ޕާކިސްތާންގެ އަސްކަރީ އިސްވެރިޔާ އީރާން އަށް ވަޑައިގެންފި

ޕާކިސްތާންގެ އަސްކަރީ އިސްވެރިޔާ ޖެނަރަލް އާސިމް މުނީރު އިސްކޮށް ހުންނަވައި، ޕާކިސްތާންގެ ވަފުދެއް އީރާން އަށް ވަޑައިގެންފި އެވެ. 

ބުދަ ދުވަހު ޕާކިސްތާންގެ އަސްކަރީ އިސްވެރިޔާ އީރާން އަށް ވަޑައިގެންނެވުމުން، އޭނާ އަށް މަރުޙަބާ ދެންނެވީ އީރާންގެ ފޮރިން މިނިސްޓަރު އައްބާސް އަރާގްޗީ އެވެ. މި ދަތުރުފުޅަކީ މެދު އިރުމަތީގެ ހަނގުރާމަ ހުއްޓާލުމާ ގުޅޭ ގޮތުން އެމެރިކާ އާއި އީރާންއާ ދެމެދު ޕާކިސްތާންގައި ކުރިއަށް ދިޔަ މަޝްވަރާ ތަކަށް ފަހު، އޭގެ ދުވަސް ކޮޅެއް ފަހުން އީރާން އަށް ކުރައްވާ ދަތުރުފުޅެކެވެ.

ޓެލެގްރާމް ޗެނަލްގައި އަރާގްޗީ އާންމު ކުރި ފޮޓޯ ތަކާ އެކު ވިދާޅުވެފައި ވަނީ، ޖެނެރަލް މުނީރު އީރާންގެ ވެރި ރަށް ތެހެރާން އަށް ވަޑައިގެންފައިވާ ކަމަށެވެ. ޕާކިސްތާންގެ އަސްކަރިއްޔާގެ މީޑިއާ އިން ވަނީ އެ ދަތުރުފުޅު ކުރައްވާ ކަމަށް ހާމަ ކޮށްފަ އެވެ. އަދި އެ ވަފުދުގައި ޕާކިސްތާންގެ ދާޚިލީ ވަޒީރު މުހުސިން ނަގްވީ ވެސް ހިމެނި ވަޑައިގަންނަވާ ކަމަށާއި، މިއީ ދެ ޤައުމުގެ ދެ މެދުގައި ކުރިއަށްދާ މެދުވެރިއެއްގެ ދައުރުގެ ބައެއް ކަމަށް ވެސް ޕާކިސްތާން އިން ބުނެފައިވެ އެވެ. 

އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވާ ގޮތުގައި ޕާކިސްތާންގެ މަތީ ފަންތީގެ މި ވަފުދު އީރާނަށް ގޮސްފައި ވަނީ އެމެރިކާގެ އައު މެސެޖުތަކާ އެކު ކަމަށެވެ. އަދި މި ދަތުރުފުޅުގައި ދެ ވަނަ ބުރެއްގެ މަޝްވަރާތައް ބޭއްވުމާ ގުޅޭ ގޮތުން ވާހަކަ ދެކެވޭނެ ކަމަށް ބެލެވެ އެވެ. މިދިޔަ ހަފުތާ ބަންދުގައި ޕާކިސްތާންގެ ވެރި ރަށް އިސްލާމްއާބާދުގައި ބޭއްވި ފުރަތަމަ ބުރުގެ މަޝްވަރާތައް ނާކާމިޔާބުވި ނަަމަވެސް، ޕާކިސްތާންގެ މެދުވެރިކޮށް ދެ ޤައުމުގެ ދެ މެދުގައި ވާހަކަރައް ކުރިއަށްދާކަން އީރާން އިން ވަނީ ބުދަ ދުވަހު ކަށަވަރު ކޮށްދީފަ އެވެ.