އީރާން ހަނގުރާމަ ހުއްޓުވުުމުގެ ޤަރާރު އެމެރިކާގެ ސެނެޓުން ބޭރު ކޮށްލައިފި

އީރާންއާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ކުރިއަށް ގެންދަވާ އަސްކަރީ ހަނގުރާމަ ހުއްޓުވުމަށް އިދިކޮޅު ޑިމޮކްރެޓިކް ޕާޓީން އިން ހުށަހެޅި ޤަރާރެއް، އެމެރިކާގެ ސެނެޓުގައި ތިއްބަވާ ރިޕަބްލިކަން ޕާޓީގެ މެމްބަރުންގެ އަޣުލަބިއްޔަތުން ބޭރު ކޮށްލައިފި އެވެ.

އެމެރިކާގެ ކޮންގްރެސްގެ ހުއްދަ ނެތި ހަނގުރާމަ ކުރިއަށް ނުގެންދެވޭ ގޮތަށް ހުށަހެޅި މި ޤަރާރު ބޭރު ކޮށްލާފައި ވަނީ، 52 ވޯޓު އަދި 47 ވޯޓުންނެވެ. 

މި ވޯޓުގެ ނަތީޖާ އިން ހާމަވެގެން ދިޔައީ، އެމެރިކާ އާއި އިޒްރޭލް އިން ގުޅިގެން އީރާން އަށް ވައިގެ ހަމަލާތައް ދޭން ފެށިތާ ހަ ހަފުތާ އަށް ވުރެ ގިނަ ދުވަސްވެފައިވާއިރު، އެމެރިކާގެ ރައީސް ޓްރަމްޕް ގެންގުޅުއްވާ ހަނގުރާމައިގެ ސިޔާސަތަށް ރިޕަބްލިކަން ޕާޓީގެ ފުރިހަމަ ތާއީދު އަދި ވެސް އޮތް ކަމަށެވެ. ހަނގުރާމަ ފެށުނު ފަހުން ޑިމޮކްރެޓިކް ޕާޓީ އިން މިފަދަ ޤަރާރެއް ސެނެޓަށް ހުށަހެޅި މިއީ ހަތަރު ވަނަ ފަހަރެވެ. 

ނަމަވެސް، ކެންޓަކީގެ ސެނެޓަރު ރޭންޑް ޕޯލް ފިޔަވައި ރިޕަބްލިކަން ޕާޓީގެ ހުރިހާ މެމްބަރުން ވަނީ މި ޤަރާރާ ދެކޮޅަށް ވޯޓު ދެއްވައިފަ އެވެ. 

މި ވޯޓުގައި ރިޕަބްލިކަން ޕާޓީގެ ފަރާތުން ޤަރާރަށް ތާއީދު ކުރެއްވި ހަމައެކަނި މެމްބަރަކީ، އަސްކަރީ ހޭދަ ބޮޑުވުމާ ދެކޮޅަށް އަބަދު ވެސް އަޑު އުފުއްލަވަ އަދި ޤާނޫނު އަސާސީގެ މާއްދާތައް އަކުރުން އަކުރަށް ތަންފީޒު ކުރުމަށް ވަކާލާތު ކުރައްވާ ރޭންޑް ޕޯލް އެވެ. އަނެއް ކޮޅުން ޑިމޮކްރެޓިކް ޕާޓީގެ މެމްބަރުންގެ ތެރެއިން މި ޤަރާރާ ދެކޮޅަށް ވޯޓު ދެއްވީ ޕެންސިލްވޭނިއާގެ ސެނެޓަރު ޖޯން ޕެޓާމަން އެވެ. ވެސްޓް ވާޖިނިއާގެ ރިޕަބްލިކަން ސެނެޓަރު ޖިމް ޖަސްޓިސް މި ވޯޓުގައި ބައިވެރިވެ ވަޑައިގެންފައި ނުވެ އެވެ. 

އެމެރިކާގެ ޤާނޫނު އަސާސީ ބުނާ ގޮތުން ހަނގުރާމަ އިއުލާން ކުރުމުގެ ބާރު އޮންނަނީ ރައީސަކަށް ނޫނެވެ. އެ ބާރު އޮންނަނީ ކޮންގްރެސް އަށެވެ. ނަމަވެސް ކުރު މުއްދަތުގެ އަސްކަރީ އޮޕަރޭޝަން ތަކާއި، ޤައުމަށް ވަގުތުން ކުރިމަތިވާ ނުރައްކާ ތަކުން ސަލާމަތްވުމަށް ހިންގާ ޙަރަކާތް ތަކުގައި އެ ހުރަސްތައް ނޯންނާނެ ކަމަށް އެމެރިކާގެ ދެ ޕާޓީގެ ރައީސުން ވެސް ޒަމާނުއްސުރެ ދެކެވަޑައިގަންނަވަން އެވެ.