އީރާނުގެ ބަނދަރުތައް ބަންދުކުރުމާ ކުރިމަތިލާ އުޅަނދުތައް ނައްތާލާނެ ކަމުގެ އިންޒާރު ޓްރަމްޕް ދެއްވައިފި
އީރާނުގެ ހަލުވި ހަމަލާދޭ އުޅަނދުތައް އެމެރިކާގެ ކަނޑުގެ ސިފައިންނާ ގާތްވެއްޖެނަމަ، އެ ތަކެތި ނައްތާލާނެ ކަމުގެ ހަރުކަށި އިންޒާރު ރައީސް ޑޮނަލްޑް ޓްރަމްޕް ދެއްވައިފި. ޓްރަމްޕް ވިދާޅުވި ގޮތުގައި މަސްތުވާތަކެތި އުފުލާ އުޅަނދުތަކާ ދެކޮޅަށް އެމެރިކާގެ އަސްކަރިއްޔާއިން ބޭނުންކުރާ ހަރުކަށި އުސޫލުތައް އީރާނުގެ އުޅަނދުތަކާ ދެކޮޅަށްވެސް ބޭނުންކުރާނެ. މީގެ އިތުރުން އީރާނުގެ ކަނޑުގެ ސިފައިންގެ ބާރު މިހާރުވެސް ވަރަށް ބޮޑަށް ބަލިކޮށްލާފައިވާ ކަމަށް ޓްރަމްޕް ވިދާޅުވި.
ވޮޝިންގޓަންގެ ޖޮއިންޓް ބޭސް އެންޑްރޫސް (ޖޭ.ބީ.އޭ) އަށް ވަޑައިގަތުމަށްޓަކައި، 2026 އޭޕްރީލް 11 ވާ ހޮނިހިރު ދުވަހު ވައިޓް ހައުސްއިން ނުކުމެވަޑައިގަންނަވަމުން، އެމެރިކާގެ ރައީސް ޑޮނަލްޑް ޓްރަމްޕް ނޫސްވެރިންނާ ވާހަކަދައްކަވަނީ. | ރޮއިޓާސް
އީރާނުގެ ބަނދަރުތައް ބަންދުކުރުމަށް އެމެރިކާއިން ކުރިއަށްގެންދާ "ނޭވަލް ބްލޮކޭޑް" އާ ކުރިމަތިލާ އީރާނުގެ "ފާސްޓް އެޓޭކް ޝިޕް" ނުވަތަ ހަލުވި ހަމަލާދޭ އުޅަނދުތައް އެމެރިކާގެ ސިފައިން ނައްތާލާނެ ކަމުގެ އިންޒާރު ރައީސް ޑޮނަލްޑް ޓްރަމްޕް ދެއްވައިފިއެވެ. މި ހަރުކަށި އިންޒާރު ޓްރަމްޕް ދެއްވާފައި މިވަނީ، އީރާނުގެ ބަނދަރުތައް ބަންދުކުރުމަށް އެމެރިކާއިން އެޅި ފިޔަވަޅުތަކަށް ހޯމަ ދުވަހު އަމަލުކުރަން ފަށާފައިވަނިކޮށެވެ.
ޓްރަމްޕްގެ "ޓްރުތް ސޯޝަލް" ނެޓްވޯކްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ ބްލޮކޭޑާ އެއްވެސް ވަރަކަށް އީރާނުގެ މިފަދަ އުޅަނދުތައް ގާތްވެއްޖެނަމަ، ވަގުތުން އެ ތަކެތި ނައްތާލާނެ ކަމުގެ އިންޒާރު ދެއްވާ ކަމަށެވެ. މީގެ އިތުރުން، އީރާނުގެ ކަނޑުގެ ސިފައިންގެ ބާރުގެ ބާކީ އޮތް ބައި މިހާރުވެސް މުޅިން ސުންނާފަތިކޮށްލާފައިވާ ކަމަށް ޓްރަމްޕް ވިދާޅުވިއެވެ.
ވެނެޒުއޭލާގެ އައްސޭރިފަށުން މަސްތުވާތަކެތި އުފުލާ ކަމަށް ތުހުމަތުކުރެވޭ އުޅަނދުތަކަށް އަމާޒުކޮށް ދޭ ވައިގެ ހަމަލާތަކަށް އިޝާރާތް ކުރައްވަމުން ރައީސް ޓްރަމްޕް ވިދާޅުވީ، ކަނޑުމަތީގައި މަސްތުވާތަކެތި ވިއްކާ މީހުން ނައްތާލުމަށް އެމެރިކާގެ އަސްކަރިއްޔާއިން ބޭނުންކުރާ ނިޒާމު، އީރާނުގެ އުޅަނދުތަކާ ދެކޮޅަށްވެސް ބޭނުންކުރާނެ ކަމަށެވެ.
