން ރިޕޯޓު ކުރުމަށް!
ބޭސް ނުލިބުމުގެ ޝަކުވާ ގިނަ ފަރާތްތަކުން ކުރަމުންދާއިރު، ރައީސް މުއިއްޒުގެ ސަރުކާރުގައި އާސަންދައިން ލިބޭ ބޭސްތައް ނުލިބޭ މައްސަލަ ވަނީ ބޮޑުވެފައި، ދާއިމީ ބަލިތަކަށް ބޭސް ކާ މީހުންގެ ބޭސްތައް ވެސް ނުލިބި ޝަކުވާ ބޮޑުވެފައިވޭ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ހެލްތު މިނިސްޓަރު ނާޒިމް | ރައީސް އޮފީސް
ވަކި ބާވަތެއްގެ އިންސުލިން އެއް ނުލިބިގެން ރަސްމީކޮށް އެ ކަންބޮޑުވުން މިނިސްޓްރީއަށް ހުށަހެޅިފައި ނުވާ ކަމަށާއި، އެފަދަ ދަތިކަމެއް އޮތްނަމަ ގުޅައިގެން ރިޕޯޓު ކުރުމަށް އެދޭކަމަށް ހެލްތު މިނިސްޓަރ އަބްދުﷲ ނާޒިމް އިބްރާހިމް ވިދާޅުވެއްޖެއެވެ. އިންސުލިންއެއް
ބޭސް ނުލިބުމުގެ ކަންބޮޑުވުން އެކި ފަރާތްތަކުން ދޭތެރެ ދޭތެރެއިން ސޯޝަލް މީޑިއާ އާއި އެކި ޕްލެޓްފޯމްތަކުގައި ހިއްސާ ކުރަމުންދާއިރު، ހަކުރުބަލި ތަހައްމަލު ކުރާ ފަރާތްތަކަށް އިންސުލިން ނުލިބުމުގެ މައްސަލަތައް ވެސް ދަނީ ފެންމަތިވަމުންނެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި އެކަމާ ގުޅިގެން ސުވާލު ކުރުމުން މިނިސްޓަރ ވިދާޅުވީ، ވަކި ބާވަތެއްގެ އިންސުލިން އެއް ނުލިބިގެން ރަސްމީކޮށް އެ ކަންބޮޑުވުން މިނިސްޓްރީއަށް ހުށަހެޅިފައި ނުވާ ކަމަށެވެ. އަދި ވިދާޅުވީ، އެފަދަ ދަތިކަމެއް އޮތްނަމަ ގުޅައިގެން ރިޕޯޓު ކުރުމަށް އެދޭކަމަށެވެ. އެގޮތުން އެންސްޕާ އަދި އާސަންދަ މެދުވެރިކޮށްވެސް އެކަންކަން ރިޕޯޓު ކުރުމަށް ގުޅޭނެކަމަށް މިނިސްޓަރ ވިދާޅުވިއެވެ.
އަޅުގަނޑުމެންނަށް ވަކި ސްޕެސިފިކް އިންސުލިން އެއް ނުލިބިގެން އެ ކަންބޮޑުވުން އަޅުގަނޑުމެންގެ ފޯމަލް ލެވެލްގައި ރަޖިސްޓްރީ ކުރެވިފައެއް ނެތް، އަޅުގަނޑުމެން ވަރަށް އެދެން އެމްއެފްޑީއޭގެ ނަންބަރަށް ގުޅުއްވައިގެން، އެންސްޕާގަވެސް އާސަންދައިގަ ވެސް އިންނާނެ ނަންބަރެއް، ރައްޔިތުންނަށް ކޮމްޕްލެއިން ދެވޭނެ، އަޅުގަނޑުމެންގެ މިއަދުގެވެސް އިލްތިމާސަކީ އެ ވަކި ސްޕެސިފިކް އިންސުލިންއެއް ލިބިނުލައްވައިގެން އުޅުއްވަންޏާ އަޅުގަނޑުމެންނަށް ރިޕޯޓު ކޮށްދިނުން،ހެލްތު މިނިސްޓަރ އަބްދުﷲ ނާޒިމް އިބްރާހިމް
މިނިސްޓަރ ވިދާޅުވީ، އެކަންކަން ރިޕޯޓު ކުރުމުން މިނިސްޓަރު ގެ އަމިއްލަ ހައިސިއްޔަތުން ވެސް އެކަންކަން ގާތުން ބައްލަވާނެ ކަމަށެވެ.
ބޭސް ނުލިބުމުގެ ޝަކުވާ ގިނަ ފަރާތްތަކުން ކުރަމުންދާއިރު، ރައީސް މުއިއްޒުގެ ސަރުކާރުގައި އާސަންދައިން ލިބޭ ބޭސްތައް ނުލިބޭ މައްސަލަ ވަނީ ބޮޑުވެފަ އެވެ. ދާއިމީ ބަލިތަކަށް ބޭސްކާ މީހުންގެ ބޭސްތައް ވެސް ނުލިބި ޝަކުވާ ބޮޑުވެފައިވެ އެވެ.
ބޭސް ލިބުމުގައި ހުރި ދަތިތައް ހައްލު ކުރުމަށް އެސްޓީއޯގެ ބޭސް ސަޕްލައި އިތުރު ކުރުމަށް އެސްޓީއޯގެ ނިޒާމު ވަރުގަދަކޮށް، ބޭހުގެ ކަންކަން ބެލެހެއްޓުމުގައި ގަވަނަންސް ހަރުދަނާ ކުރާ ކަމަށްވެސް ދާދި ފަހުން ސަރުކާރުން ބުނެފައިވެއެވެ. އެހެންނަމަވެސް އެކަން އަދިވެސް ހައްލު ނުވާތީ ގިނަ ބަޔަކު ގެންދަނީ ފާޑުކިޔަމުންނެވެ.
