އެމެރިކާ އާއި އީރާންއާ ދެެމެދު ދެ ވަނަ ބުރުގެ މަޝްވަރާ ތަކެއް ބާއްވަން ޕާކިސްތާން އިން ހުށަހަޅައިފި

އެމެރިކާ އާއި އީރާާންއާ ދެމެދު ކުރިއަށްދާ މަޝްވަރާ ތަކުގެ ދެ ވަނަ ބުރެއް ބާއްވަން ޕާކިސްތާން އިން ހުށަހަޅައިފި އެވެ. 

އެސޯސިއޭޓެޑް ޕްރެސް (އޭޕީ) އިން ރިޕޯޓު ކޮށްފައިވާ ގޮތުގައި ޕާކިސްތާން އިން ހުށަހަޅާފައި ވަނީ އެ ޤައުމުގެ ވެރި ރަށް އިސްލާމްއާބާދުގައި ދެ ވަނަ ބުރުގެ މަޝްވަރާ ތަކެއް ކުރިއަށް ގެންދިޔުމަށެވެ. ޕާކިސްތާން އިން މިފަދަ ހުށަހެޅުމެއް ހުށަހަޅާފައި މި ވަނީ އެ ޤައުމުގައި ކުރިއަށް ގެންދިޔަ ފުރަތަމަ ބުރުގެ މަޝްވަރާ ތަކަށް ފަހު އެވެ. 

ނަން ހާމަ ނުކުރުމަށް އެދި ޕާކިސްތާންގެ ދެ އޮފިޝަލަކު އޭޕީ އަށް މައުލޫމާތު ދެއްވަމުން ވިދާޅުވީ، ކުރިއަށް އޮތް މުއްދަތުގެ ތެރޭގައި މި މަޝްވަރާތައް ބޭއްވުމަށް ޕާކިސްތާން އިން ހުށަހަޅާފައި ވަނީ، މިހާރު އިއުލާން ކޮށްފައިވާ ހަނގުރާމަ ހުއްޓާލުމުގެ މުއްދަތު ހަމަވުމުގެ ކުރިން ކަމަށެވެ.  

މި ހުށަހެޅުމާ ގުޅޭ ގޮތުން އެ އޮފިޝަލުން އިތުރަށް ވިދާޅުވީ، އިސްލާމްއާބާދުގައި މި ބައްދަލުވުން ބޭއްވުމާ މެދު ގޮތެއް ނިންމާނީ މަޝްވަރާގައި ބައިވެރިވާ ދެ ޤައުމުގެ އިސްވެރިން ކަމަށެވެ. އަދި އެމެރިކާ ނުވަތަ އީރާން އިން މި ބައްދަލުވުން ބޭއްވުމަށް އެހެން މަންޒިލެއް އިޚުތިޔާރު ކުރަން ބޭނުންވާ ނަމަ، އެކަމަށް ޕާކިސްތާާން އިން އިޙުތިރާމް ކުރާނެ ކަމަށް ވެސް އޮފިޝަލު ވަނީ ފާހަގަ ކުރައްވައިފަ އެވެ. 

އެމެރިކާ އާއި އީރާންގެ ގުޅުން ގޯސްވެފައިވާ މި ދަނޑިވަޅުގައި، ދެ ޤައުމުގެ މެދުގައި އުފެދިފައިވާ ނުތަނަވަސްކަން ކުޑަ ކުރުމަށް ބައިނަލްއަޤުވާމީ މުޖުތަމައުން ދަނީ ގިނަ މަސައްކަތް ތަކެއް ކުރަމުންނެވެ. ޕާކިސްތާން އަކީ މީގެ ކުރިން ވެސް މިފަދަ ސަރަހައްދީ މައްސަލަ ތަކުގައި މެދުވެރިއެއްގެ ދައުރު އަދާ ކުރުމަށް ޝައުޤުވެރިކަން ފާޅު ކޮށްފައިވާ ޤައުމެކެވެ.