އިންޑިއާގައި އޮންނަ ބްރިކްސް ސަމިޓުގައި ޕުޓިން ބައިވެރިވެ ވަޑައިގަންނަވާނެ

މިއަހަރުގެ ފަހު ކޮޅު އިންޑިއާގައި ބާއްވަން ހަމަޖެހިފައިވާ ބްރިކްސް ޤައުމު ތަކުގެ ސަމިޓުގައި ރަޝިޔާގެ ރައީސް ވަލްޑިމިއާ ޕުޓިން ޔަޤީނުން ވެސް ބައިވެރިވެ ވަޑައިގަންނަވާނެ ކަމަށް، ރަޝިޔާ އިން ބުނެފި އެވެ.

ރަޝިޔާގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ދިމިޓްރީ ޕެސްކޮވް ވިދާޅުވީ، އެ ސަމިޓުގައި ޔަޤީނުން ވެސް ޕުޓިން ބައިވެރިވެ ވަޑައިގަންނަވާނެ އެވެ. މި ޚަބަރު ރިޕޯޓު ކޮށްފައި ވަނީ ރަޝިޔާގެ ރަސްމީ ޚަބަރު އެޖެންސީ ކަަމަށްވާ ޓާސް އިންނެވެ. 

މި ސަމިޓު ބާއްވަން ހަމަޖެހިފައިވާ ރަސްމީ ތާރީޚު އިއުލާން ކޮށްފައި ނުވި ނަމަވެސް، ޓާސް އިން ރިޕޯޓު ކޮށްފައިވާ ގޮތުގައި އިންޑިއާގެ ސަރުކާރުގެ މަސްދަރު ތަކުން ވަނީ ސެޕްޓެމްބަރު މަހު މި ސަމިޓު އޮންނާނެ ކަމަށް ބުނެފަ އެވެ. އެގޮތުން ސެޕްޓެމްބަރު މަހުގެ 12 ވަނަ ދުވަހުން ފެށިގެން، 13 ވަނަ ދުވަހުގެެ ނިޔަލަށް މި ސަމިޓު ކުރިއަށް ދާނެ އެވެ. 

ބްރިކްސް އަކީ ބްރެޒިލް އާއި، ރަޝިޔާ، އިންޑިއާ، ޗައިނާ އަދި ދެކުނު އެފްރިކާގެ ޤައުމު ތަކުން ހިމެނޭ އިޤްތިޞާދީ ގުޅުމެކެވެ. މި ގުޅުމުގެ ސަމިޓުތައް ކޮންމެ އަހަރަކު ބާއްވަމުން އަންނައިރު، މި ސަމިޓު ތަކުގައި މި ޤައުމު ތަކުގެ ލީޑަރުން ބައްދަލުކޮށް އިޤްތިޞާދީ އަދި ސިޔާސީ މައްސަލަތަކާ ބެހޭ ގޮތުން މަޝްވަރާ ކުރައްވާނެ އެވެ.

ރަޝިޔާގެ ރައީސް ޕުޓިން މި ސަމިޓުގައި ބައިވެރިވެ ވަޑައިގެންނެވުމަކީ، ބައިނަލްއަޤުވާމީ މައިދާނުގައި ރަޝިޔާ އަދިވެސް ހަރަކާތްތެރިވެ، އެ ޤައުމުގެ ދައުރު އަދާ ކުރަމުން އަންނަކަން ދައްކައިދޭ ކަމެއް ކަމަށް ބެލެވެ އެވެ.