އިޒްރޭލް އާއި ލުބުނާންއާ ދެމެދު ހަނގުރާމަ ހުއްޓާލުމުގެ އެއްބަސްވުން ތިން ހަފުތާ އަށް އިތުރު ކޮށްފައިވާ ކަމަށް ޓްރަމްޕް އިއުލާން ކުރައްވައިފި

އިޒްރޭލް އާއި ލުބުނާންއާ ދެމެދު ހަނގުރާމަ ހުއްޓާލުމަށް ވެފައިވާ އެއްބަސްވުން، އިތުރު ތިން ހަފުތާޣެ މުއްދަތަކަށް އިތުރު ކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރައްވައިފި އެވެ. 

އެމެރިކާގެ ރިޔާސީ ގަނޑުވަރ، ވައިޓް ހައުސްގައި ލުބުނާން އާއި އިޒްރޭލްގެ ސަފީރުން ބައްދަލު ކުރެއްވީއިރު، އެ ބައްދަލުވުމުގެ ފަހުން ޓްރަމްޕް ވަނީ ޓްރުތު ސޯޝަލް މީޑިއާ މެދުވެރިކޮށް މިކަން އިއުލާން ކުރައްވައިފަ އެވެ. 

އެ ބައްދަލުވުމުގައި ބައްދަލުވުމުގައި ބައިވެރިވެ ވަޑައިގެންނެވި އެމެރިކާގެ އެހެން އިސްވެރިންގެ ތެރޭގައި، އެ ޤައުމުގެ ނައިބު ރައީސް ޖޭޑީ ވޭންސް އާއި، ސެކްރެޓަރީ އޮފް ސްޓޭޓް މާކޯ ރޫބިއޯ އާއި، އެމެރިކާ އިން އިޒްރޭލް އަށް ކަނޑައަޅުއްވާފައި ހުންނަވާ ސަފީރު ހިމެނިވަޑައިގަންނަވަ އެވެ. 

އެ ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން ޓްރަމްޕް ވިދާޅުވީ، ތިން ހަފުތާގެ މި ހަނގުރާމަ ހުއްޓުވުމުގެ މުއްދަތުގައި ލުބުނާންގެ ރައީސް ޖޯސެފް އައުން އަދި އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވައިޓް ހައުސްގައި ބައްދަލު ކުރައްވާނެ ކަމަށް ލަފާ ކުރެވޭ ކަމަށެވެ. 

ބައްދަލުވުމުގެ ކުރިން ވައިޓް ހައުސްގެ އޮފިޝަލަކު އަލް އަރަބިއްޔާ އަށް ވިދާޅުވެފައި ވަނީ، އިޒްރޭލް އާއި ލުބުނާންގެ ސަފީރުންގެ ފެންވަރުގައި ބާއްވާ މަޝްވަރާތައް ވައިޓް ހައުސްގައި ކުރިއަށް ދާނެ ކަމަށެވެ. އަދި އެމެރިކާގެ ރައީސް ޓްރަމްޕް އެ ބޭފުޅުންނަށް މަރުޙަބާ ކިޔުއްވާނެ ކަމަށް ވެސް ވިދާޅުވެފައިވެ އެވެ. 

އެކި އެކި މަސްދަރު ތަކުން ބުނެފައިވާ ގޮތުގައި، ބުރާސްފަތި ދުވަހުގެ އެ ބައްދަލުވުން އެންމެ ފުރަތަަމަ ބާއްވަން ހަމަޖެހިފައި އޮތީ އެމެރިކާގެ ސްޓޭޓް ޑިޕާޓްމަންޓުގަ އެވެ. ނަަމަވެސް، ފަހުން އެ ބައްދަލުވުން ވައިޓް ހައުސްގައި ބާއްވަން ނިންމީ ކަމަށް ވެސް ބުނެފައިވެ އެވެ.