މާލޭ ސިޓީ ކައުންސިލުން މުއްތަލިބަށް: މާރުކޭޓު ހުސްކުރަން ސަރުކާރުން އެންގީ ރޯދަ މަހާ ދިމާކޮށް ވިޔަފާރިތަކަށް ދަތިވާނެހެން، އައު ގޮޅިތައް މިދަނީ ހަމަޖައްސަމުން
15 އެޕްރީލު 2026 | ބުދަ 14:22މާލޭގެ މަގުތައް ހެދުމުގައި ސިޓީ ކައުންސިލުން އެއްބާރުލުން ނުދޭކަމަށް ހައުސިންގް މިނިސްޓަރު ވިދާޅުވި ވާހަކަތަކަށް އެ ކައުންސިލުން ވަރުގަދަ ރައްދެއް ދީފި. ކައުންސިލުން ބުނީ ފެންބޮޑުވުމުގެ މައްސަލަ ހައްލުކުރުމަށް ދުނިޔޭގެ ފެންވަރުގެ ޕަމްޕުތައް ބަހައްޓައި ކާނުތައް ސާފުކުރުމުގެ މަސައްކަތް ހުއްޓުމެއްނެތި ކުރަމުންދާ ކަމަށް. ބޮޑުތަކުރުފާނު މަގުގެ މަޝްރޫއަކީ ވެސް ކައުންސިލުން ފާސްކޮށްފައިވާ ކޮންސެޕްޓެއް ކަމަށް. އަދި ކައުންސިލްގެ މެޖޯރިޓީ މިހާރު އޮތީ ސަރުކާރު ހިންގާ ޕީއެންސީއަށް ކަމަށްވާއިރު، އެއްބާރުލުން ނުދޭކަމަށް ބުނެ މިނިސްޓަރު ހެއްދެވީ އިތުރުފުޅެއް ކަމަށް ވެސް ކައުންސިލުން ބުނެފައިވޭ.
މާލެ ސިޓީ ކައުންސިލަރުންގެ ބައްދަލުވުމެއްގެ ތެރެއިން | މާލެ ސިޓީ ކައުންސިލް
މި ސަރުކާރުން މަގު ހަދަމުންދާއިރު މާލެ ސިޓީ ކައުންސިލުން ސަރުކާރަށް އެއްބާރުލުން ނުދޭ ކަމަށް ވިދާޅުވެ ހައުސިންގް މިނިސްޓަރު ޑރ. އަބްދުﷲ މުއްތަލިބު ދެއްކެވި ވާހަކައަށް މާލެ ސިޓީ ކައުންސިލުން ވަރުގަދަ ރައްދެއް ދީފި އެވެ.
ބުދަ ދުވަހު ރައްޔިތުންގެ މަޖިލީހުގެ ޖަލްސާގައި މާލެ ސިޓީ ކައުންސިލަށް ފާޑުވިދާޅުވެ މިނިސްޓަރު ވިދާޅުވީ މާލޭގެ މަގުތަކުގައި ފެންބޮޑުވުމުން އެކަމާ ގުޅުންހުރި ކަންކަން ވެސް ހައްލު ކޮށްދޭން ޖެހެނީ ދައުލަތުން ކަމަށެވެ. އަދި ބޮޑުތަކުރުފާނު މަގު ތަރައްގީކުރުމުގެ މަޝްރޫއަށް މާލޭ ސިޓީ ކައުންސިލުން އެއްބާރުލުން ނުދޭ ކަމަށް ތުހުމަތު ކުރައްވައި، މިނިސްޓަރު ވިދާޅުވީ މަގު ފުޅާކުރުމަށް ޓަކައި މާރުކޭޓު ނަގަން އެދި ތަކުރާރުކޮށް ސިޓީ ފޮނުވުމުން ވެސް އެކަން ކޮށްފައި ނުވާތީ، އެ ސަރަހައްދުގެ މަގު ނިންމަން ޖެހުނީ ޕޭވްމަންޓާ ނުލައި ކަމަށެވެ.
މިކަމަށް ރައްދުދެއްވައި އެކްސް ގައި ކުރެއްވި ޕޯސްޓެއްގައި ސިޓީ ކައުންސިލްގެ ހެޑް އޮފް ކޮމިއުނިކޭޝަންސް އާމިނަތު ޝަތުފާ ޝަފީއު ވިދާޅުވީ މާލެ ސިޓީ ކައުންސިލުން ވަނީ ފެންބޮޑުވުމުގެ މައްސަލައަށް ހައްލެއް ހޯދުމަށްޓަކައި ދުނިޔޭގެ ފެންވަރުގެ ދެ ޕަމްޕު ހޯދާފައި ކަމަށާ މި ޕަމްޕުތައް މިހާރު ވެސް ދަނީ ވަރަށް ފުރިހަމައަށް މަސައްކަތް ކުރަމުން ކަމަށެވެ. މީގެ ކުރިން ހައުސިންގ މިނިސްޓްރީން މަސައްކަތްތައް ކުރިއަށް ގެންގޮސްފައިވާ ގޮތުން މަޖީދީ މަގުގެ 8 ސަރަހައްދެއްގައި ވަރަށް ބޮޑަށް ފެންބޮޑުވުމުގެ މައްސަލަ ކުރިމަތިވި ނަމަވެސް، ސިޓީ ކައުންސިލުން މިހާރު ވަނީ އެ މައްސަލަތައް ހައްލު ކޮށްފައި ކަމަށް ވެސް ޝަތުފާ ވިދާޅުވި އެވެ.
މަޖީދީމަގަކީ ރައީސް މުއިއްޒު ހައުސިންގް މިނިސްޓަރުކަމުގައި ހުންނެވި ދުވަސްވަރު އަލުން ތަރައްގީކުރި މަގަކަށް ވީނަމަވެސް، އެ މަގަށް ވެސް ބޮޑެތި ބަދަލުތަކެއް ގެންނަން ޖެހި މޭޔަރުގެ އިރުޝާދުގެ ދަށުން މިހާރު ބަދަލުތައް ގެނަސްފައިވާ ކަމަށާއި ފެންބޮޑުވުމުގެ މައްސަލަ ހައްލުކުރުމަށްޓަކައި 45،000 އަށްވުރެ ގިނަ ކާނު މިހާތަނަށް ސިޓީ ކައުންސިލުން ސާފު ކޮށްފައިވާ ކަމަށް އޭނަ ވިދާޅުވި އެވެ. އަދި މިއީ މެދުނުކެނޑި ކުރިއަށްދާ ޕްރޮގްރާމެއް ކަމަށާއި، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ކައުންސިލަށް ބޭނުންވާ ރޯޑް ބްލޮކްތަކާއި ގައު ފޯރުކޮށްދިނުމަށް ދެކޮޅު ހަދަމުންދާ ދަނޑިވަޅެއްގައި ވެސް، މަގުތައް މަރާމާތުކުރުމުގެ މަސައްކަތް ކައުންސިލުން ދަނީ ހުއްޓުމެއް ނެތި ކުރަމުން ކަމަށް ޝަތުފާ ވިދާޅުވި އެވެ.
ޝަތުފާ ވިދާޅުވީ ބޮޑުތަކުރުފާނު މަގު ތަރައްގީކުރުމުގެ ކޮންސެޕްޓަކީ މާލެ ސިޓީ ކައުންސިލުން ފާސްކޮށްފައިވާ ކޮންސެޕްޓެއް ކަމަށެވެ. ރަމަޟާން މަހުގެ ތެރޭގައި މާރުކޭޓު ގޮޅިތައް ހުސްކުރުމަށް ސަރުކާރުން އެންގި އެންގުމަކީ އެ ދަނޑިވަޅުގައި ވިޔަފާރިވެރިންނަށް ބޮޑެތި ގެއްލުންތަކެއް ލިބޭނެ ކަމަކަށް ވުމާއެކު ވިޔަފާރިވެރިންގެ ކަންބޮޑުވުންތައް އަޑުއަހައި، އެކަން ރަމަޟާން މަސް ނިމުމުން ކުރަން ފަސްކުރި ނަމަވެސް އަލަށް ތަރުތީބުކުރެވޭ ގޮޅިތަކުން އެ ފަރާތްތަކަށް ޖާގަ ލިބޭނެ އިންތިޒާމުތައް މިހާރު ހަމަޖައްސާފައި ވާ ކަމަށެވެ.
އެހެންކަމުން މަގުތައް ތަރައްގީކުރުމަށް މާލެ ސިޓީ ކައުންސިލުން އެއްބާރުލުން ނުދޭކަމަށް ބުނުމަކީ ކަނޑައެޅިގެން ދޮގެއް ކަމަށް އޭނާ ވިދާޅުވި އެވެ. ޝަތުފާ ވިދާޅުވީ ބޮޑުތަކުރުފާނު މަގުގެ މަޝްރޫއަކީ އެމްޑީޕީ ސަރުކާރުން ފެށި މަޝްރޫއެއް ކަމަށެވެ. އަދި އެ މަޝްރޫއަށް ބޭނުންވާ ފައިސާ ހޯދުމާއި، ޑިޒައިން ކުރުމާއި، ޕްލޭން ކުރުމުގެ ހުރިހާ މަސައްކަތެއް ނިންމާފައި ވަނީ މޭޔަރު އާދަމް އާޒިމް އެމްޓީސީސީގެ ސީއީއޯގެ މަގާމުގައި ހުންނެވި ދުވަސްވަރުގައި ކަމަށް ވެސް ވިދާޅުވި އެވެ.
އެންމެ މުހިއްމު ކަމެއްގެ ގޮތުގައި އޭނާ ވިދާޅުވީ މާލެ ސިޓީ ކައުންސިލްގައި މިހާރު އޮތީ ޕީއެންސީގެ މެޖޯރިޓީއެއް ކަން ކަމަށެވެ. އެހެންކަމުން މިނިސްޓަރު އެ ވިދާޅުވަނީ ޕީއެންސީގެ ފުލް ކޮންޓްރޯލް އޮތް ބަޔަކު މި ސަރުކާރަށް އެއްބާރުލުން ނުދޭ ވާހަކަތޯ ކަމަށް ޝަތުފާ ސުވާލު އުފެއްދެވި އެވެ.
