ރައީސް މުއިއްޒު އަތޮޅުތަކުގައި އަޅާ 40،000 ހައުސިންގ ޔުނިޓުގެ ވައުދުފުޅެއް ހައުސިންގ މިނިސްޓަރު ހަނދާނެއް ނެތް
މާލެ ސަރަހައްދު ފިޔަވައި ރާއްޖޭގެ އެކި ކަންކޮޅުތަކުގައި 40،000 ހައުސިން ޔުނިޓް އެޅުމަށް ރައީސުލްޖުމްހޫރިއްޔާ ވެވަޑައިގެންފައިވާ ވައުދުފުޅާ ގުޅޭގޮތުން ސުވާލުކުރުމުން، އެ އަދަދަށް ޔުނިޓްތައް އެޅުމާ ބެހޭ އެއްވެސް މައުލޫމާތެއް އެނގިވަޑައި ނުގަންނަވާ ކަމަށް ހައުސިން މިނިސްޓަރު ޑރ. އަލީ މުއްތަލިބު ވިދާޅުވެއްޖެ. މިނިސްޓަރު ވިދާޅުވީ ރާއްޖޭގެ މާލީ ހާލަތު ހުރި ގޮތުން ބޭރުގެ ފައިނޭންސް ހޯދުމަށް ދަތިތަކެއް ހުރި ނަމަވެސް، އެކި ގޮތްގޮތުން ބޯހިޔާވަހިކަމުގެ މަޝްރޫއުތައް ކުރިއަށް ގެންދިއުމަށް ސަރުކާރުން މަސައްކަތް ކުރަމުންދާ ކަމަށް. ނަމަވެސް، މިހާތަނަށް އަތޮޅުތެރޭގައި ހައުސިން ޔުނިޓްތަކުގެ އަމަލީ އެއްވެސް މަސައްކަތެއް ފެށިފައެއް ނުވޭ.
ހައުސިންގް މިނިސްޓަރ އަބްދުﷲ މުއްތަލިބު | ރައީސް އޮފީސް
މާލޭ ފިޔަވައި އެހެން ރަށްތަކުގައި 40،000 ހައުސިން ޔުނިޓް ގާއިމްކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވި ނަމަވެސް އެ ވައުދުފުޅު ހައުސިންގ މިނިސްޓަރ އަބްދުﷲ މުއްތަލިބަށް އެނގިވަޑައި ނުގެން، މާލެ ސަރަހައްދުގެ ބޯހިޔާވަހިކަމުގެ ވާހަކަ ދައްކަވައިފި އެވެ.
ދ. މީދޫ އަށް 05 މާރޗް 2024 ގައި ވަޑައިގެން ރައީސް މުއިއްޒު ވިދާޅުވެފައި ވަނީ ފަސް އަހަރު ދުވަހަަށް ބަހާލައިގެން ރާއްޖޭގެ އެކި ކަންކޮޅުތަކު ގައި 40،000 ޔުނިޓް ގާއިމްކުރައްވާނެ ކަމަށެެވެ. އެ 40،000 ހައުސިން ޔުނިޓް ގާއިމްކުރައްވާނީ މާލޭ ސަރަހައްދުން ބޭރުގައިކަން ރައީސް ފާހަގަކުރެއްވި އެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި މިކަމާއި ގުޅިގެން ސުވާލު ކުރުމުން މިނިސްޓަރ ވިދާޅުވީ 40،000 ހައުސިންގ ޔުނިޓް އައި ގޮތެއް އެނގިވަޑައި ނުގަންނަވާ ކަމަށެވެ. އެއީ ރައީސް މުއިއްޒު 20 އަހަރުގެ ޕްލޭނެއްގެ ވާހަކަ ވެސް ވިދާޅުވެފައިވާ ކަމަށާއި، އެއީ ރަސްމާލޭގައި 65،000 ހައުސިންގ ޔުނިޓުގެ ވާހަކަ ރައީސް ވިދާޅުވެފައިވާ ކަމަށާއި، މާލެ އަދި ރާއްޖޭގެ އެކި ސަރަހައްދުތަކަށް ވެސް ވައުދުވެ ވަޑައިގެންފައިވާ ކަމަށެވެ. މިނިސްޓަރ ވިދާޅުވީ ރައީސްގެ މި ވައުދުފުޅުތަކަކީ ވައުދު ފޮތުގައި ފެންނަން ހުންނާނެ ނަންބަރުތަކެއް ނޫން ކަމަށެވެ. އެހެންކަމުން 40،000 ފުލެޓުގެ އަދަދު ނޫސްވެރިޔާ ގެނައި ގޮތަށް އެނގިވަޑައި ނުގަންނަވާ ކަމަށެވެ.
މިނިސްޓަރ ވިދާޅުވީ މިހާރު ވެސް އެތައް ހާސް ފުލެޓެއް ސޮއިކުރެވިފައިވާ ކަމަށެވެ. އެގޮތުން ބައެއް ޕްރޮޖެކްޓަތަކަކީ ދައުލަތުގެ ބަޖެޓުން ހިންގާ ޕްރޮޖެކްޓް ކަމަށާއި، ބައެއް ޕްރޮޖެކްޓްތަކަކީ ޑިވަލޮޕަރުން ހޯދައިގެން ކުރިއަށް ގެންދާ ޕްރޮޖެކްޓްތައް ކަމަށާއި އަދި ބައެއް ޕްރޮޖެކްޓްތަކަކީ ބޭރުގެ ފަރާތްތަކުން ލޯނު ހޯދައިގެން ކުރިއަށްގެންދާނެ ޕްރޮޖެކްޓް ކަމަށެވެ.
އެހެންނަމަވެސް، މި ޙާލަތު އޮތް ގޮތަށް، މިސާލަކަށް ދަންނަވާ ކަމަށް ވަންޏާ އޭދަފުށީގައި 1000 ހައުސިންގ ފުލެޓް އެޅުމަށްޓަކައި ބައެއް ޕްރޮޕޯސަލް ލިބުނީމަ ސޮއުކުރީ ފައިނޭންސް ހޯދައިގެން އައީމަ ކުރިއަށްދާ ގޮތަށް. އެހެންނަމަ ވެސް އެ ފަރާތްތަތަކަށް ފައިނޭންސް ނުހޯދުނު. އެއީ މިހާރުގެ ކަންތައްތައް އޮތް ގޮތުން ރޭޓިންގއާ އެއްޗެހި ހުރި ގޮތުން ފަސޭހަ ކަމެއް ނޫން އެއްވެސް ބަޔަކަށް ފައިސާ ހިފައިގެން އައުމަކީ. އެހެންވީމަ އެ މަސައްކަތް ކުރިން. ހަމަ އެގޮތަށް ގުޅީފަޅުގައި ވެސް އަޅުގަނޑުމެން ފެނާއި ނަރުދަމާ އާއި ކަރަންޓާއި މަގުގެ މަސައްކަތް އެޅުމަށްޓަކައި ބަޔަކާ އެކު ސޮއިކުރެވުނު ފައިނޭންސް ހިފައިގެން އަންނަގޮތަށް. އެހެންނަމަ ވެސް ފައިނޭންސް ނުއެއް ގެނެވޭތީ ޙަޤީޤަތުގައި މިހާރު އަޅުގަނޑުމެން މި ބަލަނީ އާރުޑީސީ މެދުވެރިކޮށް މަސައްކަތް ފަށަން ވީހާވެސް އަވަހަކަށް. އެހެންވީމަ އެގޮތަށް އެކި އޮޕްޝަންތަކުން މަސައްކަތް ފެށޭތޯ އަޅުގަނޑުމެން މަސައްކަތް ކުރާ އިރުގައި އަޅުގަނޑުމެން ހަވާލުވިއިރުގައި ދައުލަތުގެ ފައިނޭންޝަލް ޙާލަތު ހުރި ގޮތުގެ ސަބަބުން، ދަރަނި ހުރި ގޮތުގެ ސަބަބުން، އަޅުގަނޑުމެންނަށް އިތުރަށް ބުރޯކުރަން ފުރުޞަތު ވަރަށް ބޮޑަށް ހަނިވެފައި އޮތީ.ހައުސިންގ މިނިސްޓަރ އަބްދުﷲ މުއްތަލިބު
މިނިސްޓަރުގެ މުޅި ވާހަކަ ނިންމަވާލެއްވި އިރުވެސް އަތޮޅު ތެރެއަށް ރައީސް ވެވަޑައިގެންނެވި ވައުދުފުޅުގެ އެއްވެސް ތަފްސީލެއް ނުދެއްވަ އެވެ. އަދި މިހާތަނަށް އަތޮޅު ތެރޭގައި ހައުސިންގ ޔުނިޓްތަކުގެ މަސައްކަތެއް ފެށިފައި ނުވެ އެވެ.
މިނިސްޓަރުގެ ވާހަކައިގެ ދެން ދެއްކެވީ މާލެ ސަރަހައްދުގައި އަޅާ ހައުސިންގ ޔުނިޓްތަކުގެ ވާހަކަ އެވެ. އެގޮތުން ބީއެމްއެލްއިން އަޅާ ހައުސިންގ ޔުނިޓްތަކާއި، އިތުރަށް އަޅަންޖެހޭ ހައުސިންގ ޔުނިޓްތަކުގެ ވާހަކަ މިނިސްޓަރު ދެއްކެވި އެވެ.
