ހަނގުރާމައިގެ ޒިންމާ އިސްތިއުމާރީ ބާރު ތަކުން އުފުލަން ޖެހޭ: އީރާންގެ ފޮރިން މިނިސްޓަރު

އީރާނާ ދެކޮޅަށް ކުރަމުން އަންނަ ހަނގުރާމަ އާއި، އޭގެ ސަބަބުން ކުރިމަތިވާ ހުރިހާ ކަމެއްގެ ޒިންމާ އުފުލަން ޖެހޭނީ އިޒްރޭލް އާއި އެމެރިކާ ފަދަ، އިސްތިއުމާރީ ބާރު ތަކުން ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ.

އީރާންގެ ފޮރިން މިނިސްޓްރީ އިން ބުރާސްފަތި ދުވަހު ހާމަ ކޮށްފައިވާ ގޮތުގައި، އަރާގްޗީ މިހެން ވިދާޅުވެފައި ވަނީ އީރާންގައި ދެކުނު ކޮރެއާގެ ޚާއްސަ މަންދޫބު ޗަންގް ބްޔަންގް-ހާ އާއެކު ބޭއްވި ބައްދަލުވުމުގަ އެވެ. 

އީރާންގެ ފޮރިން މިނިސްޓަރު އަރާގްޗީ މިހެން ވިދާޅުވެފައި މި ވަނީ، އީރާން އާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުމުގެ މުއްދަތު ހަމަވާން މަދު ވަގުތު ކޮޅަކަށް ވެފައި ވަނިކޮށް، މަޝްވަރާ ތަކަށް އިތުރު ފުރުސަތު ދިނުމުގެ ގޮތުން އެއްބަސްވުމުގެ މުއްދަތު އިތުރު ކުރަން އެމެރިކާގެ ރައީސް ޑޮނަލްޑް ޓްރަމްޕް ނިންމަވާފައި ވަނިކޮށެވެ. 

އެމެރިކާ އާއި އީރާންއާ ދެމެދު ދެ ވަނަ ބުރުގެ މަޝްވަރާ ތަކެއް ޕާކިސްތާންގެ ވެރި ރަށް އިސްލާމްއާބާދުގައި ބާއްވަން މަސައްކަތް ކުރަމުން އަންނައިރު، މިހާތަނަށް އެކަން ކާމިޔާބުވެފައި ނުވެ އެވެ. އެކަމުގެ ސަބަބުން މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ. 

ޕާކިސްތާނުގައި ބޭއްވުމަށް މަސައްކަތް ކުރާ ދެ ވަނަ ބުރުގެ މަޝްވަރާ ތަަކަށް އެމެރިކާގެ ނައިބު ރައީސް ޖޭޑީ ވޭންސް ވަޑައިގަންނަވާނެ ކަމަށް ބެލެވުނު ނަމަވެސް، އެމެރިކާގެ ރިޔާސީ ގަނޑުވަރު ވައިޓް ހައުސްގެ އޮފިޝަލަކު ވަނީ ވޭންސް ވަޑައި ނުގަންނަވާނެ ކަމަށް ބުނެފަ އެވެ. އަނެއްކޮޅުން، މި މަޝްވަރާ ތަަކަށް ވަފުދެއް ފޮނުވުމާ މެދު އީރާން އިން މިހާތަނަށް ރަސްމީ ގޮތުން ނިންމުމެއް ނިންމާފައި ނުވެ. އެވެ. 

މި ހަމަ ނުޖެހުން ތަކުގެ ތެރެއިން އެމެރިކާ އިން ވަނީ ކަނޑު މަގުން އީރާން އިން ކުރާ ވިޔަފާރިތައް ހުއްޓުވުމަށް ބްލޮކޭޑެއް ނުވަތަ ބަންދެއް އިއުލާން ކޮށްފަ އެވެ. އޭގެ ރައްދުގައި އީރާން އިން ވެސް އަންނަނީ ހަރުކަށި ފިޔަވަޅު ތަކެއް އަޅަމުންނެވެ.