މާރުކޭޓް ހުސް ނުކުރެވުނީ މަގު ހެދުމުގެ ޕްލޭން ކުއްލިއަކަށް ބަދަލުކޮށް 2 ހަފްތާ ތެރޭ ތަން ހުސްކުރަން އެންގުމުން، ރައީސް ހައްދަވަނީ އިތުރުފުޅެއް: އާޒިމް

މާލޭގެ މަގުތައް ހެދުމުގެ މަޝްރޫއުގެ ތެރެއިން މާރުކޭޓު ސަރަހައްދު ހުސްނުކުރެވިގެން އުޅެނީ މާލެ ސިޓީ ކައުންސިލުން އެއްބާރުލުން ނުދީގެން ކަމަށް ބުނެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދައްކަވަނީ ހަގީގަތާ ޚިލާފު ވާހަކަފުޅުތަކެއް ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.

އާޒިމް ވިދާޅުވީ މާރުކޭޓު ހުސްކުރުމުގެ މަސައްކަތަށް ހުރަސް އެޅުނީ ސަރުކާރުން ކުއްލިއަކަށް މަގު ހެދުމުގެ ޕްލޭން ބަދަލުކޮށް، އެކަށީގެންވާ ވަގުތު ނުދީ ތަން ހުސްކުރަން އެންގުމުން ކަމަށެވެ.

މިކަމާ ގުޅޭގޮތުން ތަފްސީލު ދެއްވަމުން މޭޔަރު އާޒިމް ވިދާޅުވީ، ކުރިން ރޭވިފައި އޮތް ގޮތުން މަގު ހެދުމުގެ މަސައްކަތް ފުރަތަމަ ފަށަން އޮތީ ނަސަންދުރަ ހުންނަ ސަރަހައްދުން ކަމަށެވެ. ނަމަވެސް ސަރުކާރުން ކުއްލިއަކަށް ޕްލޭން ބަދަލުކޮށް، ދެ ހަފްތާގެ ތެރޭގައި މާރުކޭޓު ހިމެނޭ ސަރަހައްދު ހުސްކުރަން އެންގީ ކަމަށް އޭނާ ވިދާޅުވި އެވެ. އެ ވަގުތަކީ ސިޓީ ކައުންސިލުން މާރުކޭޓު ގޮޅިތައް ބަދަލުކުރާނެ ވަގުތީ މާރުކޭޓެއް ހަދަމުންދިޔަ ދުވަސްވަރު ކަމަށާއި، އެތަން ނުނިމެނީސް އެތައް އާއިލާއެއްގެ ދިރިއުޅުމާ ގުޅިފައިވާ ވިޔަފާރިތަކެއް މަގުމަތިކޮށްލެވެން ނޯންނާނެ ކަމަށް އާޒިމް ވިދާޅުވި އެވެ.

އާޒިމް ފާހަގަކުރެއްވި ގޮތުގައި މާރުކޭޓުގައި ވިޔަފާރިކުރާ 40 އެއްހާ އާއިލާގެ އިތުރުން، މިއީ މުޅި ރާއްޖޭގެ ދަނޑުވެރިކަމާ ވެސް ގުޅިފައިވާ ކަމެކެވެ. ރަށްރަށުން ގެންނަ ތަކެތި މާރުކޭޓުގައި ވިއްކަން ތިބި މީހުން ކުއްލިއަކަށް ނެރެލުމަކީ ދަނޑުވެރިންނަށް ލިބޭނެ ބޮޑު ގެއްލުމެއް ކަމަށާއި، ގައުމެއްގެ ރައީސަކު މިފަދަ ނިންމުންތައް ނިންމަވަންވާނީ ރައްޔިތުންނަށް ލިބޭނެ ގެއްލުމަށް ވިސްނަވައިގެން ކަމަށް އޭނާ ވިދާޅުވި އެވެ. އަދި ސިޓީ ކައުންސިލުން އެއްބާރުލުން ނުދޭ ކަމަށް ބުނެ ސަރުކާރުގެ ނާގާބިލުކަން ފޮރުވަން މަސައްކަތް ކުރާ ކަމަށް ވެސް އާޒިމް ތުހުމަތު ކުރެއްވި އެވެ.

މީގެ އިތުރުން މާލޭގެ ލޯކަލް މާރުކޭޓާއި މަސް މާރުކޭޓުގެ މަޝްރޫއާ ގުޅޭގޮތުން ވާހަކަ ދައްކަވަމުން އާޒިމް ވިދާޅުވީ، ސަރުކާރުން އެތަންތަން ތަރައްގީކުރަން ހަވާލުކޮށްފައި އޮތް ކޮންޓްރެކްޓްތައް އޮތީ މާލެ ސިޓީ ކައުންސިލަށް ވަރަށް ބޮޑަށް ގެއްލުންވާ ގޮތަށް ކަމަށެވެ. އެގޮތުން 25 އަހަރަށް އެތަންތަނުން ކައުންސިލަށް އެއްވެސް ފައިދާއެއް ނުލިބޭ ގޮތަށް، އަދި ނުދެއްކޭނެ ފަދަ ބޮޑެތި އަދަދުތަކުން ފައިސާ ދައްކަން ޖެހޭ ގޮތަށް ކޮންޓްރެކްޓްތައް ފަރުމާކޮށްފައިވާ ކަމަށް އޭނާ ވިދާޅުވި އެވެ.

އާޒިމް ވިދާޅުވީ މާލެ ސިޓީ ކައުންސިލުން އަބަދުވެސް ބޭނުންވަނީ މާލޭގެ މަގުތައް ރީތިކޮށް ހެދުމަށް ކަމަށާއި، އެކަމަށް ބޭނުންވާ ކޮންސެޕްޓްތައް ފާސްކުރުމުގައި ވެސް ކައުންސިލުން އެއްބާރުލުން ދީފައިވާނެ ކަމަށެވެ. ނަމަވެސް ރައްޔިތުންގެ ދިރިއުޅުމަށް ދަތިވާ ގޮތަށް، އެއްވެސް ޕްލޭނެއް ނެތި ކުއްލި ކުއްލިއަށް ކަންކަން ކުރަން އެންގުމަކީ ގަބޫލުކުރެވޭނެ ކަމެއް ނޫން ކަމަށް މޭޔަރު ވިދާޅުވިއެވެ. މިހާރު ވެސް ވަގުތީ މާރުކޭޓުގެ މަސައްކަތް ނިންމައި، މީހުން ބަދަލުކުރުމުގެ އިންތިޒާމުތައް ކައުންސިލުން ވަރަށް ބާރަށް ކުރިއަށްގެންދާ ކަމަށް އޭނާ ވިދާޅުވި އެވެ.