ދޮންފަނު ކައުންސިލްގެ އަންހެނުންނަށް ޚާއްސަ ގޮނޑި އެމްޑީޕީ އަށް: އުމުރުން 20 އަހަރުގެ ރަފާ އަށް ފަޚުރުވެރި މޮޅެއް
އުމުރުން އެންމެ 20 އަހަރުގެ ރަފާހް ހޯދި މި ކާމިޔާބީ އަކީ ސަރުކާރާ މެދު އާންމު ރައްޔިތުންގެ ނުރުހުން އޮތް މިންވަރު ހާމަވާ ކަމެއްގެ ގޮތުގައި ގިނަ ބަޔަކު ދަނީ ސިފަކުރަމުން.
ބ.ދޮންފަނު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑީގެ ދެވަނަ ބުރުގެ އިންތިޚާބު މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ކެނޑިޑޭޓް އައިމިނަތު ރަފާހް، ކެމްޕެއިން ތެރެއިން ނަގާފައިވާ ފޮޓޯ އެއް | ސޯޝަލް މީޑިއާ
ހޮނިހިރު ދުވަހު ކުރިއަށް ދިޔަ ބ.ދޮންފަނު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑީގެ ދެވަނަ ބުރުގެ އިންތިޚާބު މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ކެނޑިޑޭޓް އައިމިނަތު ރަފާހް ކާމިޔާބުކޮށްފި އެވެ.
މި އިންތިޚާބުގައި ރަފާހް އަށް ލިބިފައި ވަނީ 202 ވޯޓެވެ. އުމުރުން އެންމެ 20 އަހަރުގެ ރަފާހް ހޯދި ކާމިޔާބީ ފާހަގަކޮށް އޭނާ އަށް އާއްމުން ދަނީ މަރުޙަބާ ކިޔަމުންނެވެ. އަދި ދޮންފަނުން ސަރުކާރަށް ދީފައި ވަނީ ވަރަށް ވަރުގަދަ ސާފު މެސެޖެއް ކަމަށާއި، އެއީ ސަރުކާރާއި މެދު އާއްމުން ނުރުހިފައިވާ މިންވަރު ކަމަށް ވެސް އާއްމުން ދަނީ ބުނަމުންނެވެ.
ދޮންފަނު ކައުންސިލްގެ ދެ ވަނަ ބުރުގެ ވޯޓުލުމުގެ ނަތީޖާ އަށް ބަލާ އިރު ބ. ދޮންފަނުގައި ބެހެއްޓި ވޯޓު ފޮށިން 155 ވޯޓާއި އެކު ކުރި ހޯދާފައި ވަނީ ރަފާހް އެވެ. އޭނާ އާއި ވާދަކުރި ޕީއެންސީގެ ކެނޑިޑޭޓް މުނާ އަށް ލިބިފައި ވަނީ 111 ވޯޓެވެ. ބ. ދޮންފަނު، ދޮންފަނު ސްކޫލް ހޯލްގައި ބަހައްޓާފައިވާ ވޯޓުފޮށްޓަށް ޖުމްލަ 269 މީހުން ވަނީ ވޯޓުލާފަ އެވެ. އޭގެ ތެރެއިން ސައްހަ ވޯޓުގެ އަދަދަކީ 266 އެވެ.
ދޮންފަނުގެ ކައުންސިލްގެ ދެވަަނަ ބުރުގެ ވޯޓު ފޮށްޓެއް ދެން ބަހައްޓާފައި ވަނީ މާލެ، ތާޖުއްދީން ސްކޫލް ކްލާސްރޫމް 3ގަ އެވެ. އެ ވޯޓުފޮށްޓަށް ވޯޓުލާފައި ވަނީ ޖުމްލަ 101 މީހުންނެވެ. އޭގެ ތެރެއިން ސައްހަ ވޯޓުގެ އަދަދަކީ 98 އެވެ. މި ވޯޓު ފޮށިން ޕީއެންސީގެ ކެނޑިޑޭޓް މުނާ އަށް 51 ވޯޓު ލިބުނު އިރު ރަފާހް އަށް ލިބުނީ 47 ވޯޓެވެ.
ދެވަނަ ބުރުގެ ވޯޓުލުން ކުރިއަށް ގެންގޮސްފައިވާ ދާ ދާއިރާތަކަކީ ބ. ދޮންފަނު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑި، ފުވައްމުލައް ސިޓީ ދަޑިމަގު ދާއިރާގެ މެންބަރުގެ ގޮނޑިއަށް ކައުންސިލަރގެ ގޮނޑި އާއި، ހއ. ކެލާ ކޮމިޓީގެ ރައީސް، ހދ.ނޭކުރެންދޫ އަދި ލ.މާވަށު ކޮމިޓީގެ ދެ ވަނަ ބުރުގެ ވޯޓެވެ.
މި އިންތިޚާބުގެ ދެވަނަ ބުރުގެ ވޯޓުލުމަށް 14 ވޯޓު ފޮއްޓެއް ބަހައްޓާފައި ވެ އެވެ. އަދި މި އިންތިޚާބުތަކުގައި ވޯޓުލުމަށް ރަޖިސްޓަރކޮށްފައި ވަނީ 6093 މީހުންނެވެ.
