މައިމޫން އާއި ވާވާ އަށް ލިބުނު އަނިޔާތައް ސީރިއަސް: "ފަރުވާ ދޭން ގެންދިޔައީ މުޒާހަރާއިން ހައްޔަރު ކުރިތާ ގާތްގަނޑަކަށް 2 ގަޑި އިރު ފަހުން"
އެމްޑީޕީން ކުރިއަށްގެންދާ މުޒާހަރާގެ ތެރެއިން ހައްޔަރުކުރި އެ ޕާޓީގެ ގައުމީ މަޖިލީހުގެ މެންބަރު އިބްރާހިމް ރަޝީދާއި ޒުވާނުންގެ ހިތްވަރުގެ ނައިބު ރައީސް އަހުމަދު މައިމޫނަށް ފުލުހުން އަނިޔާކޮށްފައިވާ ކަމަށް ވަކީލުން ބުނޭ. ފުލުހުން ހާލަތާ ނުބައްދަލު ބާރުގެ ބޭނުންކުރުމުގެ ސަބަބުން މި ދެ މީހުންނަށް ސީރިއަސް އަނިޔާތަކެއް ލިބިފައިވާއިރު، ފަރުވާ ދިނުމަށް ހޮސްޕިޓަލަށް ގެންގޮސްފައި ވަނީ ފުލުހުންގެ ބެލުމުގެ ދަށުގައި އި ތިބޭތާ ދެ ގަޑިއިރު ފަހުން.
އެމްޑީޕީ މުޒާހަރާ އިން ހައްޔަރު ކުރި އެ ޕާޓީގެ ގައުމީ މަޖިލީހުގެ މެމްބަރު އިބްރާހިމް ރަޝީދު ހަސަން، އަދި އެމްޑީޕީ ޒުވާނުންގެ ހިތްވަރުގެ ނައިބު ރައީސް އަހުމަދު މައިމޫން | ރާއްޖެ އެމްވީ
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބާއްވަމުންދާ ސިލްސިލާ މުޒާހަރާތަކުގެ ތެރެއިން ހޮނިހިރު ދުވަހުގެ ރޭގެ މުޒާހަރާގައި ހައްޔަރު ކުރި މީހުންނަށް ލިބުނު އަނިޔާތައް ސީރިއަސް ކަމަށް އެމްޑީޕީ އިން ބުނެފި އެވެ.
ހޮނިހިރު ދުވަހުގެ ރޭގެ މުޒާހަރާ އިން ހައްޔަރުކޮށްފައި ވަނީ އެ ޕާޓީގެ ގައުމީ މަޖިލީހުގެ މެމްބަރު އިބްރާހިމް ރަޝީދު ހަސަން (ވާވާ) އަދި އެމްޑީޕީ ޒުވާނުންގެ ހިތްވަރުގެ ނައިބު ރައީސް އަހުމަދު މައިމޫން އެވެ. އޭގެ ތެރެއިން މައިމޫން ހައްޔަރު ކުރީ ޗާނދަނީ މަގުންނެވެ. އޭނާ ހައްޔަރުކޮށްގެން ފުލުހުންގެ ބެލުމުގެ ދަށަށް ގެންދިޔައީ ބިޑި އަޅުވައިގެންނެވެ.
އަދި ގައުމީ މަޖިލީހުގެ މެމްބަރު އިބްރާހިމް ރަޝީދު ހައްޔަރު ކުރީ ރައްޔިތުންގެ މަޖިލިސްގެ އިދާރާގެ ސަރަހައްދުންނެވެ. ޤާނޫނީ ވަކީލް މުހައްމަދު ނިޝާން އިބްރާހިމް ރާއްޖެ އެމްވީ އަށް މައުލޫމާތުދެއްވަމުން ވިދާޅުވީ މުޒާހަރާ އިން ހައްޔަރު ކުރި މީހުން ހައްޔަރު ކުރީ ހާލަތާއި ނުބައްދަލު މިިންވަރަށް ބާރުގެ ބޭނުން ކޮށްގެން ކަމަށެވެ. އެކަމުގެ ސަބަބުން މައިމޫން އާއި އިބްރާހިމް ރަޝީދު އަށް ވެސް ސީރިއަސް އަނިޔާތަކެއް ލިބިފައިވާ ކަމަށް ނިޝާން ވިދާޅުވި އެވެ. އެ ދެ މީހުންނަށް ފަރުވާ ދިނުމަށް ގެންގޮސްފައި ވަނީ ހޮނިހިރު ދުވަހުގެ ރޭގެ ދަންވަރު 12:40 ހާ އިރެވެ.
"ދެ ގަޑި އިރު ފަހުން ގާތްގަނޑަކަށް ފަރުވާ ދިނުމަށް ގެންދިޔައީ. އެއީ ވެސް ޕްރެޝަރ ބޮޑުވެ ގޮތް ހުސްވީމަ. ފުލުހުން އަމަލު ކުރީ ވަރަށް އަން ޕްރޮފެޝަނަލްކޮށް." ނިޝާން ވިދާޅުވި އެވެ.
ފުލުހުން މައިމޫން ހައްޔަރު ކުރުމުގެ ތެރޭގައި އޭނާގެ ބޮލުން 4 އިންޗިއެއްހާތަން ފަޅައިގެން ގޮސްފައިވާ ކަމަށް ވެސް ނިޝާން ވިދާޅުވި އެވެ. އަދި އިބްރާހިމް ރަޝީދު ހައްޔަރު ކުރުމުގެ ތެރޭގައި ލިބުނު އަނިޔާތަކުގެ ސަބަބުން ކޮޅަށް ތެދުވުމުގައި ދަތިތަކާއި ކުރިމަތިލާން ޖެހިފައިވާ ކަމަށް ނިޝާން ފާހަގަކުރި އެވެ.
އެ ދެ މީހުން ހައްޔަރުކުރުމަށް ފަހު ގެންގޮސްފައި ވަނީ ހެންވޭރު ޕޮލިސް ސްޓޭޝަނަށެވެ. ހޮސްޕިޓަލަށް ގެންދިޔައީ އެތަނުގައި ގާތްގަނޑަށް ދެ ގަޑި އިރު ބޭތިއްބުމަށް ފަހުގަ އެވެ.
މައިމޫންގެ ބޮލަށް ލިބުނު އަނިޔާގެ ސަބަބުން ބޮލަށް އެނބުރުން އެރުމުގެ އުނދަނގޫ ކުރިމަތިވެފައިވާ ކަަމަށާއި، އޭނާ ހާސްވެ ނޭވާލުމުގައި ދަތިތަކެއް ދިމާވި ކަމަށް މި ނޫހަށް ވަނީ އެނގިފަ އެވެ. އިބްރާހިމް ރަޝީދު (ވާވާ) އަށް ކޮޅަށް ހުރުމަށް ދަތިވާތީ، އޭނާ ފަރުވާ ދިނުމަށް ގެންގޮސްފައި ވަނީ ގޮނޑީގެ އެހީގަ އެވެ.
އެމްޑީޕީން ސިލްސިލާކޮށް ކުރިއަށް ގެންދާ މި މުޒާހަރާތަކަށް ފުލުހުން ހުރަސް އަޅަމުންދާއިރު، ޙާލަތާ ނުބައްދަލު ބާރުގެ ބޭނުންކުރަމުންދާކަމުގެ ކަންބޮޑުވުންތައް ވަނީ އިތުރުވެފަ އެވެ.
