ހަނދަށް ދިޔުން ފަދަ ކަމެއް ކަމަށް މިނިސްޓަރު މުއްތަލިބު ވިދާޅުވި ބިއްލޫރި ޓަނަލްގެ މަސައްކަތް ކުރިޔަށް ދާކަމަށް ރައީސް މުއިއްޒު ވިދާޅުވެއްޖެ
30 މާރިޗު 2026 | ހޯމަ 19:40މާލެ އާއި ރަސްމާލެއާ ދެމެދު ބިއްލޫރި ޓަނަލެއް އަޅުއްވާނެ ކަމަށް ރައީސް މުއިއްޒު ވިދާޅުވީ 2024 ވަނަ އަހަރުގެ ޖަވަނަރީ މަހު. އޭގެ ފަހުން ބިއްލޫރި ޓަނަލް އާއި ގުޅޭ މައުލޫމާތެއް މިސަރުކާރުން ހިއްސާ ނުކޮށް ގިިނަ ދުވަސް ތަކެއް ވަންދެން ތިއްބެވުމަށް ފަހު ކޮންސްޓްރަކްޝަން މިނިސްޓަރު އަބްދުﷲ މުއްތަލިބު 2024 ވަނަ އަހަރުގެ އޮކްޓޯބަރު މަހު ވިދާޅުވީ ބިއްލޫރި ޓަނަލް އެޅުމަކީ ތަސައްވުރެއް ކަމަށާއި އެއީ ހަނދަށް ދާން އުންމީދު ކުރުން ފަދަ ވިޝަން އެއް ކަމަށް.
މާލެ އާއި ރަސްމާލެ ގުޅުވާ ހިޔާލީ ބިއްލޫރި ޓަނަލެއް | ރާއްޖެއެމްވީ
މާލެ އިން ފެށިގެން ފުށިދިއްގަރުފަޅު ނުވަތަ މިހާރު ބިން ހިއްކުމުގެ މަސައްކަތް ކުރިއަށްދާ ރަސްމާލެ އާއި ހަމައަށް އަޅަން ވައުދުވެވަޑައިގެންނެވި ބިއްލޫރި ޓަނަލުގެ ދިރާސާ މަސައްކަތްތައް މިހާރު ކުރިއަށްދާ ކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެއްޖެ އެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ ބިއްލޫރި ޓަނަލް އެޅުމުގެ ފަންނީ މަސައްކަތްތަކާއި ދިރާސާ މަސައްކަތްތައް މިހާރު ވެސް ކުރިއަށްދާ ކަމަށެވެ. އެގޮތުން ޓަނަލުގެ މަސައްކަތްތައް ކުރަމުން އަންނަ ނަމަވެސް މިވަގުތު އިސްކަން ދެއްވަނީ ބިން ހިއްކުމުގެ މަސައްކަތްތަކަށް ކަމަށް އެމަނިކުފާނު ވިދާޅުވި އެވެ.
ބިއްލޫރި ޓަނަލުގެ މަސައްކަތް މި ހިނގާ ރިޔާސީ ދައުރުގެ ތެރޭގައި ނިމޭނެތޯ ސުވާލު ކުރުމުން ރައީސް މުއިއްޒު ވިދާޅުވީ، ޓަނަލުގެ މަސައްކަތް ނިމޭނެ ތާރީހެއް އެނގިވަޑައިގަންނަވާނީ ދިރާސާ މަސައްކަތްތައް ނިމުމުން ކަމަށެވެ.
މާލެ އާއި ރަސްމާލެއާ ދެމެދު ބިއްލޫރި ޓަނަލެއް އަޅުއްވާނެ ކަމަށް ރައީސް މުއިއްޒު ވިދާޅުވީ 2024 ވަނަ އަހަރުގެ ޖަވަނަރީ މަހުގަ އެވެ.
ނަމަވެސް އޭގެ ފަހުން ބިއްލޫރި ޓަނަލް އާއި ގުޅޭ މައުލޫމާތެއް މި ސަރުކާރުން ހިއްސާ ނުކޮށް ގިިނަ ދުވަސް ތަކެއް ވަންދެން ތިބުމަށް ފަހި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު 2024 ވަނަ އަހަރުގެ އޮކްޓޯބަރު މަހު ވިދާޅުވީ ބިއްލޫރި ޓަނަލް އެޅުމަކީ ތަސައްވުރެއް ކަމަށާއި އެއީ ހަނދަށް ދާން އުންމީދު ކުރުން ފަދަ ވިޝަން އެއް ކަމަށެވެ. އަދި މިހާތަނަށް ދުނިޔޭގެ އެއްވެސް ތަނެއްގައި މިފަދަ އިންފްރާސްޓްރަކްޗަރ އެއް ހަދާފައިނުވާކަމަށް ވެސް މުއްތަލިބް ވަނީ ވިދާޅުވެފަ އެވެ.
ރަސްމާލެ ހިއްކުމުގެ މަޝްރޫއު ނިންމާނެކަމަށް ދިން އެތައް ތާރީހެއް މިހާރު ފަހަނައަޅައި ގޮސްފައިވާއިރު، އަދިވެސް އެސަރަހައްދު ހިއްކުމުގެ މަސައްކަތް ނުނިމެ އެވެ. އެ ސަރަހައްދު ތަރައްގީކޮށް ބޮޑު އާބާދީ އެއް ބިނާކުރުމަށް ރައީސް މުއިއްޒު ވަނީ ނިންމާފަ އެވެ. އަދި މާލެ އާއި ރަސްމާލެ ގުޅުވައިދޭނީ ދުނިޔޭގައިވެސް އަލަށް އިޖާދުކުރާ ޓެކްނޮލޮޖީ އެއް ބޭނުންކޮށްގެން ބިއްލޫރި ޓަނަލް އަކުން ރައީސް މުއއްޒު ވަނީ ވިދާޅުވެފަ އެވެ.
