މުޒާހަރާގެ އަންހެން ބައިވެރިއަކަށް ފުލުހުންގެ ފަރާތުން ޖިންސީ ފުރައްސާރަ ކުރިމަތިވި ކަމަށް ތުހުމަތުކޮށްފި
މި މުޒާހަރާގައި އަންހެން ބައިވެރިއަކަށް ޖިންސީ ފުރައްސާރަ ކުރި ކަމުގެ ތުހުމަތުތަކެއް ފެންމަތިވެފައިވާ އިރު، ކުރެންދޫ ދާއިރާގެ ރައީސް މުހައްމަދު ރަޝްވާނަށް އަނިޔާވެގެން ފަރުވާ ދޭން ޖެހުނުކަން އެމްޑީޕީން ވަނީ ފާހަގަކޮށްފަ.
އެމްޑީޕީ އިން ކުރިއަށް ގެންދިޔަ މުޒާހަރާގެ ތެރެއިން. | ސްކްރީން އިމޭޖް
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކުރިއަށް ގެންދާ ސިލްސިލާ މުޒާހަރާތަކުގެ ތެރެއިން ބުރާސްފަތި ދުވަހުގެ ރޭގެ މުޒާހަރާގައި ބައިވެރިވި އަންހެނަކަށް ފުލުހުންގެ ފަރާތުން ޖިންސީ ފުރައްސާރަ އާއި ކުރިމަތިވި ކަމަށް ތުހުމަތުކޮށްފި އެވެ.
އެމްޑީޕީގެ ގައުމީ މަޖިލީހުގެ މެމްބަރު އަހުމަދު ސަލީމް މާޒް ސަލީމް ވިދާޅުވީ ފުލުހުންގެ ފަރާތުން ބުރާސްފަތި ދުވަހުގެ ރޭ ފެނުނީ ވަރަށް އަނިޔާވެރި އަމަލުތަކެއް ކަމަށެވެ. އާއްމުންނަށް އަނިޔާ ވާ ގޮތަށް ގަސްތުގައި ފުލުހުން އަމަލުކޮށްފައިވާ ކަަމަށް އޭނާ ވަނީ ތުހުމަތުކޮށްފަ އެވެ. އަދި މުޒާހަރާގެ އަންހެން ބައިވެރިއެއްގެ އަތަށް އަނިޔާވާ ގޮތަށް ފުލުހުން އަމަލުކޮށްފައިވާ ކަމަށް ވެސް އޭނާ ވަނީ ވިދާޅުވެފަ އެވެ.
މުޒާހަރާގެ ބައިވެރިން ވަނީ މުލިއާގެ ކައިރި އަށް ގޮސް އަޑު އުފުލުމަށް މަސައްކަތް ކޮށްފަ އެވެ. ނަމަވެސް އަލިކިލެގެފާނު މަގާއި ހިސާބުގައި ފުލުހުން ވަނީ ބެރިކޭޑް ޖަހާ މަގު ބަންދުކޮށްފަ އެވެ. އެ ހިސާބުގައި މަޑުކޮށްލައިގެން ތިބި ވަގުތު އަންހެނެއްގެ ފައިގެ ފަލަ މަސްގަނޑުގައި ފުލުހަކު ހިފާފަިއވާ ކަމަށާއި، އަދި ޖިންސީ ފުރައްސާރަ ކޮށްފައިވާ ކަމަށް މުޒާހަރާގެ ބައިވެރިން ވަނީ ތުހުމަތުކޮށްްފަ އެވެ.
އެކި ފަހަރު މަތިން މުޒާހަރާގެ ބައިވެރިން ވަނީ މުލިއާގެ ކައިރިއަށް ދިއުމަށް މަސައްކަތް ކޮށްފަ އެވެ. ނަމަވެސް ފުލުހުން ވަނީ ބެރިކޭޑް ޖަހާ އެ ސަރަހައްދުގެ މަގުތައް ބަންދުކޮށް މުޒާހަރާގެ ބައިވެރިންނަށް ކުރިއަށް ނުދެވޭނެ ގޮތް ހަދާފަ އެވެ. އަދި އާއްމުން ކުރިއަށް ދާން އުޅުމުން އާއްމުން ހުއްޓުވަން ފުލުހުން މަސައްކަތް ކުރި އިރު ހާލަތާއި ނުބައްދަލު މިންވަރަށް ބާރުގެ ބޭނުން ކުރި ކަމަށް އެމްޑީޕީ އިން ވަނީ ބުނެފަ އެވެ. އެގޮތުން މުޒާހަރާގައި ބައިވެރިވި އަންހެނެއްގެ އަތާއި ކޮންޑަށް އަނިޔާވާ ގޮތަށް ފުލުހުން އަމަލުކޮށްފައިވާ ކަމަށާއި މުޒާހަރާގައި ހުރި ގައުމީ މަޖިލީހުގެ ކުރެންދޫ ދާއިރާގެ ރައީސް މުހައްމަދު ރަޝްވާން އަބްދުލް ޞަމަދުގެ ލޯ މަތީގައި އެއްޗަކުން ޖަހާފައިވާ ކަމަށް ވެސް އެމްޑީޕީ އިން ވަނީ ބުނެފަ އެވެ. އަދި ލޮލަށް ލިބުނު އަނިޔާތަކަށް ރަޝްވާން ފަރުވާ ހޯދާފައިވާ ކަަމަށް އެ ޕާޓީ އިން ވަނީ ބުނެފަ އެވެ.
އެމްޑީޕީގެ ސިލްސިލާ މުޒާހަރާތައް ކޮންމެ ރެ އެއްގެ 09:00 އިން 12:00 އަށް ކުރިއަށް ދާކަން ފާހަގަކޮށްލެވެ އެވެ.
