ހަކަތައިގެ ބާޒާރަށް ކުރިމަތި ވެފައިވާ ލޮޅުމާ ގުޅޭ ގޮތުން، އެމެރިކާ އާއި ރަޝިޔާ އިން މަޝްވަރާ ކޮށްފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން، ދުނިޔޭގެ ހަކަތައިގެ ބާޒާރަށް ކުރިމަތިވެފައިވާ ގޮތް ނޭނގޭ ނުތަނަވަސްކަމާއި، ލޮޅުންތަކާ ގުޅޭ ގޮތުން އެމެރިކާގެ އިސް އޮފިޝަލުންނާ އެކު މަޝްވަރާ ކޮށްފައިވާ ކަމަށް ރަޝިޔާ އިން ބުނެފި އެވެ.

ރަޝިޔާގެ ރައީސް  ވްލަޑިމިއަރ ޕުޓިންގެ ޚާއްސަ މަންދޫބު ކިރިލް ޑިމިޓްރިއޭވް ވިދާޅުވެފައި ވަނީ، އެ މަޝްވަރާތައް ކުރިއަށް ގެންގޮސްފައި ވަނީ އެމެރިކާގެ ފްލޮރިޑާގައި ކަމަށެވެ. އެގޮތުން ރަޝިޔާ-އެމެރިކާގެ އިޤްތިޞާދީ މަސައްކަތު ގުރޫޕުގެ ބައްދަލުވުމެއް ބާއްވައި، އެކަމާ ގުޅޭ ގޮތުން މަޝްވަރާ ކޮށްފައިވާ ކަމަށް ވަނީ ބުނެފަ އެވެ. 

ނިމުނު ފެބްރުވަރީ މަހުގެ 28 ވަނަ ދުވަހު އެމެރިކާާ އާއި އިޒްރޭލް ގުޅިގެން އީރާންއާ ދެކޮޅަށް ފަށާފައިވާ ހަނގުރާމައާ ގުޅިގެން ހޮރުމޯޒް ކަނޑު އޮޅި ބަންދުވުމުގެ ސަބަބުން ދުނިޔޭގެ ބާޒާރަށް ސަޕްލައި ކުރާ ތެލުގެ ފަސްބައި ކުޅަ އެއް ބައި، ނުވަތަ ދުވާލަކު ގާތް ގަނޑަކަށް 20 މިލިއަން ފީފާ ތެޔޮ ވަނީ މެދު އިރުމަތީގެ ސަރަހައްދުގައި ތާށިވެފަ އެވެ. އެކަމުގެ ސަބަބުން، ދުނިޔޭގެ ހަކަތައިގެ ބާޒާރަށް ވަނީ ބޮޑު ލޮޅުމެއް އަރައިފަ އެވެ. 

އެ ބައްދަލުވުމަށް ފަހު ޑިމިޓްރިއޭވްގެ ޓެލެގްރާމް ޗެނަލްގައި ޝާއިއު ކޮށްފައިވާ ބަޔާނެއްގައި ވިދާޅުވީ، ދުނިޔޭގެ އިޤްތިޞާދީ ހަމަޖެހުން ޤާއިމު ކުރުމުގައި ރަޝިޔާގެ ތެލާއި ގޭހުގެ ދައުރު މިހާރު ގިނަ ޤައުމު ތަކަކަށް ސާފު ވަމުންދާ ކަމަށެވެ. ޚާއްޞަކޮށް، އެމެރިކާ އަށް އެކަން ސާފު ވާނެ ކަމަށް ފާހަގަ ކުރައްވާފައިވެ އެވެ. އަދި ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކަކީ އެއްވެސް ނަތީޖާއެއް ނުނިކުންނަ، އިޤްތިޞާދު ހަލާކު ކޮށްލާ ފިޔަވަޅު ތަކެއްކަން އެމެރިކާ އިން މިހާރު ޤަބޫލު ކުރަން ފަށާފައިވާ ކަމަށް ވެސް އޭނާ ވިދާޅުވި އެވެ. 

ރަޝިޔާގެ ރައީސް ޕުޓިންގެ އިރުޝާދުގެ ދަށުން ކުރިއަށް ދިޔަ މި ދަތުރުފުޅުގައި ޑިމިޓްރިއޭވް ވަނީ އެމެރިކާ އާއި ރަޝިޔާގެ އިޤްތިޞާދީ އެއްބާރުލުމާ ބެހޭ މަސައްކަތު ގުރޫޕުގެ އިސްވެރިންނާ ބައްދަލު ކުރައްވައިފަ އެވެ. އޭނާ ވިދާޅުވި ގޮތުގައި މި ބައްދަލުވުން ތަކުގައި ރަޝިޔާ އާއި އެމެރިކާގެ ގުޅުން އިއާދަ ކުރުމަށް އެހީތެރި ވެދާނެ މުހިންމު މަޝްރޫއު ތަކާ ބެހޭ ގޮތުންނާއި، ދުނިޔޭގެ ހަކަތައިގެ ބާޒާރަށް ދިމާވެފައިވާ ލޮޅުންތަކާ ގުޅޭ ގޮތުން ފުޅާ ދާއިރާއެއްގައި ވަނީ ވާހަކަ ދެކެވިފަ އެވެ. 

މީގެ އިތުރުން އެ ބައްދަލުވުމާ ގުޅޭ ގޮތުން އެމެރިކާގެ ޚާއްސަ މަންދޫބު ސްޓީވް ވިޓްކޮފް ވިދާޅުވީ، އެ ޤައުމުގެ ޓީމު ތަކުގެ މެދުގައި ތަފާތު އެކި މައުޟޫއު ތަކަށް މަޝްވަރާ ކުރެވުނު ކަމަށާއި، ކުރިއަށް އޮތް ތަނުގައި ވެސް މުއާމަލާތު ކުރިއަށް ގެންދިޔުމަށް އެއްބަސްވެފައިވާ ކަމަށެވެ. 

ފްލޮރިޑާގައި ކުރިއަށް ގެންދިޔަ މި މުހިންމު ބައްދަލުވުމުގައި އެމެރިކާގެ ރައީސް ޑޮނަލްޑް ޓްރަމްޕްގެ ދަނބި ދަރިކަލުން ޖެރާޑް ކުޝްނާ އާއި، ރިޔާސީ ގަނޑުވަރު ވައިޓް ހައުސްގެ ޚާއްޞަ އެޑްވައިޒަރު ޖޯޝް ގްރޫންބައުމް ވެސް ބައިވެރިވެ ވަޑައިގެންނެވި ކަމަށް ރިޕޯޓުތައް ބުނެ އެވެ.