އީރާން އާއެކު ކުރެވޭ މަޝްވަރާތައް ކާމިޔާބު، އުފާވެރި ޚަބަރު ތަކެއްގެ އުންމީދު އެބަ އޮތް: ޓްރަމްޕް

އީރާން އާއެކު ކުރިއަށް ގެންދާ މަޝްވަރާ ތަކަކީ ވަރަށް ކާމިޔާބު މަޝްވަރާ ތަކެއް ކަމަށާއި، ވަރަށް އަވަހަށް އުފާވެރި ޚަބަރު ތަކެއް ލިބޭނެ ކަމަށް އުންމީދު ކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާން އާއެކު ކުރިއަށް ގެންދާ މަޝްވަރާތައް ދަނީ ވަރަށް ރަނގަޅަށް ކަމަށާއި، ދެ ޤައުމުގެ ދެ މެދުގައި މިހާރު ވެސް ގިނަ ކަންތައް ތަކަށް އެއްބަސްވެވިފައިވާ ކަަމަށެވެ. އެއާ އެކު ޓްރަމްޕް ވިދާޅުވީ، އެމެރިކާ އިން އީރާންއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކާއި، އިޤްތިޞާދީ ބްލޮކޭޑަކީ ވަރަށް ކާމިޔާބު ފިޔަވަޅު ތަކެއް ކަަމށެވެ. 

މަޝްވަރާތަކާ ގުޅޭ ގޮތުން ވާހަކަ ދައްކަވަމުން ޓްރަމްޕް އިތުރަށް ވިދާޅުވީ، އީރާން އިން އެމެރިކާގެ ޝަރުތު ތަކަށް އެއްބަސްވެ، ދާއިމީ ހައްލަކަށް ނާދެވިއްޖެ ނަމަ، އަސްކަރީ ހަމަލާތައް އަލުން ފެށުމުގެ ފުރުސަތު އެބަ އޮތް ކަމަށެވެ. އެމެރިކާގެ އަމާޒަކީ އީރާން އިން ނިއުކްލިއާ ހަތިޔާރު އުފެއްދުން ހުއްޓުވުމާއި، އެ ސަރަހައްދުގެ ހަމަޖެހުމަށް ހުރި ހުރަސްތައް ނައްތާލުން ކަމަށް ވެސް އެމެރިކާ އިން ވަނީ ހާމަކޮށްފަ އެވެ. 

އެމެރިކާ އާއި އީރާންއާ ދެމެދު އޮތް ގުޅުން ގޯސްވެ، މަޝްރަހު ހޫނުވެފައިވާ މި ދަނޑިވަޅުގައި، އެމެރިކާގެ ރައީސް ޓްރަމްޕް މި ދެއްވި އުންމީދީ މެސެޖަކީ ބައިނަލްއަޤުވާމީ މުޖުތަމައުން ވަރަށް ބޮޑަށް ސަމާލުކަން ދީފައިވާ ކަމެކެވެ. ނަމަވެސް، އެއްބަސްވުމަކަށް ނާދެވިއްޖެ ނަމަ، އަސްކަރީ ބާރުގެ ބޭނުން ކޮށްފާނެ ކަމަށް ޓްރަމްޕް ވިދާޅުވުމުން، މަޝްވަރާ ތަކުގެ ނަތީޖާ އަށް ދުނިޔޭގެ ޤައުމު ތަކުން މިހާރު ދަނީ ފާރަވެރި ވަމުންނެވެ. 

މީގެ އިތުރުން އެމެރިކާގެ ރައީސް ޓްރަމްޕް ވިދާޅުވީ، އީރާންގެ އިޤްތިޞާދަށް މިހާރު ކުރިމަތި ވެފައިވާ ގޮންޖެހުން ތަކުން އަރައި ގަނެވޭނީ އެމެރިކާ އާއެކު އެކުލަވާލެވޭ އައު އެއްބަސްވުމެއްގެ ދަށުން ކަަމށެވެ، އަދި މި މަޝްވަރާ ތަކުގެ ތަފްސީލީ މައުލޫމާތުތައް ވަރަށް އަވަހަށް އާންމު ކުރައްވާނެ ކަމުގެ އިޝާރާތެއް ވެސް ޓްރަމްޕް ވަނީ ދެއްވައިފަ އެވެ.