ޑަބްލިއުޑީސީ ލ.މާވަށް: މާއިސާ ހުރީ ގުޅިގެން ކަނބަލުންގެ ކުރިއެރުމަށް މަސައްކަތް ކުރަން ތައްޔާރަށް
16 އެޕްރީލު 2026 | ބުރާސްފަތި 14:53ރާއްޖެ އެމްވީ އިން ކުރި ސުވާލަކަށް ޖަވާބުދެމުން މާއިސާ ބުނީ ދެވަނަ ބުރުގެ ކެމްޕެއިން ގޮސްފައި ވަނީ ވަރަށް ރަނގަަޅަށް ކަަމަށް. އަދި ދާއިރާގެ ކުރިއެރުމަށް މާއިސާ އަށް ވޯޓު ދިނުމަށް އެދިފައިވޭ.
ހައްދުން މަތީ މާވަޑު އ.ތ.މ. ކޮމިޓީ އަށް އެމްޑީޕީގެ ޓިކެޓުގައި ވާދަކުރާ މަރިޔަމް މާއިސާ | ސޯޝަލް މީޑިއާ
ލ. މާވަށު ދާއިރާގެ އަންހެނުންގެ ތަރައްޤީ އަށް މަސައްކަތް ކުރާ ކޮމިޓީގެ މެމްބަރަކު ހޮވުމަށް ބާއްވާ ދެ ވަނަ ބުރުގެ އިންތިޚާބުގައި އ.ތ.މ. ކޮމިޓީ އަށް ހޮވިވަޑައިގަންނަވައިފި ނަމަ ގުޅިގެން ކަނބަލުންގެ ކުރިއެރުމަށް މަސައްކަތް ކުރަން ފުރިހަމަ އަށް ތައްޔާރަށް ހުންނެވި ކަމަށް އެ މަޤާމަށް އެމްޑީޕީގެ ޓިކެޓުގައި ވާދަކުރައްވާ މަރިޔަމް މާއިސާ ވިދާޅުވެއްޖެ އެވެ.
އަންހެނުންގެ ތަރައްޤީ އަށް މަސައްކަތް ކުރާ ކޮމިޓީގެ މާވަށު ދާއިރާގެ މެމްބަރު ކަމުގެ ވޯޓު އެއްވަރުވެފައި ވަނީ 564 ވޯޓުންނެވެ. ވޯޓުގެ އަދަދު އެއްވަރުވުމުގެ ސަބަބުން ދެވަނަ ބުރަކަށް ގޮސްފައިވާ ދެ ކެނޑިޑޭޓުންނަކީ ޕީއެންސީގެ ފަރާތުން އެ މަޤާމަށް ވާދަކުރާ ފާތުމަތު ޝާފިޔާ އަދި އެ މަޤާމަށް އެމްޑީޕީގެ ޓިކެޓުގައި ވާދަކުރައްވާ މަރިޔަމް މާއިސާ އެވެ.
ރާއްޖެ އެމްވީ އިން ކުރި ސުވާލަކަށް ޖަވާބުދެމުން މާއިސާ ބުނީ ދެވަނަ ބުރުގެ ކެމްޕެއިން ގޮސްފައި ވަނީ ވަރަށް ރަނގަަޅަށް ކަަމަށެވެ. އާއިލާ އާއި ޕާޓީގެ އެހީތެރިކަމާއި އެކު ކެމްޕެއިންގެ އެންމެ ފަހުގެ ތައްޔާރީތައް ވެފައިވާ ކަމަށް އޭނާ ވަނީ ބުނެފަ އެވެ. މާއިސާ ވަނީ ކުރިއަށް އޮތް ވޯޓަކީ ވަރަށް ބޮޑަށް ވިސްނުމަށް ފަހު ދޭ ވޯޓަކަށް ހެދުމަށް އިލްތިމާސްކުރައްވާފަ އެވެ.
"އަޅުގަނޑު ބުނާނީ ވަރަށް ބޮޑަށް ވިސްނާފައި ދޭށޭ މި ވޯޓު ދޭ އިރު. އަޅުގަނޑު މި ހުރީ ރަށާއި އަންހެނުންގެ ކުރިއެރުމަށް ކުރަން ޖެހޭ މަސައްކަތްތައް އެންމެންނާއި ގުޅިގެން ކުރުމަށް ތައްޔާރަށް." އޭނާ ވިދާޅުވި އެވެ.
މި މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި، އެއްވަރުވުމުގެ ސަބަބުން ނުވަތަ އެ ނޫންވެސް ސަބަބަކާ ހުރެ ދެވަނަ ބުރަކަށް ދާންޖެހުނު ދާއިރާތަކުގެ ވޯޓުލުން އަންނަ ހޮނިހިރު ދުވަހު ބޭއްވުމަށް އިލެކްޝަންސް ކޮމިޝަނުން ވަނީ ނިންމާފަ އެވެ. ދެވަނަ ބުރުގެ ވޯޓުލުން އޮންނާނީ ވޯޓުގެ ދެވަނަ ބުރެއް ބާއްވަން ޖެހޭ ރަށާއި މާލޭގަ އެވެ.
